سنگاپور/لکھنؤ:(یو این آئی) وزیر اعلیٰ یوگی آدتیہ ناتھ کی قیادت میں اتر پردیش نے سنگاپور کے سرکاری دورے کے پہلے دن سرمایہ کاری اور ہنرمندی کے فروغ کے شعبوں میں نمایاں کامیابیاں حاصل کیں۔ سرکاری ملاقاتوں اور سرمایہ کاروں سے تبادلہ خیال کے دوران متعدد بین الاقوامی اداروں اور کمپنیوں نے ریاستی حکومت کے ساتھ مفاہمت ناموں پر دستخط کیے۔ دورے کے دوران وزیر اعلیٰ یوگی آدتیہ ناتھ نے سنگاپور کے وزیر اعظم لارنس وونگ سے خیرسگالی ملاقات کی۔ اس موقع پردوطرفہ اقتصادی اوراسٹریٹجک تعاون کو مزید مضبوط بنانے پر تبادلہ خیال کیا گیا۔ وزیراعلیٰ نے سنگاپور کے آئی ٹی ای کالج سینٹرل میں مفاہمت ناموں پر دستخط کے پروگرام میں بھی شرکت کی، جسے تکنیکی و پیشہ ورانہ تعلیم، ہوا بازی کی مہارتوں اورانڈسٹری سے ہم آہنگ ٹریننگ کے میدان میں اہم پیش رفت قرار دیا جا رہا ہے۔ یہ اقدامات اتر پردیش کے تیزی سے فروغ پاتے بنیادی ڈھانچے اور روزگار کے نظام کو تقویت فراہم کریں گے۔ وزیر اعلیٰ نے کالج کیمپس اور ایوی ایشن ہب کا معائنہ بھی کیا تاکہ انڈسٹری سے مربوط ٹریننگ کے عالمی معیارات کا جائزہ لیا جا سکے۔ سرکاری ذرائع نے پیر کو بتایا کہ پہلے دن مجموعی طور پر 19,877 کروڑ روپے کی سرمایہ کاری کی تجاویز پر اتفاق کیا گیا، جنہیں ریاستی معیشت کو مضبوط بنانے اور روزگار کے مواقع پیدا کرنے کے لیے اہم قرار دیا جا رہا ہے۔ اس موقع پر وزیر اعلیٰ نے سرمایہ کاروں کو یقین دلایا کہ اتر پردیش حکومت شفاف پالیسی، فوری منظوریوں اور بہتر بنیادی سہولیات کی فراہمی کے لیے پرعزم ہے۔ دستخط شدہ مفاہمتی یادداشتوں میں یونیورسل سکسس گروپ کی جانب سے 6,650 کروڑ روپے کی سرمایہ کاری کی تجویز شامل ہے، جو گروپ ہاؤسنگ، لاجسٹکس پارک اور ڈیٹا سینٹر منصوبوں پر مشتمل ہے۔ ان منصوبوں سے شہری ترقی، صنعتی سرگرمیوں اور ڈیجیٹل بنیادی ڈھانچے کو نئی رفتار ملنے کی توقع ہے۔ اسی طرح گولڈن اسٹیٹ کیپیٹل نے اتر پردیش میں 100 میگاواٹ صلاحیت کے ڈیٹا سینٹر کے قیام کے لیے 8,000 کروڑ روپے کی سرمایہ کاری کا اعلان کیا ہے۔ اس منصوبے کو ریاست کو ملک کے نمایاں ڈیٹا سینٹر مرکز کے طور پر قائم کرنے کی سمت ایک اہم قدم قرار دیا جا رہا ہے۔ پرائیویٹ انفراسٹرکچر ڈیولپمنٹ گروپ نے 2,500 کروڑ روپے کی سرمایہ کاری کے ساتھ قابل تجدید توانائی، گرین ہائیڈروجن اورایگری سولر منصوبوں کے لیے مفاہمت ناموں پر دستخط کیے۔ اس کے علاوہ اے وی پی این لمیٹڈ نے بھی قابل تجدید توانائی اور ایگری پی وی شعبوں میں 2,727 کروڑ روپے کی سرمایہ کاری کے عزم کا اظہار کیا ہے۔ ان اقدامات سے اتر پردیش کے گرین انرجی اہداف کو تقویت ملے گی۔ سرمایہ کاری کے ساتھ ساتھ دورے کے پہلے دن فروغ ہنرمندی پر بھی خصوصی توجہ دی گئی۔ آئی ٹی ای ایجوکیشن سروسز کے ساتھ تکنیکی و پیشہ ورانہ تعلیم و تربیت کے فروغ کے لیے تعاون کا معاہدہ طے پایا۔ اس شراکت کے تحت آئی ٹی ای ای ایس تعلیمی ترقی، بنیادی ڈھانچے کی بہتری، قیادت اور استعداد سازی، آئی ایس کیو سرٹیفکیشن اورمیعار کی یقین دہانی جیسے شعبوں میں تکنیکی تعاون فراہم کرے گا۔
