ناندیڑ،پریس ریلیز،ہماراسماج: ہم پر جو پریشانیاں اور مصیبتیں آتی ہیں، وہ ہمارے اپنے ہی اعمال کا نتیجہ ہیں، لہٰذا پُرسکون اورپُراطمینان زندگی گزارنے کے لیے ضروری ہے کہ ہم انفرادی اور اجتماعی طور پر اپنی گزشتہ کوتاہیوں پر نادم ہوکر اللہ تعالیٰ سے ان پر معافی مانگیں،فی الفور نافرمانی چھوڑ کر آئندہ اپنے اعمال کی اصلاح کریں۔ ان خیالات کا اظہارملک کی عظیم دینی تعلیم گاہ دار العلوم دیوبند سے تشریف لائے مہمان مقرر مولانا محمد عرفان قاسمی مبلغ دار العلوم دیوبند نے جمعیۃ علماء کے زیر اہتمام فیمس فنکشن ہال مال ٹیکری روڈ ناندیڑ میں منعقدہ جلسہ سیرۃ النبی ﷺ اور اصلاح معاشرہ سے خطاب کرتے ہوئے کیا۔ مولانا موصوف نے اپنے جامع و پُر مغز خطاب میں گناہوں کی نحوست سے بچنے درپیش آمدہ مصائب پرصبرکرنے والدین کے ساتھ حسن سلوک کرنے، نماز کی پابندی کرنےاور گناہوں سے بچنے کی تلقین فرمائی ۔ صدر اجلاس قاری شمس الحق صاحب قریشی ( صدر جمعیۃ علماء مرہٹواڑہ ) نے اپنے صدارتی خطاب میں فرمایا کہ دنیا اور آخرت کی کامیابی کا راز صرف اور صرف سیرتِ رسول ﷺ کی پیروی میں مضمر ہے۔ انہوں نے اس بات کو چند حقیقی واقعات سے واضح کرتے ہوئے حاضرین کو اسوۂ رسول ﷺ پر عمل کرنے کی طرف توجہ دلائی۔مفتی عبدالرحمن صاحب اشرفی(جنرل سکریٹری جمعیۃ علماء مرہٹواڑہ) نے نہایت پُراثر انداز میں زندگی کے مقصد اور انبیاء کرام کی دعوت کے فلسفے کو بیان کیا، اور حضور ﷺ کی بچپن کی زندگی اور والدین کے ساتھ حسن سلوک پر تفصیل سے روشنی ڈالی ۔مولانا عثمان فیصل صاحب(صدر جمعیۃعلماء ضلع ناندیڑ)نے جمعیۃ علماء کی اصلاح معاشرہ مہم کی اہمیت اور ضرورت پر گفتگو کرتے ہوئے فرمایا کہ جلسہ سیرۃ النبی ﷺ اور اصلاح معاشرہ کے یہ پروگرام ہمارے صوبائی صدر محترم مولانا حافظ محمد ندیم صدیقی صاحب ( صدر جمعیۃ علماء مہا راشٹر ) کی نگرانی و رہنمائی میں کا میابی کے ساتھ منعقد ہو رہے ہیں ۔ انہوں نے مزید کہا کہ اس مہم کا مقصد مسلم معاشرے کو حضور اکرم ﷺ کی سیرت کے سانچے میں ڈھالنا ہے تاکہ زندگی کے ہر گوشے میں کامیابی حاصل کی جاسکے۔مفتی ایوب صاحب (سکریٹری جمعیۃ علماء مرہٹواڑہ) نے اپنے خطاب میں معاشرہ کے اصلاح کی ابتدا اپنی ذات سے کرنے پر زور دیتے ہوئے کہاکہ اگر ہر شخص خود کو بہتر بنانے کی کوشش کرے تو پورے معاشرے کی اصلاح ممکن ہے۔اجلاس کا آغاز قر آن کی تلاوت اور نعتیہ کلام سے ہوا ،بعدہ مفتی حماد قریشی صاحب قاسمی( آرگنائزر جمعیۃ علماء مرہٹواڑہ) نے تمہیدی گفتگو کرتے ہوئے اصلاحِ معاشرہ مہم کی تاریخ اور اہمیت پر روشنی ڈالی،اور کہا کہ اس کامقصد مسلمانوں کو جہیز، سود، اور دیگر معاشرتی برائیوں سے بچا کر حضور اکرم ﷺ کی سیرت کے عملی نمونے پر لانا ہے۔ اجلاس کی نظامت مفتی عمر صاحب ندوی، امام و خطیب مسجد محمدیہ ناندیڑ نے نہایت احسن طریقے سے انجام دیا،قاری محمد اسعد صاحب ( نائب صدر جمعیۃ علماء مرہٹواڑہ ) جناب عبدالرحیم احمد خان جنرل سیکرٹری جمعیت علماء ضلع ناندیڑ اجلاس کے انتظام و انصرام میں پیش پیش رہے ،اس اجلاس میں جمعیۃ علماء ضلع ناندیڑ کے ذمہ داران حضرت مولانا مظہر الحق صاحب کامل قاسمی، مولانا عبدالوہاب صاحب بیتی، مفتی سید شفیع الدین صاحب قاسمی، مفتی محمد اعظم صاحب قاسمی،سدی سلیم دیشمکھ،ارشد بھائی ٹیلر، مولانا عبد الوحید اشاعتی حافظ جنید ، رفیع احمد نظامی، عاصم بھائی کے علاوہ شہر و تعلقہ جات کے عہدے داران و اراکین محبین جمعیۃ ،شہر کے علماء کرام ،ائمہ مساجد ،عمائدین شہر اور شرکاء اجلاس بڑی تعداد میں شریک تھے ،مولانا عرفان صاحب مبلغ دار العلوم دیو بند کی دعاء پر اجلاس کا اختتام عمل میں آیا ۔
