انڈین ویلز (امریکہ)، ( یو این آئی) چار مرتبہ کے میجر چیمپئن اور عالمی نمبر دو جنک سنر نے برازیل کے ابھرتے ہوئے نوجوان کھلاڑی جوؤ فونسیکا کو ایک سخت مقابلے کے بعد شکست دے کر انڈین ویلز ٹینس ٹورنامنٹ کے کوارٹر فائنل میں جگہ بنا لی ہے۔ کیلیفورنیا کے اسٹیڈیم کورٹ پر کھیلے گئے اس میچ میں سنر نے 6-7، 6-7 سے فتح حاصل کی۔دنیا کے دوسرے نمبر کے کھلاڑی سنر اور 19 سالہ فونسیکا کے درمیان پہلا مقابلہ توقعات کے عین مطابق رہا۔دونوں کھلاڑیوں کے درمیان پہلا سیٹ انتہائی دلچسپ رہا جو ٹائی بریکر تک گیا۔ فونسیکا نے ٹائی بریکر میں 3-6 کی برتری حاصل کر لی تھی، لیکن سنر نے اپنے تجربے کا استعمال کرتے ہوئے مسلسل پانچ پوائنٹس حاصل کیے اور پہلا سیٹ اپنے نام کیا۔سنر نے دوسرے سیٹ میں 2-4 کی برتری حاصل کی، لیکن فونسیکا نے شاندار واپسی کرتے ہوئے کھیل کو دوبارہ ٹائی بریکر تک پہنچا دیا۔ تاہم، فیصلہ کن لمحات میں اطالوی اسٹار نے مسلسل چار پوائنٹس لے کر میچ جیت لیا۔جنک سنر کا اگلا مقابلہ امریکہ کے 20 سالہ لرنر ٹین سے ہوگا، جنہوں نے اسپین کے ڈیوڈوچ فوکینا کو ہرا کر پہلی بار کسی ماسٹرز 1000 ٹورنامنٹ کے کوارٹر فائنل میں جگہ بنائی ہے۔
