وزیر اعظم مودی اور مارک کے درمیان دو طرفہ ملاقات میں اتفاق، ہندوستان اور کینیڈا کے دارالحکومتوں میں ہائی کمشنرز کی بحالی ہوگی

کناناسکیس(کینیڈا) (ہ س)۔ ہندوستان اور کینیڈا نے ایک دوسرے کے دارالحکومتوں میں ہائی کمشنروں کی جلد واپسی کے ساتھ تعلقات میں استحکام کی بحالی کے لیے سوچے سمجھے اور تعمیری اقدامات کرنے پر اتفاق کیا ہے۔ البرٹا صوبے کے کناناسکیس میں منعقدہ جی-7 سربراہی اجلاس کے موقع پر ہندوستان کے وزیر اعظم نریندر مودی اور کینیڈا کے وزیر اعظم مارک کارنی کے درمیان دو طرفہ ملاقات نے تعلقات پر جمی برف پگھلنے کی شروعات ہوئی ہے۔ہندوستان کی وزارت خارجہ کے جاری کردہ بیان کے مطابق، وزیر اعظم مودی نے آج کینیڈا کے وزیر اعظم مارک کارنی کے ساتھ دو طرفہ میٹنگ کی۔ دونوں رہنماوں کے درمیان یہ پہلی آمنے سامنے بات چیت ہے۔ یہ ملاقات وزیر اعظم کارنی کے عہدہ سنبھالنے کے بعد ہوئی۔ اس میٹنگ نے ہندوستان-کینیڈا تعلقات کی صورتحال اور آگے بڑھنے کے راستے پر کھل کر اور دوراندیش بات چیت کا موقع فراہم کیا۔بیان کے مطابق ،دونوں رہنماوں نے مشترکہ جمہوری اقدار، قانون کی حکمرانی کے احترام اور خودمختاری اور علاقائی سالمیت کے اصولوں کو برقرار رکھنے کے عزم پر مبنی ہندوستان-کینیڈا تعلقات کی اہمیت کا اعادہ کیا۔ انہوں نے باہمی احترام، عوام کے مضبوط تعلقات اور بڑھتی ہوئی اقتصادی تکمیلات پر مبنی تعمیری اور متوازن شراکت داری کی ضرورت پر زور دیا۔ اس تناظر میں، دونوں فریقوں نے ایک دوسرے کے دارالحکومتوں میں ہائی کمشنرز کی جلد واپسی سمیت تعلقات میں استحکام کی بحالی کے لیے سوچے سمجھے اور تعمیری اقدامات کرنے پر اتفاق کیا۔دونوں رہنماؤں نے اعتماد کی بحالی اور مختلف شعبوں میں تعلقات کو تیز کرنے کے لیے سینئر وزارتی اور ورکنگ لیول کے مذاکرات کو دوبارہ شروع کرنے کی اہمیت پر بھی زور دیا۔ دونوں فریقوں نے صاف توانائی، ڈیجیٹل تبدیلی، مصنوعی ذہانت، ایل این جی، فوڈ سیکورٹی، اہم معدنیات، اعلیٰ تعلیم، نقل و حرکت اور سپلائی چین جیسے شعبوں میں مستقبل میں تعاون کے مواقع پر تبادلہ خیال کیا۔ انہوں نے ایک آزاد اور کھلے ہند-بحرالکاہل خطے کو فروغ دینے میں اپنی مشترکہ دلچسپی کا اعادہ کیا۔ رہنماوں نے ایک جامع اقتصادی شراکت داری کے معاہدے (سی ای پی اے ) کی راہ ہموار کرنے کے لیے ابتدائی پیش رفت تجارتی معاہدے (ای پی ٹی اے) پر تعطل کا شکار مذاکرات کو دوبارہ شروع کرنے کی اہمیت پر تبادلہ خیال کیا۔ انہوں نے اپنے متعلقہ حکام کو اس سلسلے میں مزید بات چیت کرنے کی ہدایت کی۔دونوں رہنماوں نے جی-7 سربراہی اجلاس میں ہونے والی اہم پیش رفت اور عالمی ترجیحات جیسے کہ ماحولیاتی کارروائی، جامع ترقی اور پائیدار ترقی پر مل کر کام کرنے کی ان کی مشترکہ خواہش کا اعتراف کیا۔ وزیر اعظم مودی اور مارک کارنی نے دونوں ممالک کے درمیان عوام سے عوام کے گہرے تعلقات پر زور دیا اور باہمی فائدے کے لیے اس کا فائدہ اٹھانے پر اتفاق کیا۔ انہوں نے رابطے میں رہنے اور جلد دوبارہ ملنے کی خواہش بھی ظاہر کی۔وزیر اعظم نریندر مودی نے ایکس ہینڈل پر لکھا، ’’وزیر اعظم مارک کارنی کے ساتھ شاندار ملاقات ہوئی۔جی-7 سربراہی اجلاس کی کامیابی کے ساتھ میزبانی کے لیے انہیں اور حکومت کینیڈا کو مبارکباد پیش کی۔ ہندوستان اور کینیڈا جمہوریت، آزادی اور قانون کی حکمرانی میں مضبوط یقین کے ساتھ جڑے ہوئے ہیں۔ وزیر اعظم کارنی اور میں بھارت-کینیڈا دوستی کو رفتار دینے کے لیے مل کر کام کرنے کے منتظر ہیں۔تجارت، توانائی، خلائی شعبہ، صاف توانائی، اہم معدنیات، کھاد اور دیگر شعبے اس سلسلے میں بے پناہ امکانات پیش کرتے ہیں۔‘‘ہندوستان کے وزیر اعظم نریندر مودی کا دورہ کینیڈا کامیاب رہا۔ ان کا اگلا قیام کروشیا ہے۔ وزیر اعظم مودی کینیڈا کا دو روزہ دورہ مکمل کرنے کے بعد یہاں سے کروشیا کے لیے روانہ ہو گئے ہیں۔ ہندوستان کی وزارت خارجہ نے ایکس پر لکھا، ’’وزیر اعظم نریندر مودی نے کینیڈا کا بہت نتیجہ خیز دورہ کیا۔ جی-7 سربراہی اجلاس میں، توانائی کی حفاظت، ٹیکنالوجی اور اختراع جیسے عالمی تناظر میں اہم مسائل پر بامعنی بات چیت ہوئی۔