اداریہ ؍مضامین

تعلیم کا نظام یا امتحانوں کی صنعت؟

اسکول اور کالج کی تعلیم اگر مقابلہ جاتی امتحانات میں کامیابی کی ضمانت نہیں بن سکتی تو پھر سوال صرف نصاب کا نہیں، پورے تعلیمی نظام کی افادیت کا ہے۔

سپریم کورٹ کے سینئر وکیل اشونی اپادھیائے نے ہندوستان کے تعلیمی نظام پر سوال اٹھاتے ہوئے جو بات کہی ہے، وہ محض ایک وکیل کا تبصرہ نہیں بلکہ ملک کے کروڑوں طلبہ، والدین اور نوجوانوں کے دلوں میں اٹھنے والی اس بے چینی کی ترجمانی ہے جس کا جواب آزادی کے تقریباً آٹھ دہائیوں بعد بھی حکومتوں کے پاس نہیں ہے۔ ان کا سوال بظاہر بہت سادہ ہے کہ اسکولوں اور کالجوں میں جو کچھ پڑھایا جاتا ہے، وہ JEE، NEET، NDA، CLAT، IAS اور PCS جیسے مقابلہ جاتی امتحانات میں کیوں کام نہیں آتا؟ اور ان امتحانات میں جس نوعیت کے سوالات پوچھے جاتے ہیں، انہیں باقاعدہ تعلیمی نصاب کا حصہ کیوں نہیں بنایا جاتا؟
یہ سوال دراصل ہندوستان کے تعلیمی نظام کی بنیادوں کو جھنجھوڑنے والا ہے۔ اگر ایک طالب علم بارہ برس اسکول میں اور مزید تین چار برس کالج میں گزارنے کے باوجود کسی داخلہ یا ملازمت کے امتحان میں کامیابی کے لیے الگ سے کوچنگ اداروں کا محتاج ہے تو ہمیں یہ تسلیم کرنا ہوگا کہ ہماری رسمی تعلیم اور عملی ضرورتوں کے درمیان ایک گہری خلیج پیدا ہوچکی ہے۔ یہ خلیج محض طلبہ کی قابلیت کا مسئلہ نہیں، بلکہ تعلیمی پالیسی، نصاب سازی، تدریسی معیار اور حکومتی ترجیحات کا سوال ہے۔
آزادی کے بعد ہندوستان نے تعلیم کے میدان میں کئی کمیشن بنائے، کئی پالیسیاں تیار کیں اور کئی مرتبہ تعلیمی ڈھانچے کو بدلنے کے دعوے کیے۔ 1968 کی قومی تعلیمی پالیسی، 1986 کی پالیسی اور پھر 2020 کی نئی تعلیمی پالیسی اس سلسلے کی اہم کڑیاں ہیں۔ اس لیے یہ کہنا درست نہیں ہوگا کہ ملک میں تعلیمی پالیسی کبھی بنی ہی نہیں، لیکن یہ ضرور کہا جاسکتا ہے کہ پالیسیوں کے اعلانات اور زمینی سطح پر ان کے نفاذ کے درمیان ہمیشہ ایک بڑا فاصلہ رہا ہے۔اس پورے عرصے میں ایک بنیادی سوال مسلسل نظرانداز ہوتا رہا کہ تعلیم کا مقصد آخر ہے کیا؟ کیا تعلیم صرف ڈگری حاصل کرنے، کسی طرح امتحان پاس کرنے اور سرکاری ملازمت کے حصول کا ذریعہ ہے یا اس کا مقصد ایک باشعور، خودمختار، ہنرمند اور سماج کی تعمیر میں حصہ لینے والا شہری تیار کرنا بھی ہے؟ بدقسمتی سے ہمارے یہاں تعلیم کا نظام بڑی حد تک ڈگریوں اور اسناد کے حصول تک محدود ہوکر رہ گیا ہے۔ اسکولوں میں ایک نصاب پڑھایا جاتا ہے، کالجوں میں دوسرا تعلیمی تجربہ ملتا ہے اور روزگار یا اعلیٰ تعلیم کے دروازے پر پہنچتے ہی طالب علم کو ایک بالکل الگ امتحانی دنیا کا سامنا کرنا پڑتا ہے۔یہی وہ مقام ہے جہاں کوچنگ انڈسٹری کی ضرورت پیدا ہوتی ہے۔ اگر اسکول کی تعلیم ہی JEE اور NEET جیسے امتحانات کی بنیادی تیاری کرانے کے قابل ہو، اگر کالجوں میں داخلے کے لیے درکار علمی صلاحیتیں باقاعدہ تدریس کے ذریعے پیدا کی جائیں اور اگر سول سروسز کے امتحانات کے لیے طلبہ کو بنیادی طور پر اپنے تعلیمی اداروں سے رہنمائی مل سکے تو پھر لاکھوں روپے خرچ کرکے کوچنگ لینے کی مجبوری کیوں باقی رہے؟ کوچنگ کا وجود بذات خود مسئلہ نہیں، مسئلہ اس وقت پیدا ہوتا ہے جب وہ معیاری تعلیم کا متبادل بن جائے اور کامیابی کا راستہ صرف ان لوگوں کے لیے کھلے جو اس کی بھاری فیس ادا کرسکتے ہیں۔
تعلیم کے اس بحران کا ایک دوسرا اور زیادہ تشویش ناک پہلو اس کی بڑھتی ہوئی نجکاری ہے۔ 1991 کی معاشی اصلاحات کے بعد نجی یونیورسٹیوں اور خود مالیاتی تعلیمی اداروں کی تعداد میں اضافہ ہوا۔ اس اضافے نے اعلیٰ تعلیم کے مواقع ضرور بڑھائے، لیکن اس کے ساتھ تعلیم کی بڑھتی ہوئی قیمت، معیار میں تفاوت اور معاشی حیثیت کی بنیاد پر تعلیمی مواقع کی تقسیم جیسے سوالات بھی پیدا ہوئے۔
آج صورت حال یہ ہے کہ معیاری تعلیم، اچھے اسکول، بہتر کالج، پیشہ ورانہ کورسز اور مقابلہ جاتی امتحانات کی تیاری، سب ایک مہنگے بازار کا حصہ بنتے جارہے ہیں۔ ایک طرف وہ بچے ہیں جن کے والدین بڑی فیس، کوچنگ اور مہنگے تعلیمی وسائل کا خرچ برداشت کرسکتے ہیں، دوسری طرف وہ نوجوان ہیں جن کے پاس صلاحیت تو ہے مگر وسائل نہیں۔ یوں تعلیم جو سماجی نابرابری ختم کرنے کا سب سے بڑا ذریعہ ہونی چاہیے تھی، خود بعض حالات میں نابرابری کو مزید گہرا کرنے کا سبب بنتی جارہی ہے۔
اس بازار میں تعلیمی مافیا گیری کے لیے بھی جگہ بنتی ہے۔ بڑے بڑے کوچنگ اداروں کی تشہیر، کامیابی کے دعوے، داخلوں کی دوڑ، بھاری فیس اور امتحانات کے گرد قائم کاروباری مفادات نے تعلیم کے بنیادی مقصد کو پس منظر میں دھکیل دیا ہے۔ یہ کہنا درست نہیں ہوگا کہ ہر نجی ادارہ یا ہر کوچنگ سینٹر اس کاروباری دوڑ کا حصہ ہے، لیکن یہ حقیقت نظرانداز نہیں کی جاسکتی کہ جب تعلیم کا معیار طالب علم کی صلاحیت کے بجائے اس کی ادائیگی کی قوت سے جڑنے لگے تو پورے نظام پر سوال اٹھنا لازمی ہے۔
حکومتیں بھی اس صورت حال سے پوری طرح بری الذمہ نہیں ہوسکتیں۔ قومی تعلیمی پالیسی 2020 میں تعلیم پر مجموعی سرکاری اخراجات کو جی ڈی پی کے چھ فیصد تک پہنچانے کا ہدف رکھا گیا تھا، لیکن وزارت تعلیم نے راجیہ سبھا میں مارچ 2026 میں بتایا کہ دستیاب تازہ ترین بجٹ تخمینوں، یعنی 2022-23 کے مطابق، مرکز اور ریاستوں کا مجموعی تعلیمی خرچ جی ڈی پی کا محض 4.06 فیصد تھا۔ جب تعلیم کے شعبے میں سرکاری سرمایہ کاری ہی مطلوبہ سطح تک نہ پہنچ سکے تو سرکاری اداروں کے معیار، اساتذہ کی دستیابی، تحقیقی سہولتوں اور بنیادی ڈھانچے کے بارے میں سوال اٹھنا فطری ہے۔
یہاں ایک اور اہم سوال بھی ہے۔ آخر ہمارے تعلیمی ادارے طلبہ کو زندگی کے لیے تیار کیوں نہیں کرتے؟ انہیں صرف امتحان میں نمبر حاصل کرنے کی مشین کیوں بنایا جارہا ہے؟ اسکول کی تعلیم میں تنقیدی فکر، تحقیق، سائنسی مزاج، زبان و بیان، عملی ہنر اور روزگار کی بنیادی صلاحیتوں کو وہ مقام کیوں نہیں ملتا جو ملنا چاہیے؟ ۔
اشونی اپادھیائے کے بیان نے اسی بنیادی تضاد کو اجاگر کیا ہے۔ ان کا یہ کہنا کہ موقع ملنے پر وہ سب سے پہلے ہندوستان کا تعلیمی نظام بدلیں گے، اپنی جگہ ایک سیاسی و سماجی تبصرہ ہے، لیکن اس بیان سے اٹھنے والے سوالات کسی ایک شخص یا جماعت کے نہیں بلکہ پورے ملک کے ہیں۔ تعلیم جیسے بنیادی شعبے کو حکومتوں کی سیاسی ترجیحات، انتخابی وعدوں اور وقتی تجربات سے بالاتر ہوکر دیکھنے کی ضرورت ہے۔
سب سے اہم بات یہ ہے کہ تعلیم کو بازار کی جنس بننے سے بچانا ہوگا۔ کسی ملک کا مستقبل اس بات سے طے نہیں ہوتا کہ اس کے کتنے طلبہ نے مہنگے کوچنگ اداروں میں داخلہ لیا، بلکہ اس سے طے ہوتا ہے کہ اس کے عام سرکاری اسکول میں پڑھنے والے بچے کو بھی آگے بڑھنے کے وہی مواقع میسر ہیں یا نہیں جو کسی مہنگے نجی اسکول کے طالب علم کو حاصل ہیں۔آزادی کے تقریباً اسی برس بعد بھی اگر ایک غریب باپ اپنے ہونہار بچے کو صرف اس لیے ڈاکٹر یا انجینئر بنانے کا خواب چھوڑ دے کہ وہ کوچنگ کی لاکھوں روپے کی فیس ادا نہیں کرسکتا تو یہ محض اس خاندان کی محرومی نہیں بلکہ ہمارے تعلیمی نظام کی ناکامی کا ایک بڑا سوال ہے۔
آخر ہم کیسا ہندوستان تعمیر کرنا چاہتے ہیں؟ ایسا ہندوستان جہاں قابلیت کامیابی کی ضمانت ہو یا ایسا ہندوستان جہاں کامیابی کے لیے پہلے قابلیت سے زیادہ پیسہ درکار ہو؟
تعلیم کے نظام کو بدلنے کی بحث اب محض اصلاحات کی بحث نہیں رہی، یہ ملک کے نوجوانوں کے مستقبل، سماجی انصاف اور ہندوستان کے جمہوری وعدے کو بچانے کا سوال بن چکی ہے۔