رضوان سلمانی
دیوبند، 7؍ جون،سماج نیوز سروس:حلف برداری کے بعد پہلی مرتبہ نگر پالیکا پہنچے نومنتخب چیئرمین نے پالیکا کے میٹنگ ہال میں تعارفی میٹنگ کا انعقاد کیا گیا ، جس میں نومنتخب چیئرمین وپن گرگ نے نگر پالیکا افسران ، ملازمین اور صفائی ملازمین کو شہر دیوبند کی ترقی کے لئے ضروری ہدایت دیتے ہوئے کہا کہ شہر میں صاف صفائی ، پانی کی سپلائی اور روشنی کے نظام کو درست بنایا جائے اور ساتھ ہی نگر پالیکا ممبران کے مسائل کو ترجیحات کی بنیاد پر حل کرنے کی ہدایت دی اور انہو ںنے نگر پالیکا ملازمین کو مستعد رہنے کی بھی ہدایت دی اور کہا کہ شہر دیوبند کو بلاتفریق مذہب وملت خوبصورت بنانے کا کام کیا جائے گا۔ آج نگر پالیکا کے سبھی افسران اور ملازمین کی تعارفی میٹنگ میں بہت سے نگر پالیکا ممبران موجود رہے ، چیئرمین کی جانب سے سبھی افسران اور ملازمین کا تعارف کرایا گیا اور کچھ ممبران کی جانب سے اپنے اپنے وعدوں سے متعلق مختلف مسائل سے چیئرمین کو آگاہ کیا گیا جن کا موقع پر ہی حل کردیا گیا۔ نومنتخب چیئرمین وپن کمار گرگ نے وہاں پر موجود سبھی ملازمین سے کہا کہ شہر دیوبند کو صاف ستھرا اور خوبصورت بنانا ان کی ترجیحات میں شامل ہے اس لئے سبھی کے تعاون سے تاریخی شہر دیوبند کا چاروں طرف ترقیاتی کام کرانے کی بھرپور کوشش کی جائے گی۔ انہوںنے کہا کہ شہر دیوبند کی صاف صفائی ، پانی کی سپلائی اور روشنی کے نظام کو مزید بہتر بنایا جائے گا۔ انہوں نے نگر پالیکا کے ملازمین کو یہ بھی ہدایت دی کہ وہ اپنے طور طریقوں میں تبدیلی لائیں اور مستعد ہوں اور ساتھ ہی نگر پالیکا ممبران کی عزت کریں اور ان کی جانب سے بتائے گئے مسائل کا اصول کے مطابق جلد سے جلد حل کرکے انہیں اپنی بات سے مطمئن کرکے انہیں آگاہ بھی کریں۔ نومنتخب چیئرمین نے کہا کہ سبھی نگر پالیکا ممبران ، افسرا وملازمین ایک ہی پریوار کا حصہ ہیں اور آپس میں گفت وشنید کرکے کام کریں۔ انہوں نے یہ بھی کہا کہ نگر پالیکا کے سبھی ملازمین وافسران کی تنخواہ ہر ماہ کی 5تاریخ تک تقسیم ہوجانا ضروری ہے۔ اور ایسے ملازمین جو ریٹائر ہوچکے ہیں ا ن کی 15ہزار روپے تک کی رقم نگر پالیکا پر بقایا ہے ، ان کی ایک مشت ادائیگی کی جائے گی۔ انہوں نے کہا کہ شہر دیوبند کے پانی کے نظام کی سپلائی کو مزید اطمینان بخش بنائے جانے کے احکامات بھی دیئے اور کہا کہ نگر پالیکا کے جن ٹیوب ویل پر جنریٹر کا نظم نہیں ہے وہاں پر جلد ہی جنریٹر کرائے پر لے کر شہریوں کو پانی کی سپلائی دی جائے اور سبھی ٹیوب ویلوں پر بجلی چلے جانے کی صورت میں 2گھنٹے جنریٹر چلاکر پانی کی سپلائی دی جائے۔ انہوں نے کہا کہ مستقبل میں ہونے والی بورڈ کی میٹنگ میں ضرورت کے مطابق جنریٹرکی خریداری کی تجویز لائی جائے گی۔ انہوں نے سبھی صفائی ملازمین کو ہدایت دی کہ وہ اپنے وارڈ کے ممبر کے رابطہ میں رہ کر صفائی کے نظام کو درست کریں ۔ انہوں نے یہ بھی کہا کہ شہر دیوبند میں 5عدد نئی فوگنگ مشینوں کی خریداری جلد کی جائے گی۔ اس دوران ای او نگر پالیکا دھریندر کمار رائے نے اس سلسلہ میں محکمہ پانی سپلائی کے محرر محمد عارف کو ہدایت دی کہ اگر شہر میں کوئی ٹیوب ویل خراب ہوجائے یا پائپ لائن لکیج ہونے کی وجہ سے پانی سپلائی متأثر ہو تو اس صورت میں اس کی اطلاع ممبران کا واٹس اپ گروپ بناکر اپلوڈکردی جائے اور اس میں یہ بھی تحریر کیا جائے کہ کتنے وقت میں ٹیوب ویل درست کراکر پانی کی سپلائی دی جائے گی۔ اس موقع پر نگر پالیکا ممبر اقبال انصاری، محمد اختر، رضوان ، ندیم، رویندر چودھری، انکت رانا، شیام چوہان، شرافت ملک، محمد وسیم، اجے گاندھی سمیت نگر پالیکا افسران و ملازمین موجود رہے۔
