رمضان اور ہولی کا حسین امتزاج

بھاگلپور (قمر امان)باہمی اتحاد و اتفاق،مذہبی رواداری اور سماجی ہم آہنگی کو فروغ دینے کے مقصد سے وقف سید شاہ عنایت حسین 159،خانقاہ پیر دمڑیا شاہ خلیفہ باغ بھاگلپور کی جانب سے ایک قابلِ تقلید اور مثالی اقدام انجام دیا گیا۔رمضان المبارک جیسے مقدس اور بابرکت مہینے میں ہندو برادری کے عظیم تہوار ہولی کے موقع پر وقف 159 کے زیرِ اہتمام 70 مستحق خاندانوں کے درمیان ’’سدبھاؤنا ہولی کٹ‘‘ تقسیم کی گئی،جس نے فرقہ وارانہ ہم آہنگی اور بھائی چارے کی ایک روشن مثال قائم کی۔یہ ہولی کٹس شہر کے مختلف علاقوں،جن میں مودی نگر،امبیڈکر نگر،ناتھ نگر اناتھالیہ روڈ،لالوچک چمپا نگر اور مسکن براری شامل ہیں،میں ضرورت مند خاندانوں تک پہنچائی گئیں۔اس کارِ خیر میں خاص طور پر معاشی طور پر کمزور اور مستحق طبقات کو ترجیح دی گئی تاکہ خوشیوں کے اس رنگین تہوار کی مسرت ہر دروازے تک پہنچ سکے اور کوئی بھی گھرانہ خوشیوں سے محروم نہ رہ جائے۔کٹ میں تہوار سے متعلق ضروری اشیاء شامل تھیں، جنہیں پا کر مستحقین کے چہروں پر خوشی اور اطمینان نمایاں طور پر جھلک رہا تھا۔اس موقع پر خانقاہ پیر دمڑیا شاہ کے سجادہ نشین اور وقف 159 کے متولی مولانا سید شاہ فخر عالم حسن نے اپنے خطاب میں کہا کہ موجودہ دور میں عالمی سطح پر نفرت، عداوت،جنگ اور کشیدگی کے مناظر عام ہو چکے ہیں۔ایسے پُرآشوب حالات میں مذہبی و سماجی اداروں کی ذمہ داری دو چند ہو جاتی ہے کہ وہ عملی طور پر محبت،بھائی چارہ اور رواداری کا پیغام عام کریں۔انہوں نے کہا کہ بظاہر ایسا محسوس ہوتا ہے گویا انسان کو محبت کے لیے نہیں بلکہ نفرت کے لیے پیدا کیا گیا ہو، حالانکہ لفظ ’’انسان‘‘ ہی انس و محبت سے ماخوذ ہے،جس کا مفہوم ایک دوسرے کے ساتھ خلوص،ہمدردی اور احترام کے ساتھ پیش آنا ہے۔مولانا فخر عالم حسن نے مزید کہا کہ تہوار دراصل خوشی،مسرت اور یکجہتی کے مواقع ہوتے ہیں۔
اگر ہم ایک دوسرے کی خوشیوں میں شریک ہوں، تحائف کا تبادلہ کریں اور دکھ سکھ میں ساتھ کھڑے رہیں تو دلوں کی دوریاں خود بخود کم ہو جاتی ہیں اور سماج میں ہم آہنگی مضبوط بنیادوں پر استوار ہوتی ہے۔انہوں نے اس امر پر زور دیا کہ رمضان اور ہولی کا یہ حسین امتزاج ہمارے ملک کی گنگا جمنی تہذیب کی عکاسی کرتا ہے،جہاں مختلف مذاہب اور ثقافتوں سے تعلق رکھنے والے افراد ایک دوسرے کے جذبات کا احترام کرتے ہوئے باہمی محبت کے ساتھ زندگی گزارتے ہیں۔تقسیم کے اس بابرکت عمل میں مانو سہایتا کیندر کے ڈائریکٹر دیو جیوتی مکھرجی، محمد احمد باشو،محمد ابصار اور حماد حسینی سمیت دیگر معزز افراد نے فعال کردار ادا کیا۔ان حضرات نے نہایت منظم اور خوش اسلوبی کے ساتھ مستحق خاندانوں تک ہولی کٹس کی فراہمی کو یقینی بنایا۔مقامی باشندوں اور سماجی حلقوں نے اس اقدام کو بے حد سراہتے ہوئے کہا کہ اس طرح کی سرگرمیاں نہ صرف ضرورت مندوں کی فوری مدد کا ذریعہ بنتی ہیں بلکہ معاشرے میں باہمی اعتماد،اخوت اور ہم آہنگی کو بھی فروغ دیتی ہیں۔اہلِ شہر نے امید ظاہر کی کہ وقف 159 اور خانقاہ پیر دمڑیا شاہ کی جانب سے مستقبل میں بھی اس نوعیت کی فلاحی اور سماجی سرگرمیاں جاری رہیں گی، تاکہ محبت،رواداری اور بھائی چارے کا پیغام عام ہو اور ہمارا سماج امن و یکجہتی کی روشن مثال بنا رہے۔