سماج نیوز سروس:اس وقت ٹرینوں میں سفر کرنا بے حد مصیبت بھرا کام ہے ، گرمیوں کی چھٹیوں کی وجہ سے سبھی ٹرینیں فل چل رہی ہیں، اسپیشل ٹرینوں میں بھی جگہ نہیں بچی ہے۔ سیٹوں کے مقابلے 40فیصد ٹکٹ ویٹنگ کے بک ہورہے ہیں، کنفرم ٹکٹ محض پانچ فیصد ہی کنفرم ہورہے ہیں۔ وہ بھی جب کوئی اپنا ٹکٹ منسوخ کراتا ہے۔ وہیں تتکال کوٹے کی سیٹوںکے لئے صبح سے ہی ریزرویشن کائونٹروںپر لمبی لائن لگ رہی ہے، ریزرویشن کوچ میں ویٹنگ ٹکٹ لے کر چل رہے ہیں جس سے ریزرویشن کراچکے مسافروں کو بھی بڑی پریشانی ہورہی ہے ، سب سے برا حال جنرل کوچ کا ہے ۔ مسافر ٹوئلیٹ سے لے کر سامان رکھنے والی دو برتھ کے درمیان میں چادر کو باندھ کر بیٹھ رہے ہیں ۔ بنارس سے جموں توی ، رشی کیش کٹرہ، گورکھپور سے جموں توی وغیرہ بہت سی ٹرینوں میں جنرل کوچ میں مسافر ٹوئلیٹ میں بیٹھے نظر آرہے ہیں، ایک پر ایک لدھے مسافروں کو کھڑے ہونے تک کی جگہ نہیں مل پارہی ہے۔ کوچ میں جو ایک بار چڑھ گیا تو اس کو اترنے کی جگہ نہیں مل پارہی ہے۔ سینٹرل اسٹیشن پر تو کوئی بھی مسافر جنرل کوچ میں جا ہی نہیں سکتا۔
بہار اور پنجاب کی جانب جانے والی زیادہ تر سبھی ٹرینوں میں کم وبیش یہی صورت حال ہے۔ سلیپر کوچ میں سیٹوں سے زیادہ ویٹنگ ٹکٹ ریلوے بک کررہا ہے ، عموماً لمبی دوری کی 12سلیپر کوچ والی ٹرین میں 72سیٹوں کے حساب سے 864سیٹیں ہوتی ہیں ، عام دنوں میں ڈھائی تین سو ویٹنگ لسٹ ہوتی ہے ، تہواروں اور موجودہ وقت میں ویٹنگ لسٹ 350تک پہنچ رہی ہے جو کل سیٹوں کی تقریباً 40فیصد زائد ہے۔ ان میں سے 4،5فیصد ویٹنگ ٹکٹ منسوخ کرانے کے بدلے کنفرم ہورہے ہیں۔ 5فیصد ویٹنگ ٹکٹ کنفرم ہونے کے بعد 35فیصد ٹکٹ ویٹنگ رہ جاتے ہیں، ایسی صورت حال میں مسافروں کے پاس دو متبادل ہوتے ہیں، یا تو وہ ٹکٹ منسوخ کرائیں یا ویٹنگ ٹکٹ پر ہی بھیڑ کے درمیان سفر کریں ۔
ریلوے کائونٹر سے کرائے گئے وٹینگ ٹکٹ سے سفر کیا جاسکتا ہے ۔ آن لائن بک ویٹنگ ٹکٹ خود بخود منسوخ ہوجاتا ہے ، ریلوے بورڈ نے مئی 2021میں ویٹنگ ٹکٹ بک کرنے کی حد متعین کی تھی جس کے تحت سلیپر کلاس کے لئے زیادہ سے زیادہ 200، 3اے سی کے لئے 100سیکنڈ اے سی کے لئے 50اور فرسٹ اے سی کے لئے 20سے زیادہ ویٹنگ ٹکٹ نہیں بک ہوسکتے ہیں۔ جب کہ سلیپر ٹرینوں میں 300تک ویٹنگ ٹکٹ دیئے جاسکتے ہیں۔
