خواتین ہر میدان میں نئی بلندیوں کو چھو رہی ہیں: مرمو

نئی دہلی، (یو این آئی) صدرجمہوریہ دروپدی مرمو نے کہا ہے کہ سیاست، سماجی خدمت، انتظامیہ اور کاروبار سمیت تمام شعبوں میں خواتین نئی بلندیوں کو چھو رہی ہیں۔محترمہ دروپدی مرمو اور دہلی کی وزیر اعلیٰ ریکھا گپتا نے پیر کو یہاں سشکت ناری سمردھ دلی کے دہلی حکومت کی خواتین سے متعلق چار اسکیموں کا آغاز کرنے کے بعد کہا کہ خواتین معاشرے کا ایک اہم حصہ ہیں۔ ان کا احترام اور بااختیار ہونا مہذب معاشرے کی نشانی ہے۔ ہندوستان کی تاریخ خواتین کی ہمت، بہادری اور قربانی کی ان گنت داستانوں سے بھری پڑی ہے۔ لوک ماتا اہلیہ بائی ہولکر کی موثر انتظامیہ، انصاف اور فلاحی کاموں کی اب بھی تعریف کی جاتی ہے۔ رانی لکشمی بائی کی ہمت اور مادر وطن کے لیے ان کی قربانی آج بھی ہمارے ہم وطنوں کے دلوں کو متاثر کرتی ہے۔ ساوتری بائی پھولے نے خواتین کی تعلیم کی شمع روشن کی تھی۔ انہوں نے کہا کہ آج خواتین ہر میدان میں کندھے سے کندھا ملا کر آگے بڑھ رہی ہیں۔ وہ فوجیوں کے طور پر ملک کی سرحدوں کی خدمت کر رہی ہیں۔ سائنسدانوں کے طور پر لیبارٹریوں میں تحقیق کر رہی ہیں اور کھیلوں کے مقابلوں میں بین الاقوامی سطح پر ہندوستانی پرچم کو بلند کر رہی ہیں۔ خواتین سیاست، سماجی خدمت، انتظامیہ اور کاروبار سمیت تمام شعبوں میں نئی بلندیوں کو چھو رہی ہیں۔انہوں نے کہا کہ ملک بھر میں کانووکیشنز میں ڈگریاں اور میڈل حاصل کرنے والے طلباء میں خواتین کی بڑھتی ہوئی تعداد ایک متاثر کن منظر پیش کرتی ہے۔صدر نے کہا کہ اس سب کے باوجود یہ بھی حقیقت ہے کہ خواتین کو تشدد، معاشی عدم مساوات، سماجی دقیانوسی تصورات اور صحت سے متعلق نظر اندازی کا سامنا ہے۔ خواتین کو بااختیار بنانے کا مقصد ان رکاوٹوں کو دور کرکے ہی حاصل کیا جاسکتا ہے۔ خواتین حقیقی معنوں میں بااختیار ہوں گی جب ان میں آزادانہ فیصلے کرنے کی صلاحیت ہو اور عزت نفس کے ساتھ زندگی گزارنے کی خواہش ہو اور مساوی مواقع اور تحفظ دستیاب ہو۔انہوں نے کہا کہ بااختیار خواتین نہ صرف اپنی زندگی بلکہ معاشرے اور آنے والی نسلوں کی سمت بھی بدل سکتی ہیں۔ بیٹی بچاؤ بیٹی پڑھاؤ اسکیم لڑکیوں کی تعلیم اور حفاظت کو فروغ دے رہی ہے۔ پردھان منتری اجولا یوجنا لاکھوں خواتین کو دھویں سے آزادی دلاتی ہے اور ان کی صحت کی حفاظت کر رہی ہے۔صدر نے جن چار اسکیموں کا آغاز کیا ان میں پنک اسمارٹ کارڈ، مفت ایل پی جی سلنڈر اسکیم، دہلی لکھپتی بٹیا یوجنا اور میری پونجی میرا ادھیکارشامل ہیں۔ راجدھانی کی خواتین رہائشیوں کے لیے نیشنل کامن موبلٹی کارڈ (این سی ایم سی) اسکیم کے تحت پنک کارڈ، دہلی کی رہائشی اہل خواتین کے لیے ہوگا، جب کہ بلیو کارڈ عام مسافروں کے لیے اور اورنج کارڈ ماہانہ پاس صارفین کو جاری کیا جائے گا۔ہولی اور دیوالی کے تہواروں پر دہلی کے راشن کارڈ رکھنے والے تمام خاندانوں کو ہر سال دو مفت ایل پی جی سلنڈر فراہم کرنے کی اسکیم شروع کی گئی جس کا فائدہ براہ راست بینیفٹ ٹرانسفر (ڈی بی ٹی) کے ذریعے تقسیم کیا جائے گا۔ یہ رقم ایک ایل پی جی سلنڈر کی موجودہ قیمت کے برابر ہوگی اور اس خاندان کے سربراہ کے آدھار سے منسلک بینک اکاؤنٹ میں جمع کی جائے گی جن کے نام پر راشن کارڈ جاری کیا گیا ہے۔ مزید برآں، دہلی لکھپتی بٹیا یوجنا کے تحت، لڑکی کے نام پر مختلف مراحل میں کل 56000 روپے جمع کیے جائیں گے۔