گڑچرولی میں 5 دہائیوں کے بعد پہلی بار نکسل سے پاک دیوالی منائی گئی

گڑچرولی (یو این آئی) نکسل تشدد کے 5 دہائیوں سے زیادہ عرصے کے بعد ایک تاریخی سنگ میل عبور کرتے ہوئے مہاراشٹر کے گڑچرولی ضلع میں پہلی بار نکسل سے پاک دیوالی منائی گئی۔ اس موقع پر بندوقوں کی گولیوں کی آوازوں کی جگہ پٹاخوں کی گونج سنائی دی اور خوف و دہشت کا ماحول امن اور خوشی میں بدل گیا۔ضلع کے تمام 70 پولیس اسٹیشنوں، چوکیوں اور پولیس امدادی مراکز میں اتوار کو پولیس سپرنٹنڈنٹ ایم رامیش کی رہنمائی میں دیوالی کی تقریبات منعقد کی گئیں۔ یہ تقریبات مئی 2026 میں گڑچرولی پولیس کی جانب سے شروع کیے گئے ‘آپریشن انتم پرہار’ کی کامیابی کے بعد منعقد کی گئیں، جس نے ضلع میں نکسل سرگرمیوں کو بڑا دھچکا پہنچایا تھا۔

اس مہم کے تحت پولیس سپرنٹنڈنٹ ایم رامیش نے دور دراز واقع بیناگنڈا پولیس امدادی مرکز میں گاؤں والوں اور پولیس اہلکاروں کے ساتھ دیوالی منائی۔ ایڈیشنل پولیس سپرنٹنڈنٹ (آپریشنز) کارتک مدھیرا نے گڑدیواڑا میں، ایڈیشنل پولیس سپرنٹنڈنٹ (انتظامیہ) گوکل راج جی نے پینڈھری میں اور ایڈیشنل پولیس سپرنٹنڈنٹ، اہیری، ہرش وردھن بی جے نے جیمل گٹہ میں دیوالی منائی۔امن، تحفظ اور ترقی کا پیغام عام کرنے کے لیے کئی دور دراز علاقوں کے لوگوں میں مٹھائیاں اور پٹاخے تقسیم کیے گئے۔

سماج میں دوبارہ گھلنے ملنے کی کوششوں کے تحت پولیس افسران نے گڑچرولی کی نو جیون بستی میں خودسپردگی کرنے والے ماؤ نوازوں کے ساتھ بھی دیوالی منائی۔سابق ماؤ نوازوں کو مٹھائیاں اور پٹاخے دیے گئے، جبکہ سینئر پولیس افسران نے ان سے بات چیت کی اور ان کے ساتھ دیوالی کے روایتی پکوان بھی کھائے، تاکہ ان کا اعتماد بڑھایا جا سکے اور انہیں سماج کے مرکزی دھارے میں شامل ہونے کی ترغیب دی جا سکے۔

پولیس نے دور دراز اور خشک سالی سے متاثرہ علاقوں کے ضرورت مند کسان خاندانوں کی بھی مدد کی۔ پولیس دادالورا کھڑکی، پروجیکٹ کرشی سمردھی، سیوا متر منڈل اور پونے کے آدرش متر منڈل کی مشترکہ پہل کے تحت ان خاندانوں میں اناج اور دیوالی کے روایتی پکوان تقسیم کیے گئے۔پولیس سپرنٹنڈنٹ ایم رامیش نے کہا کہ نکسل سے پاک گڑچرولی کی تعمیر میں سماجی ہم آہنگی، عوامی شراکت داری اور لوگوں کا اعتماد بھی اتنا ہی اہم ہے جتنا کہ حفاظتی انتظامات۔

انہوں نے اعتماد ظاہر کیا کہ اس طرح کی کوششوں سے پولیس اور عوام کے درمیان تعلقات مزید مضبوط ہوں گے اور ضلع کو ایک پُرامن، محفوظ اور ترقی یافتہ علاقے میں تبدیل کرنے میں مدد ملے گی۔ان تقریبات سے گڑچرولی کے دور دراز علاقوں میں ایک بڑی تبدیلی کا اظہار ہوا ہے، جہاں کئی دہائیوں سے جاری تشدد اور خوف کی جگہ اب آہستہ آہستہ امن اور ترقی کی نئی امیدیں جنم لے رہی ہیں۔