پٹنہ ۔ نیشنل جوٹ بورڈ اور جوٹ کارپوریشن آف انڈیا لمیٹڈ کے یوم تاسیس کی تقریبات کے موقع پر مقامی گیان بھون میں دو روزہ تقریب کا انعقاد کیا گیا ۔ اس تقریب کا افتتاح ٹیکسٹائل کے مرکزی وزیر گری راج سنگھ ، مہمان خصوصی ڈاکٹر دلیپ کمار جیسوال ، نیشنل جوٹ بورڈ کے سکریٹری ششی بھوشن سنگھ ، جوٹ کارپوریشن آف انڈیا لمیٹڈ کے منیجنگ ڈائریکٹر سنجے کمار پانیگرہی ، ٹیکسٹائل کی مرکزی وزارت کی جوائنٹ سکریٹری پدمنی سنگلا ، ڈیولپمنٹ کمشنر امرت راج نے کیا ۔ بعد میں مہمانوں نے کتاب کا اجرا کیا ۔ اس موقع پر ہونہار طلباء کو بھی اعزاز سے نوازا گیا ۔ اس تقریب کا افتتاح کرنے والے ٹیکسٹائل کے مرکزی وزیر گری راج سنگھ نے کہا کہ جوٹ نہ صرف ماحول دوست ریشے ہے بلکہ یہ ملک کی معیشت کو مضبوط بنانے میں بھی اہم کردار ادا کر رہا ہے ۔ انہوں نے کہا کہ جوٹ ایک بہترین متبادل کے طور پر ابھر رہا ہے ۔ حکومت جوٹ کی صنعت کو فروغ دینے اور اس سے وابستہ کسانوں اور مزدوروں کے مفادات کے تحفظ کے لیے مسلسل کوششیں کر رہی ہے ۔ مرکزی وزیر نے بتایا کہ جوٹ کی مصنوعات کے استعمال کو بڑھانے کے لیے مختلف اسکیمیں چلائی جا رہی ہیں ، جس سے روزگار کے نئے مواقع پیدا ہو رہے ہیں اور ہندوستانی معیشت کو تقویت مل رہی ہے ۔ انہوں نے سبھی سے اپیل کی کہ وہ ماحولیاتی تحفظ کے لیے جوٹ کی مصنوعات کا زیادہ سے زیادہ استعمال کریں ۔ بہار حکومت کے صنعتوں کے وزیر جناب دلیپ کمار جیسوال نے کہا کہ ریاستی حکومت جوٹ کی صنعت کی حوصلہ افزائی ، مقامی کاریگروں کو روزگار فراہم کرنے اور چھوٹی صنعتوں کو بااختیار بنانے کے لیے مسلسل کوششیں کر رہی ہے ۔ صنعتوں کے وزیر نے مزید کہا کہ بہار میں جوٹ پر مبنی صنعتوں کی ترقی کی بے پناہ گنجائش ہے ۔ حکومت اس شعبے میں سرمایہ کاری کو راغب کرنے ، جدید ٹیکنالوجی اور بازار تک رسائی فراہم کرنے کے لیے منصوبہ بند طریقے سے کام کر رہی ہے ۔ نیشنل جوٹ بورڈ کے سکریٹری ششی بھوشن سنگھ نے انسٹی ٹیوٹ کی 15 سال کی کامیابیوں پر روشنی ڈالی ۔ انہوں نے ہندوستان میں جوٹ کے نیٹ ورک اور پیداوار پر تفصیل سے تبادلہ خیال کیا ۔ جوٹ کارپوریشن آف انڈیا لمیٹڈ کے منیجنگ ڈائریکٹر جناب سنجے کمار پانی گرہی نے آگے کے چیلنجوں اور مستقبل کے وژن پر تبادلہ خیال کیا ۔ یہ تقریب جوٹ کی صنعت کی اہمیت کو اجاگر کرتے ہوئے آتم نربھر بھارت کی سمت میں ایک اہم قدم ثابت ہوئی ۔ اس موقع پر ایک فیشن شو کا اہتمام کیا گیا جسے سامعین نے خوب سراہا ۔ اس پروگرام میں سائنسدانوں ، انجینئروں اور مختلف محکموں کے عہدیداروں نے شرکت کی ۔
