واشنگٹن:امریکی وسط مدتی انتخابات کے ایک ہفتے بعد ریپبلکن پارٹی نے کانگریس کے ایوان زیریں میں اکثریت کیلئے درکار 218نشستیں حاصل کر لی ہیں۔ اگرچہ ایوان نمائندگان میں پارٹی کی جیت کا فرق بہت کم ہے ، لیکن یہ اگلے دو سالوں تک صدر جو بائیڈن کے ایجنڈے کو روکنے کیلئے کافی ہے ۔ جبکہ جنوری میں کانگریس کے اجلاس میں ایوان بالا سنیٹ پرڈیموکریٹس کا کنٹرول ہوگا۔رپورٹ میں مزید کہا گیا ہے کہ چند سیٹوں کا اعلان کیا جانا ابھی باقی ہے ۔ریپبلکن پارٹی نے دونوں ایوانوں پر دوبارہ کنٹرول حاصل کرنے کی امید کی تھی، مگر انہوں نے پچھلے ہفتے کے انتخابات میں توقعات سے کم کارکردگی کا مظاہرہ کیا۔انہوں نے بدھ کے روز وہ سیٹ جیت لی جس کی انہیں ایوان نمائندگان میں اکثریت کیلئے ضرورت تھی، جہاں کیلیفورنیا کا 27 واں ضلع میں مائیک گارسیا کی جیت کا اعلان کیا گیا۔سی بی ایس کے مطابق، ریپبلکن پارٹی کو اب 435 سیٹوں والے ایوان میں 218-223 سیٹیں مل سکتی ہیں۔ بی بی سی کی رپورٹ میں کہا گیا ہے کہ کلف ہینگر کا مقابلہ اب بھی جاری ہونے کے ساتھ، ان کی اکثریتی جیت دنوں یا ہفتوں تک واضح نہیں ہوسکتی ہے ۔
