انقرہ :ترکیہ کے صوبے بالکسر میں آتش گیر مواد کی فیکٹری میں زور دار دھماکہ ہوا، جس کے باعث 12 افراد ہلاک جبکہ 3 زخمی ہو گئے۔
غیر ملکی ذرائع ابلاغ کے مطابق ترک صوبے بالکسر میں ایک بارودی مواد کے پلانٹ میں دھماکے کے باعث 12 افراد اپنی زندگیوں سے محروم ہوگئے۔
بالکسر کے گورنر کا اس حوالے سے کہنا ہے کہ دھماکا صبح پلانٹ کے ایک سیکشن میں ہوا جس سے عمارت کا حصہ زمین بوس ہوگیا۔
اس سے قبل ترکیہ میں 2 فوجی ہیلی کاپٹر آپس میں ٹکرانے سے 6 اہلکار جاں بحق ہو گئے تھے۔
ترک وزارت دفاع کے مطابق صوبہ اسپارتا میں تربیتی پرواز کے دوران ہیلی کاپٹر حادثے کا شکار ہوئے جس میں ایک ہیلی کاپٹر گِر کر تباہ ہوا جب کہ دوسرے کو بحفاظت اتار لیا گیا۔
وزارت دفاع کے مطابق حادثے میں جاں بحق ہونے والے افراد میں ہوابازی اسکول کے انچارج بریگیڈیئر جنرل بھی شامل ہیں۔
ہیلی کاپٹر میں سے ایک بیل UH-1 Iroquois گرنے سے دو ٹکڑے ہو گیا جس میں سوار تمام چھ افراد جاں بحق ہوئے، پانچ افراد موقع پر ہی دم توڑ گئے جب کہ ایک اسپتال میں زخموں کی تاب نہ لاتے ہوئے چل بسا۔
دوسرا ہیلی کاپٹر جس کا ماڈل ظاہر نہیں کیا گیا، جائے حادثہ سے تقریباً 400 میٹر دور بحفاظت لینڈ کرنے میں کامیاب ہو گیا۔ تصادم کی وجہ تاحال معلوم نہیں ہو سکی۔
