ممبئی، 27 مارچ (یو این ائی) ونچیت بہوجن اگھاڑی کے سربراہ پرکاش امبیڈکر نے مہاوکاس اگھاڑی کو زبردست جھٹکا دیتے ہوئے کہا کہ ہم ایک نیا اتحاد بنا رہے ہیں۔ انھوں نے بالاخر آزادانہ طور پر لوک سبھا الیکشن لڑنے کا اعلان کردیاہے ۔ساتھ ہی انھوں نے ،ان حلقوں سے جہاں پہلے مرحلے میں ووٹنگ ہوگی اپنے 9 امیدواروں کے ناموں کا اعلان بھی کر دیا۔ پرکاش امبیڈکر نے کہا ہے کہ ہم یہ فیصلہ اس لیے لے رہے ہیں کیونکہ مہاوکاس اگھاڑی نے ہمارے موقف سے اتفاق نہیں کیا اور ہماری پیشکش کا مثبت کا جواب نہیں دیا ۔پرکاش امبیڈکر نے مراٹھا ریزرویشن لیڈر منوج جارنگے پاٹل کے ساتھ کل ہوئی میٹنگ کے بارے میں معلومات دیتے ہوئے کہا کہ ہم نے کل منوج جارنگے پاٹل کے ساتھ تفصیلی بات چیت کی، او بی سی کمیونٹی کو سیاسی نمائندگی نہیں دی گئی، ہم نے میٹنگ میں انہیں نمائندگی دینے پر بھی بات کی۔ اس کے علاوہ مسلم اور جین برادری کو حصہ دینے پر بھی بات چیت ہوئی۔لوک سبھا انتخابات کے پہلے مرحلے میں حق رائے دہی سے محروم بہوجن اگھاڑی کے امیدواروں کو جارنگ پاٹل کی حمایت حاصل ہے ۔ ہم ایک نیا اتحاد بنا رہے ہیں۔ ہم نے مہاویکاس اگھاڑی سے کہا تھا کہ آپ کو جارنگ پاٹل کو نظر انداز نہیں کرنا چاہئے ، لیکن انہوں نے اس پر توجہ نہیں دی وہ خاندانی حکمرانی کو بچانے کے لئے ونچیت اور بہوجنوں کا استعمال کر رہے ہیں، لہذا ہم ایک مختلف فیصلہ لے رہے ہیں، میں جانتا ہوں کہ اس فیصلہ پر بڑے پیمانے پر تنقید ہوگی ،تاہم میں لوگوں کی نبض سے بھی واقف ہوں ۔پرکاش امبیڈکر نے امیدواروں کی جو پہلی فہرست جاری کی ہے ان میں ، اکولہ سے پرکاش امبیڈکر، چندر پور سے راجیش بیلے ، بھنڈارا گونڈیا سے سنجے کیوت، گڈچرولی سے ہتیش مادھوی، بلڈھانہ سے وسنت مگر، وردھا سے راجندر سالونکے ، واشیم سے کھیم سنگھ پوار، امراوتی سے پراجکتا پیلیون شامل ہیں۔ اسی کے ساتھ پرکاش امبیڈکر ناگپور سے کانگریس امیدوار وکاس ٹھاکرے کی حمایت کریں گے ۔
