قومی خبریں

راجیہ سبھا رکن رام راؤ واڈکوٹے کا انتقال، وزیر اعظم اور نائب صدر جمہوریہ کا اظہارِ تعزیت

نئی دہلی،  (یواین آئی) راجیہ سبھا میں مہاراشٹر کی نمائندگی کرنے والے بھارتیہ جنتا پارٹی (بی جے پی) کے لیڈر رام راؤ سکھا رام واڈکوٹے کا نئی دہلی کے ایک اسپتال میں دورانِ علاج انتقال ہو گیا۔ ان کی عمر 72 برس تھی۔خاندانی ذرائع کے مطابق مسلسل کھانسی کی شکایت کے بعد 20 نومبر کو انہیں آل انڈیا انسٹی ٹیوٹ آف میڈیکل سائنسز (ایمس) میں داخل کرایا گیا تھا اور آدھی رات کے قریب ان کا انتقال ہو گیا۔مسٹر واڈکوٹے مہاراشٹر کے پربھنی ضلع کے رہنے والے تھے اور رواں سال اپریل میں راجیہ سبھا کے لیے منتخب ہوئے تھے۔ اس سے قبل وہ 2014 سے 2019 تک مہاراشٹر قانون ساز کونسل کے رکن رہے تھے۔
راجیہ سبھا کے چیئرمین سی پی رادھا کرشنن، وزیر اعظم نریندر مودی اور مہاراشٹر کے وزیر اعلیٰ دیویندر فڑنویس نے ان کے انتقال پر گہرے رنج و غم کا اظہار کیا ہے۔مسٹر رادھا کرشنن نے کہا، “راجیہ سبھا رکن رام راؤ سکھا رام واڈکوٹے جی کے انتقال سے گہرا صدمہ پہنچا ہے۔ عوامی زندگی میں ان کے تعاون اور خدمات کو ہمیشہ یاد رکھا جائے گا۔ ان کے اہل خانہ، دوستوں اور حامیوں سے میری دلی تعزیت ہے۔ ایشور انہیں غم کی اس گھڑی کو برداشت کرنے کی ہمت عطا کرے۔”
وزیر اعظم نریندر مودی نے بھی ان کے انتقال پر تعزیت کا اظہار کرتے ہوئے کہا کہ سماج میں مسٹر رام راؤ واڈکوٹے جی کے تعاون اور غریبوں و محروموں کی خدمت پر ان کی توجہ کو ہمیشہ یاد رکھا جائے گا۔ وزیر اعظم نے سوشل میڈیا پلیٹ فارم ‘ایکس’ پر لکھا، “راجیہ سبھا رکن مسٹر رام راؤ واڈکوٹے جی کے انتقال سے شدید دکھ ہوا۔ سماج میں ان کی خدمات اور غریبوں و محروم طبقات کی فلاح و بہبود پر ان کے زور کے لیے انہیں ہمیشہ یاد رکھا جائے گا۔ مہاراشٹر میں بی جے پی کو مضبوط بنانے کے لیے ان کی کوششیں بھی خاص طور پر قابلِ ذکر تھیں۔ میری تعزیت ان کے اہل خانہ اور مداحوں کے ساتھ ہے۔”
مہاراشٹر کے وزیر اعلیٰ دیویندر فڑنویس نے تعزیت کا اظہار کرتے ہوئے انہیں ایک ایسے سادہ اور وقف شدہ لیڈر کا رخصت ہونا قرار دیا جن کی زمینی سطح پر عوامی فلاح و بہبود کے لیے گہری وابستگی تھی۔