نئی دہلی ، مرکزی تحقیقات ایجنسی ،سی بی آئی نے نئی کاری پالیسی کے مبینہ گھوٹالہ معاملے میں دہلی کے وزیر اعلی اروند کجریوال کو 16 اپریل کو طلب کیا ہے۔اطلاعات کے مطابق انہیں حاضر رہنے کے لئے باضابطہ ایک نوٹس بھی بھیجا گیا ہے ،جس میںکجریوال کو تحقیقاتی ٹیم کے سوالات کا جواب دینے کے لیے صبح 11 بجے ایجنسی کے ہیڈکوارٹر میں موجود ہونے کو کہا گیا ہے۔سی بی آئی کے نوٹس کے بعد عام آدمی پارٹی کی جانب سے شدید ردعمل سامنے آیا ہے ۔راجیہ سبھا سے ممبر پارلیمنٹ سنجے سنگھ نے مرکزی تحقیقاتی ایجنسی کو آڑے ہاتھو ں لیتے ہوئے کہا کہ یہ نوٹس وزیر اعلیٰ کجریوال کو گرفتار کرنے کی ایک سازش ہے ۔سنجے سنگھ نے آج دہلی میں ایک پریس کانفرنس میں یہ بات کہی۔ انہوںنے کہا کہ سی بی آئی کا سمن وزیر اعلیٰ کجریوال کو گرفتار کرنے کی سازش ہے۔ انہوںنے وزیر اعظم مودی کو بھی نشانے پر لیا۔ انہوں نے کہا کہ وزیر اعلیٰ کجریوال نے دہلی اسمبلی میں اڈانی کے مدعے پر بات کی تھی۔ اسی وقت میں ان سے کہا تھا کہ تم اگلے ہوگے!۔ انہوں نے صحافیوں کو مخاطب کرتے ہوئے کہ وزیر اعظم مودی کی قیادت والا مرکز سر سے پائوں تک بدعنوانی میں ملوث ہے ،اور بدعنوانی کے خلاف کجریوال کی لڑائی اس طرح کے سمنوں سے رک نہیں جائے ۔مسٹر سنجے سنگھ نے کہا کہ یہ نوٹس کجریوال کو گرفتار کرنے کی ایک سازش ہے ۔یہ نوٹس نا تو’ آپ ‘کو چپ کراپائے گا نا ہی کجریوال کو ۔واضح رہے کہ مرکزی جانچ ایجنسی اس معاملے میں دہلی کے سابق نائب وزیر اعلی منیش سسودیا کو پہلے ہی گرفتار کر چکی ہے۔ آپ لیڈروں پر الزام عائد کیا گیا ہے کہ دہلی حکومت کی نئی آبکاری پالیسی2021-22کے تحت دہلی حکومت نے مبینہ طور سے کچھ شراب کے تاجروں کو لائسنس دلانے کے لئے مخصوص ڈیلروں کی حمایت کی تھی۔جنہوں نے مبینہ طور پر اس کے لئے رشوت دی، حالانکہ اس الزام کی آپ سختی سے تردید کرچکی ہے اوربعد ازاں پالیسی کو منسوخ بھی کر دیا گیا۔وہیں آپ پر مزید الزام یہ بھی لگایا گیا کہ آبکاری پالیسی میں ترمیم، لائسنس دہندگان کو ناجائز فائدہ کی توسیع، لائسنس فیس میں چھوٹ یاکمی نیز منظوری کے بغیرایل -1 لائسنس کی توسیع وغیرہ سمیت متعدبے ضابطگیاں کی گئیں۔
ادھر سی بی آئی کے ذریعہ کجریوال کو سمن جاری کیے جانے کے بعد دہلی کانگریس صدر چودھری انل کمار کا بھی رد عمل سامنے آیا ہے۔ قومی آواز کی خبر کے مطابق انھوں نے کہا کہ’’ دہلی کانگریس شروع سے ہی کہہ رہی تھی کہ آبکاری گھوٹالے کے ماسٹر مائنڈ دہلی کے وزیر اعلیٰ اروند کجریوال ہیں اور وہ دن 16 تاریخ ہے جب سی بی آئی کجریوال سے شراب پالیسی نافذ کرنے میں کی گئی بے ضابطگیوں اور گھوٹالے پر سوال جواب کرے گی۔ ان کے پرسنل اسسٹنٹ نے سی بی آئی کے ذریعہ پوچھ تاچھ کیے جانے پر کجریوال کا سیدھا نام لیا تھا کہ وزیر اعلیٰ کی موجودگی میں منیش سسودیا کے ساتھ ان کے گھر پر ڈیلنگ ہوئی تھی۔ کیا کجریوال کے پاس اس کا جواب ہے‘‘؟۔ چودھری انل نے مزید کہا کہ دہلی کانگریس نے ہی نئی آبکاری پالیسی کے خلاف مہم چلائی اور بدعنوانی کو اجاگر کر کے اس کی شکایت لیفٹیننٹ گورنر سے کی تھی۔انہوں نے کہا کہ وہ دن دور نہیں جب کجریوال بھی سسودیا اور ستندر جین کے ساتھ جیل میں ہوں گے !۔
