محمدزاہد امینی
نوح،میوات،13مئی،سماج نیوز سروس: حال ہی میں ہریانہ پبلک سروس کمیشن کے ذریعہ پی جی ٹی اردو کے عہدے پر منتخب کئے گئے ٹپکن گاؤں کے ہونہار تعلیم یافتہ نوجوان عمرحیات کو اس نمایاں کامیابی پر ان کے سابقہ اسکول گورنمنٹ سینئر سیکنڈری اسکول سندر نگری دہلی ۔93میں اعزاز سے نوازا گیا ۔ اسکول انتظامیہ کی جانب سے پرنسپل جی ایس ورما کی صدارت میں ایک پروقار اعزازیہ تقریب کا انعقاد کیا گیا جس میں عمر حیات خان کو ہریانہ میں پی جی ٹی لیکچرر بننے پر نہ صرف مبارکباد پیش کی گئی بلکہ ان کو توصیفی سند و علامتی نشان سے بھی نوازا گیا ۔غورطلب ہے کہ ماسٹر عمرحیات نے مذکورہ اسکول میں بطور ٹی جی ٹی اردو تقریباً 7سال درس و تدریس کی خدمات انجام دی تھی ۔ ان کی شاندار خدمات و پی جی ٹی اردو پر سلیکشن کے لیے ہی اسکول کی جانب سے یہ اعزازیہ تقریب منعقد کی گئی۔ ,اس موقع پر پرنسپل جی ایس ورما نے ماسٹر عمرا حیات کو مبارکباد پیش کرتے ہوئے ان کے تئیں نیک خواہشات کا اظہار کیا ۔ انہوںنے کہا کہ عمرحیات نہ صرف ایک بہترین ٹیچر ہیں بلکہ وہ ایک خوش مزاج و نیک انسان بھی ہیں۔اسکول ان کی خدمات کو ہمیشہ یاد رکھے گا۔
تقریب کے کامیاب انعقاد میں وائس پرنسپل انل کمار ملک، سکریٹری مہیندر و کوآرڈینٹر ڈاکٹر وجے کمار کا اہم رول رہا ۔عمرحیات کو اعزاز ملنے پرتنظیم فروغ اردو میوات کے سرپرست ماسٹر اشرف میواتی، ڈاکٹر قمرالدین ذاکر، صدر مولانا صدیق سنابلی ، نائب صدر خالد میواتی گھاسیڑہ، سکریٹری حافظ عمران، خازن محمد اسلم و حلقہ نوح صدر بھائی حکیم الدین چندینی نے مبارکباد پیش کرتے ہوئے ان کے تئیں نیک خواہشات کا اظہار کیا ہے۔
