قربانی کے جانوروں کولانے لے جانے میں بیجا روک ٹوک اور ناجائز وصولی پر لگام لگائی جائے

کانپور،15جون،،ہمارا سماج: آج قاضی شہر کانپور حافظ معمور احمد جامعی نے پولیس کمشنر بی پی جوگدنڈ سے کمشنریٹ دفتر واقع کچہری میں ملاقات کرکے قربانی کے جانوروں کو لانے لے جانے میں بیجا روک ٹوک اور پولیس اہلکاروں کے ذریعہ کی جانے والی ناجائز وصولی پرلگام لگانے کے ساتھ ساتھ عید الاضحی سے قبل شہر میں صفائی، بجلی، پانی سپلائی سمیت دیگر اہم امور کی جانب متوجہ کیا۔ قاضی شہر نے بتایا کہ ذی قعدہ کی 25تاریخ ہو چکی ہے، عیدالاضحی میں 15دن سے بھی کم وقت رہ گیا ہے۔ اس موقع پر بڑی تعداد میں مویشی پروراپنے مویشیوں (بکرا اور بھینس) کی فروختگی کیلئے دیہی علاقوں سے نکل کر شہر کی سمت آتے ہیں، ضلع انتظامیہ کی جانب سے کچھ مقامات کو نشانزد کرکے جانوروں کے خریدو فروخت کیلئے مختص بھی کیا جاتا ہے۔ تاجروں نے تجارت کے مقصد سے جانوروں کی خرید شروع بھی کر دی ہے، گزشتہ کچھ دنوں سے جانوروں کے لانے لے جانے پر غیر ضروری طور پر روک ٹوک اور ناجائز وصولی کی خبریں موصول ہو رہی تھیں۔ جس پر تاجروں اور عوام میں تشویش پائی جا رہی تھی، اس لئے آج ہم نے پولیس کمشنر سے ملاقات کرکے تحریری طور پر مسئلہ سے آگاہ کیا۔ اس کے علاوہ عید الاضحی کے موقع پر تمام مسلم اکثریتی علاقوں میں صاف پانی کی فراہمی، صفائی،ستھرائی اور مستقل بجلی سپلائی، عیدگاہ جانے والے راستوں کی مرمت، چونا چھڑکاؤ یقینی بنانے اور متعلقہ محکموں کے ذمہ داران کے ساتھ میٹنگ بلا کر اس جانب خصوصی توجہ دینے کی درخواست بھی کی ہے۔ کمشنر صاحب نے ہماری باتوں کو بغور سنا، فوراً ہی ماتحت پولیس افسران و اہلکاروں کو ہدایات جاری کر دی ہیں، اور یقین دہانی کرائی کہ اس تعلق سے پولیس انتظامیہ کی جانب سے عوام کو کسی طرح کی پریشانی نہیں آنے دی جائے گی۔ بجلی، پانی، صفائی عیدگاہ کی ضرورتوں پر جلد ہی متعلقہ محکموں اور انتظامیہ کے افسران کے ساتھ میٹنگ کرنے کی بات کہی ہے۔ اس موقع پر قاضی شہر حافظ معمور احمد جامعی کے ساتھ حاجی دلشاد قریشی،محمد سعد حاتم اور امتیاز قریشی موجود تھے۔