وائناڈ (سماج نیوز سروس) گزشتہ منگل کو کیرالہ کے وایناڈ ضلع میں میپاڈی کے قریب مختلف پہاڑی علاقوں میں لینڈ سلائیڈنگ نے بڑی تباہی مچائی تھی ۔ اس قدرتی آفت کی وجہ سے اب تک تقریباً 300 افراد ہلاک ہو چکے ہیں جب کہ 200 افراد لاپتہ ہیں۔ لینڈ سلائیڈنگ سے متاثرہ علاقوں میں فوج کا راحت اور بچاؤ کا کام جاری ہے۔اسی سلسلہ میں کانگریس لیڈر راہل گاندھی نے بھی جائے حادثہ پر جاکر متاثرین سے ملاقات کی۔ انہوں نے اس حادثہ میں ہلاک شدگان سے اظہار ہمدردی کیا اور زخمیوں کو ہر ممکن مدد کی یقین دہانی بھی کرائی۔ ذرائع کے مطابق اس درد ناک حادثہ میں تقریباً 300افراد ہلاک ہوچکے ہیں جب کہ 200 کے قریب افراد لاپتہ ہیں۔ متاثرین کی تعداد میں مسلسل اضافہ ہو ر ہا ہے ۔اس سلسلہ میں این ڈی آر ایف کے ڈی جی پیوش آنند نے کہا کہ ‘این ڈی آر ایف کی ٹیمیں بچاؤ کاموں میں مصروف ہیں۔ ہماری چار ٹیمیں وہاں موجود ہیں۔ ہم نے رسی ریسکیو تکنیک کا استعمال کرتے ہوئے لوگوں کو بچایا۔ ہندوستانی فوج اور فضائیہ بھی وہاں موجود ہے۔ فضائیہ نے بہت سے لوگوں کو بچایا ہے اور پھنسے ہوئے لوگوں کو کھانے پینے کی اشیاء بھی فراہم کی ہیں۔ ہم زیادہ سے زیادہ لوگوں کو بچانے کی پوری کوشش کر رہے ہیں۔
