پٹنہ، 17 مئی :وزیر اعلیٰ نتیش کمار نے آج جی پی او، پٹنہ کے قریب نو تعمیر شدہ کثیرمنزلہ پارکنگ عمارت (ملٹی ماڈل ہب) اور پٹنہ جنکشن تک زیر زمین راستہ (سب وے) کے نام کی تختی کی نقاب کشائی اور ربن کاٹ کر افتتاح کیا ۔ ریموٹ کے ذریعے نو تعمیر شدہ کثیرمنزلہ پارکنگ عمارت (ملٹی ماڈل ہب) سے بسوں اور مسافر گاڑیوں کے چلانے کا وزیر اعلیٰ نے افتتاح کیا۔ افتتاح کے بعد نو تعمیر شدہ زیر زمین پیدل مسافروں کے چلنے کے راستہ (سب وے) کا وزیر اعلیٰ نے معائنہ کیا۔ اس دوران وزیر اعلیٰ نے ٹریولیٹر، ایسکلیٹر وغیرہ کا جائزہ لیا اور حکام سے مسافروں کی سہولیات اور کنیکٹیویٹی کے بارے میں معلومات حاصل کی۔
وزیر اعلیٰ نے صحافیوں سے بات کرتے ہوئے کہا کہ اس کی شروعات ہو نے سے پٹنہ جنکشن اور اس کے قرب و جوار کے علاقوں میں بھیڑ بھاڑ میں کمی آئے گی اور پبلک ٹرانسپورٹ سسٹم کو مضبوط کیا جائے گا۔جی پی او گولمبر کے قریب ملٹی لیول ہب کو پٹنہ جنکشن سے جوڑنے کے لیے ایک زیر زمین پیدل چلنے والا راستہ (سب وے) بنایا گیا ہے۔ اس پروجیکٹ کا بنیادی مقصد پٹنہ جنکشن ریلوے اسٹیشن کے علاقے میں ٹریفک نظام کو فروغ دینا ہے۔ اس زیر زمین پیدل چلنے والے راستے (سب وے) اور کثیرمنزلہ پارکنگ عمارت کے افتتاح ہو نے سے پیدل چلنے والوں کو پٹنہ جنکشن تک آنے جانے میں بڑی سہولت ہوگی۔ ہم نے پہلے بھی کئی مرتبہ اس منصوبے کے تعمیراتی کام کا معائنہ کیا تھا اور تعمیراتی کام کو جلد اور بہتر اور منظم طریقے سے مکمل کرنے کی ہدایات دی تھیں۔
واضح ر ہے کہ شہری ترقیات و رہائش محکمہ کے ذریعہ 84.83 کروڑ روپے کی لاگت سے پٹنہ جنکشن کے نزدیک ایک زیر زمین راستہ (سب وے) تعمیر کیا گیاہے۔ یہ پٹنہ جنکشن کے قریب سے شروع ہوکر جی پی او گولمبر تک جاتا ہے، جس کی لمبائی 440 میٹر ہے۔ اس پروجیکٹ میں جی پی او گولمبر کے قریب66.81کروڑ روپے کی لاگت سے ایک کثیر منزلہ پارکنگ کی عمارت (ملٹی ماڈل ہب) تعمیر کیا گیا ہے ، جہاں بس، آٹو ، ٹیکسی اور نجی گاڑیوں کے لیے پارکنگ کا انتظام ہے۔ پٹنہ شہر کے مختلف مقامات سے اس کثیرمنزلیہ پارکنگ ک جگہ تک گاڑیوں سے پہنچنے کے بعد پیدل چلنے والے زیر زمین راستے میں نو تعمیر شدہ خودکار ٹریولیٹر کے ذریعے آسانی سے پٹنہ جنکشن تک پہنچ سکتے ہیں۔ لوگوں کی سہولت کے لیے زیر زمین راستے تک پہنچنے کے لیے دو لفٹیں اور دو ایسکیلیٹرز بھی لگائے گئے ہیں اور پوری لمبائی میں ایئر کنڈیشننگ کی سہولت بھی فراہم کی گئی ہے۔ زیر زمین راستہ میں بدھ اسمرتی پارک کے قریب ایک اضافی داخل ہو نے اور نکلنے کی سہولت بھی دی گئی ہے۔ مستقبل میں اس زیر زمین راستے کو زیر تعمیر پٹنہ میٹرو اسٹیشن سے جوڑنے کا منصوبہ ہے۔ اس زیر زمین راستے اور کثیرمنزلہ پارکنگ عمارت کی سہولت سے پیدل چلنے والوں کو پٹنہ جنکشن تک آنے جانے میں بڑی سہولت ہوگی۔
پروگرام کے دوران نائب وزیر اعلیٰ سمراٹ چودھری، آبی وسائل اور پارلیمانی امور کے وزیر وجے کمار چودھری، شہری ترقیات اوررہائش کے وزیر مسٹر جیویش کمار،ممبر پارلیمنٹ مسٹر روی شنکر پرساد، قانون ساز کونسل کے رکن نیرج کمار، قانون ساز کونسل کے رکن رویندر پرساد سنگھ، پٹنہ کی میئر مسزسیتا ساہو اور دیگرعوامی نمائندے۔ وزیر اعلیٰ کے پرنسپل سکریٹری مسٹر دیپک کمار، وزیر اعلیٰ کے پرنسپل سکریٹری ڈاکٹر ایس سدھارتھ، محکمہ سڑک تعمیر کے ایڈیشنل چیف سکریٹری مسٹر مہیر کمار سنگھ، شہری ترقیات ورہائش محکمہ کے سکریٹری مسٹر ابھے کمار سنگھ، وزیر اعلیٰ کے سکریٹری مسٹر کمار روی، وزیر اعلیٰ کے او ایس ڈی مسٹر گوپال سنگھ، پٹنہ کے ڈی ا یم ڈاکٹر چندر شیکھرسنگھ، ٹائون کمشنر مسٹر انیمیش پراسر ،دیگر سینئر افسران ،شہری کونسل کے سابق جنرل سیکریٹر ی مسٹر اروند کمار سمیت دیگر اہم شخصیات موجودتھیں۔
