نئی دہلی 6جون،؍ ہمارا سماج: ہندوستان سے حج بیت اللہ2023 کے لیے پہلے مرحلہ میں عازمین حج کی روانگی کا سلسلہ گذشتہ21؍مئی2023 سے شروع ہونے کے ساتھ ہی دہلی کے اندرا گاندھی انٹرنیشنل ایئر پورٹ سے مدینہ منورہ کے لیے عازمین حج کی روانگی شروع ہو چکی تھی۔دہلی اسٹیٹ حج کمیٹی کے ایگزیکٹو آفیسر اشفاق احمد عارفی سے موصول اطلاع کے مطابق6؍جون2023 بروز منگل رات09:45 منٹ پر سعودی ایئرلائنس کی آخری حج پرواز نمبرSV-3775 سے136عازمین حج مدینہ منورہ کے لیے روانہ ہوئے اور اس کے ساتھ ہی دہلی ایمبارکیشن پوائنٹ سے 19399عازمین حج سرزمین مکہ مکرمہ اور مدینہ منورہ پہنچ چکے ہیں۔ عازمین حج کے آخری قافلے کو مدینہ منورہ روانہ کرنے کے لیے دہلی اسٹیٹ حج کمیٹی کی چیئرپرسن محترمہ کوثر جہاں، ممبر ان محترمہ نازیہ دانش ،جناب محمد سعد، ایگزیکٹو آفیسر اشفاق احمد عارفی، ڈپٹی ایگزیکٹو آفیسر جناب محسن علی کے علاوہ اسٹاف اور کارکنان بھی اندرا گاندھی انٹرنیشنل ایئرپورٹ کے ٹرمنل 3پر موجود تھے۔دہلی اسٹیٹ حج کمیٹی کی چیئر پرسن محترمہ کوثر جہاں نے عازمین حج سے ملاقات کرکے انہیں مبارک باد دی اور ان کے لیے اپنی نیک تمنائوں کااظہار کیا کہ وہ پوری خیریت اور صحت وسلامتی کے ساتھ حج کی ادائیگی کے بعد اپنے ملک عزیز کو واپس آئیں اور دوران حج ملک کی خوشحالی اور امن و سلامتی کی دعاء کریں۔
واضح ہوکہ دہلی سے حج بیت اللہ کے لیے روانہ ہونے والے عازمین حج میں ریاست دہلی کے2662، اترپردیش کے 11852آندھرا پردیش کے02، آسام کے08، بہارکے210، چندی گڑھ کے 35، ہریانہ کے1793، ہماچل پردیش کے66، جموں کشمیر کے653، جھارکھنڈ کے09،کرناٹک کے03، لداخ کے05،مدھیہ پردیش کے31،مہارشٹرا کے 02،اڑیسہ کے03،پنجاب کے289،راجستھان کے245،اتراکھنڈ کے1525 اورمغربی بنگال کے06 عازمین کرام ہیں۔ان میں مرد عازمین کی تعداد10337اور خواتین عازمین کی تعداد9062ہے جس میں بغیر محرم حج کی سعادت سے سرفرازی کے لیے جانے والی کل101خواتین بھی شامل ہیں۔ سعادت حج بیت اللہ سے سرفرازی کے بعد ان حجاج کرام کی وطن واپسی کا سلسلہ آئندہ3؍جولائی2023 سے شروع ہوگا اور21؍جولائی2023تک یہ تمام حجاج کرام اپنے وطن عزیز کی سرزمین پر واپس آ جائیں گے۔
