اسرائیلی فوج نے اعلان کیا کہ غرب اردن کےشمالی شہر جنین میں سڑک کے کنارے نصب بم پھٹنے کے نتیجے میں ایک اسرائیلی فوجی افسر ہلاک اور کم سے کم 16 زخمی ہوگئے۔
اسرائیلی چینل 12 نے جمعرات کو فوج کے حوالے سے ایک رپورٹ میں بتایا کہ اسرائیلی فورس کو صبح کے وقت جنین کیمپ پردھاوے کے دوران نشانہ بنایا گیا، جس کے نتیجے میں ایک افسر کی موت اور 16 دیگر فوجی زخمی ہوئے ہیں جن میں سے بعض کی حالت خطرے میں بیان کی جاتی ہے۔
چینل کے مطابق زیر زمین نصب دھماکہ خیز آلات کے دھماکے سے کیپٹن ایلون اسکاگیو ہلاک اور 16 فوجیوں زخمی ہوگئے۔
زخمیوں میں ایک سپاہی کی حالت تشویشناک ہے جب کہ پانچ کو درمیانے درجے کے زخم آئے ہیں اور ایک افسر اور ریزرو سپاہی سمیت 10 فوجی معمولی زخمی ہوئے ہیں۔
اسرائیلی چینل نےبتایا کہ فوجی آپریشن کے دوران فوج نے کیمپ میں حماس کے بنیادی ڈھانچے کو نشانہ بنایا تھا۔
فوج کی طرف سے جاری ایک بیان میں کہا گیا ہے کہ اسرائیلی فورس ایک ہی وقت میں کئی سمتوں سے جنین میں پناہ گزین کیمپ میں داخل ہوئی۔ اس دوران ڈی 9 ملٹری بلڈوزر کی مدد سے دھماکہ خیز مواد کی نشاندہی کے لیے سرچ آپریشن کیا گیا تھا مگر بلڈوزر اس بارود کے زیادہ گہرائی میں ہونے کی وجہ اس کی نشاندہی نہیں کرسکا۔
