کانپور:۔جمعیۃ علماء شہر کانپور کے زیر اہتمام چلائی جا رہی’نشہ مکت سماج، نشہ مکت شہر‘ مہم کے تحت بیناجھابر نئی مسجد سے پورے علاقہ میں گھوم کر واپس نئی مسجد تک اور پیچ باغ چوراہے سے بیکن گنج بازار ہوتے ہوئے بابا سویٹ چوراہے تک جمعیۃ علماء اتر پردیش کی قیادت و شہری جمعیۃ علماء کے صدر ڈاکٹر حلیم اللہ خاں کی صدارت میں نشہ مخالف ریلیاں نکال کر لوگوں نشہ کی خرابیوں سے واقف کراتے ہوئے انہیں بیدار کیا گیا۔ ریلی کی قیادت کر رہے ریاستی نائب صدر مولانا امین الحق عبد اللہ قاسمی نے ریلی میں موجود تمام لوگوں سے حلف لیا کہ وہ خود بھی نشہ نہیں کریں گے، قانون کے دائرے میں رہ کر دوسروں کو بھی اس سے روکنے کی کوشش کریں گے۔ اس پرتمام لوگوں نے ہاتھ اٹھا کر جمعیۃ علماء کی اس مہم کی تائید اور سراہنا کرتے ہوئے ہر طرح سے تعاون دینے کی اپیل کی۔ اس موقع پر مولانا امین الحق عبد اللہ قاسمی نے کہا کہ اللہ تعالیٰ نے انسان کو پاک صاف ستھرا بنا کر پیدا کیا ہے، ایک انسان جب پیدا ہوتا ہے تو فطرت پر پیدا ہوتا ہے، تمام عیوب سے پاک ہوتا ہے، پھر جب وہ بڑا ہوتا ہے تو وہ اپنے لئے راستوں کا انتخاب کرتا ہے۔ سمجھدار آدمی اچھائیوں کو پسند کرتا ہے اور ناسمجھ آدمی برائیوں کی طرف جاتا ہے، انسان کی دنیا میں اچھی اور کامیاب زندگی گزارنے کیلئے جو چیزیں زیادہ ضروری اور اہم ہیں، ان میں سے بہت اہم اور بنیادی چیز صحت ہے، انسان کا جب جسم صحتمند رہے گا، بیماریوں سے بچا رہے گا تو وہ کام کر سکے گا اور کسی لائق رہے گا، بیماری انسان خواہ وہ کتنا بھی ذہین اور متحرک ہو، لیکن وہ کام نہیں کر سکتا۔
شہری نائب صدر مولانا محمد اکرم جامعی نے کہا کہ نشہ آور جتنی بھی چیزیں ہیں، اسے ہم اپنے محلے اور سماج سے دور کریں گے۔ انہوں نے کہا کہ نشہ کے سبب آج ہمارے معاشرہ میں بہت سی برائیاں پیدا ہو رہی ہیں، جھگڑے ہوتے ہیں، آپسی تعلقات خراب ہو رہے ہیں،ہم اگر اپنے گھر و سماج کو خوشحال دیکھنا چاہتے ہیں تو نشہ سے پاک کریں۔
جمعیۃ اہل سنت و الجماعت کے جنرل سکریٹری مولانا امیر حمزہ قاسمی نے کہا کہ نشہ انسانی صحت اور مال کیلئے خطرناک ہوتا ہے، جب کسی گھر میں کوئی شخص نشہ کا عادی ہو جاتا ہے تو اس کا پورا گھر برباد ہو جایا کرتا ہے۔ اگر ہم نشہ مکت سماج بنائیں گے تو ہمارا سماج ایک پاکیزہ سماج بنے گا۔
اس موقع پر ریلی میں خاص طورقاضی شہر کانپور حافظ و قاری معمور احمد جامعی، مولانا رضاء اللہ مظاہری، مولانا محمد سعد ندوی، مدن گوپال سنگھ لاکڑا، حافظ سلمان جلالی، مولانا قناعت اللہ مظاہری، قاری محمد مقیم فتح پوری، قاری محمد عزالی خاں، صادق امین، حافظ شاہدسمیت علاقہ ،محلہ کے تمام ذمہ داران و معززین موجود تھے۔
نشہ مخالف ریلی بکرمنڈی اور اخلاق نگر گنگاپار میں آج
کانپور:۔ جمعیۃ علماء شہر کانپور کے زیر اہتمام چلائے جا رہے نشہ مخالف مہم کے تحت آج مورخہ25جمادی الاولیٰ 1444ھ مطابق 21دسمبر2022 بروز بدھ صبح11؍بجے بکرمنڈی سے محلے میں گھومتے ہوئے بڑی عیدگاہ تک اور شام 4؍بجے مسجد نمرہ سے مدرسہ ابی ابن کعبتک نشہ مخالف ریلیاں جمعیۃ علماء شہر کانپور کے ریاستی نائب صدر مولانا امین الحق عبد اللہ قاسمی اور شہری صدر ڈاکٹر حلیم اللہ خاں کی قیادت میں نکالی جائیں گی۔ ریلی کے ذمہ داران مولانا محمد انعام اللہ قاسمی، مولانا قناعت اللہ مظاہری،مولانا محمد اسلام قاسمی، مولانا مراد علی قاسمی نے اس کی اطلاع دیتے ہوئے علاقہ کے تمام لوگوں سے شرکت کی درخواست کی ہے۔
