ہمیں یقیں ہے ہمارا قصور نکلے گا

ہمیں یقیں ہے ہمارا قصور نکلے گا
اسرائیل فلسطین جنگ اب ایک فیصلہ کن مرحلے پر پہنچ گئی ہے ۔غزہ کے سب سے بڑے ہسپتال پر حملہ کر کے جس طرح یہودیوں نے مسلمانوں کا قتل عام کیا ہے اسکے بعد بھی امریکہ سمیت یہودی لابی کے بہت سارے ممالک کا یہ کہنا کہ یہ حملہ اسرائیل نے نہیں کیا بلکہ حماس کے ذریعہ اسرائیل پر پھینکا گیا راکٹ تھا جو اپنے ٹارگیٹ سے بھٹک کر خود اس کے سب سے بڑے ہسپتال پر گر پڑا اور ابھی تک کا سب سے بڑا نقصان کر بیٹھا ۔اور کمال ہے کہ جب اسرائیل نے یہ کہانی سنائی تو بائیڈن نے اس کہانی پر نہ صرف یقین کیا بلکہ یو این او کے سلامتی کونسل میں اسرائیل کے حق میں ویٹو بھی کیا ۔لگے ہاتھوں میڈیا میں یہ خبر بھی آئی کہ امریکی صدر جو بائیڈن کی درخواست کے بعد اسرائیل ، مصر سے خوراک، پانی اور ادویات کی انسانی امداد نہیں روکے گا لیکن اگر حماس تک کوئی سپلائی پہنچائی گئی تو وہ اسے روک دے گا۔ اسرائیل نے ریڈ کراس سے غزہ میں اپنے یرغمالیوں تک سفر کا بھی مطالبہ کیا ہے۔ امریکی صدر جو بائیڈن بدھ کو اسرائیل پہنچے اور وزیر اعظم نیتن یاہو سے ملاقات کی۔ اس دوران جو بائیڈن نے کہا کہ مصر کو غزہ تک انسانی امداد پہنچانے کے لئے چھوٹ دی جانی چاہئے۔ اسرائیل نے اس پر اتفاق کیا۔ اسرائیلی پی ایم او کے بیان میں کہا گیا ہے کہ متعدد فیصلے متفقہ طور پر کئے گئے ہیں جن میں یرغمال شہریوں کا معاملہ بھی شامل ہے۔ بیان میں کہا گیا ہے کہ اسرائیل اپنی سرحد سے غزہ پٹی تک کسی بھی انسانی امداد کی اس وقت تک اجازت نہیں دے گا جب تک یرغمال شہریوں کی واپسی نہیں ہو جاتی ہے۔ اسرائیل نے کہا کہ حماس نے ہمارے معصوم شہریوں کو یرغمال بنا رکھا ہے۔ ان کیلئے ریڈ کراس کے دورے کا مطالبہ کیا جاتا ہے۔ اسرائیل اس مطالبے کے لیے وسیع بین الاقوامی حمایت حاصل کرنے کے لئے کام کر رہا ہے۔
اسرائیل نے کہا کہ امریکی صدر کی درخواست کے بعد یہ فیصلہ کیا گیا ہے کہ اسرائیل مصر سے انسانی امداد اس وقت تک نہیں روکے گا جب تک کہ یہ صرف جنوبی غزہ پٹی میں موجود شہری آبادی کے لئے خوراک، پانی اور ادویات ہے، جو وہاں سے نکل رہے ہیں، ان شہریوں کے لئے ہو گی۔ اسرائیل کا کہنا ہے کہ حماس تک پہنچنے والی کسی بھی سپلائی کو روک دیا جائے گا۔دوسری طرف اسرائیل اور حماس کے درمیان جاری جنگ کے دوران ایران نے مسلم ممالک کی تنظیم او آئی سی کی میٹنگ میں سبھی اراکین سے اسرائیل پر پوری طرح سے پابندی لگانے کی اپیل کی ہے ۔ ایران نے کہا کہ تنظیم کے ساتھ اراکین اسرائیل کے ساتھ تیل سمیت دیگر طرح کے سبھی کاروبار پر پابندی لگادیں ۔ ساتھ ہی جن اراکین ممالک کے اسرائیل کے ساتھ سفارتی تعلقات ہیں، وہ اسرائیلی سفارت کاروں کو برخاست کردیں۔دراصل منگل کو غزہ کے اسپتال پر حملہ کے بعد بدھ کو سعودی عرب کے جدہ شہر میں او آئی سی کی ایک ایمرجنسی میٹنگ بلائی گئی تھی ۔ اس میٹنگ میں ایران کے وزیرخارجہ شامل ہوئے اور اسرائیل پر پابندی لگانے کا مطالبہ کیا ۔ ادھر میٹنگ کے بعد او آئی سی کی جانب سے جاری بیان میں غزہ اسپتال میں ہوئے حملے کی سخت مذمت کی گئی ہے ۔ او آئی سی کی جانب سے اس کو ‘منظم ریاستی دہشت گردی اور ‘جنگی جرائم کا ایک معاملہ بتایا گیا ہے ۔ او آئی سی کی جانب سے بیان میں کہا گیا ہے کہ 57 اراکین ممالک نے فلسطینی شہریوں کے خلاف ہورہے جرائم اور خطرناک حملوں کا ذمہ دار اسرائیل کو مانا ہے ۔ یہ نہ صرف انسانی اقدار کے خلاف ہے بلکہ بین الاقوامی انسانی قوانین کی خلاف ورزی بھی ہے ۔ وہیں او آئی سی کی جانب سے بین الاقومی برادری اور یو این سیکورٹی کورنسل سے غزہ میں اسرائیل کی جانب سے ہورہے حملوں کو روکنے کیلئے مداخلت کرنے کی اپیل کی گئی ہے۔لیکن اس اپیل کا مطلب ہی کیا ہے جب اسرائیل کے خلاف کسی بھی اقدام کو امریکہ ویٹو کرنے کے لئے تیار بیٹھا ہے اور اس امریکہ سے تقریبا تمام عرب ممالک کی گاڑھی چھنتی ہے ۔
کل ملا کر 57کے 57مسلم ممالک کی جانب سے لوک لاج میں کچھ بیان تو آجا رہے ہیں لیکن عملی طور پر ان کا کوئی قدم ابھی تک نظر نہیں آ رہا ہے میری مراد ان عملی اقدام سے ہے جس سے غزہ کے مظلوم شہریوں کو فوری راحت ملے ۔سوشل میڈیا پر جو ویڈیو اور ان مظلوموں کی آہ و بکا وائرل ہو رہی ہیں اسے مسلم ممالک ہلکے میں نہ لیں ،کیونکہ یہ ان تمام ممالک اور باقی کے تمام دنیا کے مسلمانوں کے دلوں کو چھلنی کر رہے ہیں ۔اور یہ سارا غصہ نہ صرف امریکہ اور اسرائیل کے خلاف ہے بلکہ اب رفتہ رفتہ یہ غصہ مسلم ممالک کی طرف بھی منتقل ہو رہا ہے ۔خدانخواستہ اگر اس بے چینی نے مسلم ممالک میں بغاوت کی شکل اختیار کر لی تو وہ اور زیادہ پریشانی کا باعث ہو جائے گا لہذا یہی وقت ہے جب مسلم ممالک کو روایتی مصلحت کوشی کے پالنے سے نیچے اتر کر اسرائیل اور امریکہ سے فیصلہ کن گفتگو کرنی ہوگی ۔اگر اسرائیل کے تمام جنگی جرائم کو امریکہ اور اس کے حواری سمیت یو این او نے نظر انداز کرنے کا عہد لے لیا ہے تو پھر مسلم ممالک کو اس لابی سے کسی بھی قسم کے تعلقات رکھنے کی کیا ضرورت ہے ؟یہ سوال خود ان مسلم ممالک کے لوگ اور ساری دنیا کے مسلمان سربراہان عرب سے پوچھیںگے اور انہیں آج نہیں تو کل اس کا جواب دینا ہوگا ۔
(شعیب رضا فاطمی )