یمن جنگ سے پیچھاچھڑارہا ہے،سوڈان اس میں کود رہا ہے

گذشتہ چند ہفتوں کے دوران یمن میں حوثی باغی اور قانونی حکومت کے تحت افواج آٹھ سال سے جاری جنگ کے خاتمے کی امید میں اکٹھے ہوئے ہیں۔جیسے ہی سعودی سفیروں اور ان کے ایرانی "بھائیوں” نے رمضان کی دعوتوں کا تبادلہ کیا اور عرب لیگ نے شام کے بحران کے خاتمے پر تبادلہ خیال شروع کیا تو سوڈان (السودان)کی صورت حال دھماکے سے پھٹ پڑی۔سوڈانی فوج اورسریع الحرکت فورسز (آر ایس ایف) گروپ کے درمیان منگل کو لڑائی مسلسل چوتھے روز بھی جاری ہے(اوران سطور کی اشاعت کے وقت جمعرات کوبھی جنگ بندی کے باوجود جھڑپوں کی اطلاعات ملی ہیں)۔اگراس تنازع کا حل تلاش کرنا یا فوج کی طرف سے جنگ کا حل ناممکن ثابت ہوتا ہے تو ایسا لگتا ہے کہ ایک اورخونریزعرب محاذ پرجھڑپوں کا ایک اور موسم گرما انتظارکر رہا ہے۔
سوڈان پہلے ہی 80 کی دہائی کے اوائل سے تنازعات کے مختلف ادوارسے گزر چکا ہے۔جنوب میں، کوردوفان اور دارفور میں جنگوں کے ساتھ ساتھ عمرالبشیرحکومت کے خلاف بغاوت سے پیدا ہونے والے سماجی بحران اور تباہی کے بعد، سوڈان شاید ہی اپنی سرزمین پر ایک اور جنگ کا متحمل ہو سکے۔سابق مطلق العنان صدر عمرالبشیر کی معزولی کے بعد سے اندرون ملک اقتدارکے لیے لڑائی ایک طرح سے جاری ہے۔موجودہ کش مکش کوعمرالبشیرکے اقتدار کے خاتمے کے بعد کے تاخیری اثرات سمجھیں۔جب اقتدارکا مرکزٹوٹ جاتا ہے توایسا ہی ہوتا ہے،جس سے ایک خلاپیدا ہوتا ہے جسے پرکرنا مشکل ہوتا ہے۔جیسا کہ صدام حسین کے اقتدارکے خاتمے کے بعد عراق میں اور معمرقذافی کے بعد لیبیامیں دیکھا گیا تھا۔
سوڈان کے فوجی رہ نماؤ ں کے درمیان اختلافات کے اشارے شروع سے ہی واضح رہے ہیں۔دوحریف "سربراہان”عمرالبشیر کے متبادل کے طورپرابھرے تھےاور تقسیم نے فوج اورسڑکوں دونوں میں بحران سے نمٹنے کی صلاحیتوں کو مزید کمزورکردیا۔سوڈان کی صورت حال کیسے خراب ہوئی؟ اور ملک کے لیے کیا امکانات ہیں؟آر ایس ایف کی جانب سے جاری ہونے والے بیانات سے پتاچلتا ہے کہ محمد حمدان دقلو المعروف حمیدتی کے زیرقیادت فورسز نے پہلے آگ بھڑکائی۔انھوں نے مسلح افواج کی کمان کے ہیڈکوارٹراوراس کے سربراہ جنرل عبدالفتاح البرہان کے گھرکونشانہ بنایا۔انھوں نے کہا کہ ہفتے کی صبح حمیدتی کی افواج نے ان کے گھر پر حملے کرکے حیران کردیا ہے۔وہ البرہان کو قتل نہیں کر سکے، لیکن انھوں نے اس کے ترجمان سرکاری ٹی وی کو خاموش کر دیا، جس پرانھوں نے براہ راست نیوزبلیٹن کے دوران میں بمباری کی۔ عبدالفتاح البرہان اوران کے ساتھی فوجی رہ نماؤ ں کی دو دن کی حیران کن غیر موجودگی نے حمیدتی کے بیانیے کو پوراکیا کہ ان کی افواج نے البرہان کو قتل کردیا ہے۔
اس کے بعدآرایس ایف نے فوجی رہ نماؤ ں کے مضبوط ٹھکانوں اورخرطوم ہوائی اڈے پرچھاپہ مارکارروائی کی اور سعودی عرب سمیت متعدد ممالک کے طیاروں کوآگ لگا دی اور عمارتوں کوبمباری سے نقصان پہنچایا۔خرطوم کے ہوائی اڈے کونقصان پہنچانے کے فوری بعد،آرایس ایف نےمیروی کے ہوائی اڈے پرقبضہ کر لیا، جو مصر کے قریب ملک کے شمال میں واقع ہے اور فراعنہ دور کےاہرام اور چینی ساختہ ڈیم کے لیے جانا جاتا ہے۔آر ایس ایف نے مصری فوج کے ان ارکان کو بھی گرفتارکرلیا جو سوڈانی فوج کے ساتھ مشترکہ مشقوں میں حصہ لے رہے تھے۔سوڈان ایک وسیع اور متنوع ملک ہے اوربرسرزمین آزاد صحافیوں کی کمی کی وجہ سے زیادہ ترمعلومات کی تصدیق نہیں کی جاسکتی ہے۔مرکزی دھارے کے میڈیا کے چند ادارے بیانات اور ویڈیوزکو دستاویزی شکل دے رہے ہیں اوران کا جائزہ لےرہے ہیں اور زمینی صورت حال کی کوریج کے لیے ٹیمیں بھیج رہے ہیں، لیکن ایسا لگتا ہے کہ واقعات اتنی تیزی سے اور بڑے پیمانے پر رونما ہورہے ہیں کہ ان کا مکمل احاطہ نہیں کیا جاسکتا۔
اقتدارپرقابض ہونے کے لیے جنرل حمیدتی کی جارحیت حیرت انگیز نہیں تھی۔ فوج کے ساتھ ان کے جھگڑے کا دھماکاممکنہ طورپران کے حملے سے پہلے باہمی اختلافات اورعوامی دھمکیوں کا پیش خیمہ تھا۔حملے سے چندروزقبل حمیدتی کے تحت سریع الحرکت فورسز نے دارالحکومت اور دیگر شہروں میں متحرک ہونے کی کوششیں تیزکردی تھیں جبکہ فوج نےآرایس ایف کوخبردارکیا تھاکہ وہ سرحد پر اپنی پوزیشنوں پرواپس آجائے،لیکن حمیدتی کے فوجیوں نے اس بہانے جھکنے سے انکارکردیا کہ وہ "انسانی اسمگلنگ اورمنظم جرائم کا مقابلہ کرنے” کے لیے اپنے فرائض انجام دے رہے ہیں۔اب یہ واضح ہے کہ وہ عبدالفتاح البرہان پر حملہ کرنے کی تیاری کررہے تھے جن کی افواج حمیدتی کے ساتھ تنازع کے باوجود جنگ کے لیے تیار نہیں تھیں۔
صفرگھنٹاکیوں کام کرتا ہے؟ کیا یہ واقعی بغاوت تھی؟ ملک بھرکے واقعات کو دیکھتے ہوئے، یہ واضح ہے کہ یہ صرف طاقت اور سمجھوتے کا مظاہرہ نہیں ہے۔کیایہ تبدیلی کی کوشش ہے؟ کیا باغیوں کو فوج کے اندر تبدیلیوں یا شاید عوامی حمایت کی توقع تھی؟ یہ ابھی تک واضح نہیں،لیکن آنے والے واقعات کو سمجھنے کے لیے ان کے ارادوں کو سمجھنا ضروری ہے۔مصالحت اب بھی ممکن ہے اگریہ محض ایک غلط فہمی ہے جو قابو سے باہرہو گئی ہے۔ لیکن اگر اس حملے کا مقصد دانستہ طور پر بغاوت تھا، تو یہ ممکنہ طورپرایک طویل لڑائی کا آغاز ہے۔کیا اس حملے کی کوئی اندرونی یا بیرونی توسیع ہے؟ کیا مقامی افواج غیرجانبداری میں متحد ہوں گی یا وہ کسی کا ساتھ دیں گی؟سوڈان آج سڑک پرایک خطرناک دوراہےپرکھڑا ہے:یا تودونوں متحارب فریقوں کے درمیان مصالحت، یا ایک بڑھتا ہوابحران،جو ملک کی باقیات کو کھا جائے گا،اس طرح سوڈانی عوام کے مصائب میں اضافہ ہوگا اورایک ایسے خطے میں کشیدگی میں اضافہ ہوگا جومقناطیس کی طرح تناؤ کو اپنی طرف راغب کرتا ہے۔
وہیںامریکی قومی سلامتی کے مشیر جیک سلیوان نے پیر کو اعلان کیا تھا کہ واشنگٹن نے سوڈان میں جنگ بندی کے حوالے سے کئی مذاکرات کیے ہیں۔ اپنی پریس کانفرنس میں انہوں نے یہ بھی کہا کہ سوڈان میں امن فوج کی تعیناتی کا ابھی کوئی منصوبہ نہیں ہے۔ ہم فی الحال سوڈان سے انخلاءپر توجہ مرکوز کر رہے ہیں۔ان کے بیان سے ظاہر ہوتا ے کہ امریکہ کے پاس خرطوم میں اپنے سفارت خانے کی حفاظت کا منصوبہ ہے۔جیک سلیوان نے مزید بتایا کہ امریکی صدر جو بائیڈن نے سوڈانی بحران میں کسی بھی ہنگامی صورتحال کے پیش نظر فوجی تعیناتی کی درخواست کی تھی۔ سلیوان نے زور دے کر کہا کہ سوڈان میں تنازعہ کے دو فریق یعنی فوج اور ریپڈ سپورٹ فورسز شہریوں کی حفاظت کے ذمہ دار ہیں۔اس سے قبل پیر کے روز امریکی وزیر خارجہ بلنکن نے کہا تھا کہ امریکہ سوڈانی فوجی رہنماؤ ں کے ساتھ قریبی رابطے میں ہے اور ان پر جنگ بندی میں توسیع کے لیے دباؤ ڈال رہا ہے۔ سوڈان کی سفارتی اور قونصلر موجودگی کو جلد از جلد بحال کرنے کے لیے آپشنز تلاش کی جارہی ہے۔یہ بیانات ایسے وقت میں سامنے آئے ہیں جب ریپڈ سپورٹ فورسز کے کمانڈر فارس النور کے سیاسی مشیر نے کہا ہے کہ مذاکرات کی بات کرنے سے قبل جنگ بندی پہلی شرط ہے۔
العربیہ یا الحدث کو دیے گئے بیانات میں انھوں نے کہا کہ ہم لڑائیوں میں پیش رفت کے باوجود لوگوں کی خاطر جنگ بندی کا مطالبہ کر رہے ہیں۔ ریپڈ سپورٹ فورسز نے خود کو فوج کے متبادل کے طور پر پیش نہیں کیا بلکہ ہم فوج کی اصلاح کرنا چاہتے ہیں۔واضح رہے عبدالفتاح البرہان کی سربراہی میں فوج اور محمد حمدان دقلو کی زیر قیادت ریپڈ سپورٹ فورسز کے درمیان یہ لڑائی عمر البشیر کی معزولی کے چار سال بعد 15 اپریل کو خرطوم اور ملک کے دیگر حصوں میں شروع ہوئی تھی۔ عمر البشیر کی حکومت کو 2019 میں ایک عوامی بغاوت کے ذریعہ ختم کیا گیا تھا۔لڑائی کے دونوں فریق تقریباً 3 سال تک اقتدار میں شریک رہے۔ تاہم حال ہی میں ایک سویلین حکومت بنانے اور ریپڈ سپورٹ فورسز کو مسلح افواج میں ضم کرنے کے منصوبے پر بات چیت کے دوران دونوں کے درمیان اختلافات شدت اختیار کر گئے ہیں اور بات لڑائی تک پہنچ گئی ہے۔