نئی دہلی ، پریس ریلیز،ہمارا سماج:جماعت اسلامی ہند، مالونی یونٹ کا بنیادی و منفرد پراجیکٹ بورڈ آف اسلامک ایجوکیشن گزشتہ 9 سالوں سے اپنے مقاصد کے حصول کے لیے سرگرم عمل ہیں. عصری درسگاہوں میں زیر تعلیم طلبہ وطالبات کی دینی تعلیم کو یقینی بنانے اور والدین کو اپنے اولاد کی بہترین تعلیم و تربیت کی رہنمائی کے عزم سے مارچ 2017 میں اس تعلیمی پروگرام کی شروعات کی ۔ بورڈ اپنی مختلف کاوشوں سے اپنے اعلیٰ و ارفع مقاصد کے حصول کیلئے کوشاں ہیں۔بورڈ کی جانب سے مالونی کے مختلف اسکولز میں فی الحال ایلیا ثروت اردو ہائی اسکول اور ملت اردو ہائی اسکول میں مکمل تعلیمی سال دینیات مضمون کی تدریس عالمہ دین کے ذریعہ سے ہوئی اور طلبہ وطالبات کے مابین نصابی کتب بھی فراہم کی گئی. ڈپلومہ ان اسلامک اسٹڈیز (برائے پانچویں، چھٹی جماعت) اور ایڈوانس ڈپلومہ ان اسلامک اسٹڈیز ( برائے ساتویں ، آٹھویں ، نویں جماعت)کورس پر مشتمل امتحان کا انعقاد بروز سنیچر بتاریخ 28 فروری 2026 کو دونوں اسکولز میں ہوا۔ جس میں طلبہ وطالبات نے جوش و خروش سے تیاری کے ساتھ امتحانات دئیے۔لھذا اس سلسلے کی آخری کڑی سالانہ اجلاس برائے تقسیم انعامات و اسناد اور پرورش تربیتِ اولاد ورکشاپ کا انعقاد بروز اتوار بتاریخ 29 مارچ 2026 کو صبح 10 بجے رمضان علی ہال مالونی میں منعقد ہوا ۔ تلاوت و ترجمہ قرآن کے بعد افتتاحی کلمات میں مولانا اختر الاسلام ندوی صاحب ( ڈائریکٹر بورڈ آف اسلامک ایجوکیشن) نے بورڈکے قیام کا پس منظر ، اغراض ومقاصد و طریقۂ کار کو تفصیلا پیش فرمایا ۔ اس کے بعد تربیتِ اولاد پر پرورش ورکشاپ پر محترم ڈاکٹر کاظم ملک صاحب (معروف کاؤنسلر ،ایجوکیٹر، سائیکولوجسٹ) نے تفصیلی رہنمائی فرمائی ۔ موصوف نے پیرینٹنگ کے جدید مسائل اور پیرینٹنگ پریکٹیکل امور کو عملی انداز میں رکھا۔ بعدہ اس سیشن پر سوالات و جوابات بھی ہوئے۔ پھر SIO GIO CIO اور صفہ مکاتب کا تفصیلی تعارف متعلق ذمہ داران نے پیش فرمایا۔اس موقع پر محترم شیخ انور صاحب ( امیر مقامی) نے سیشن کو کنڈکٹ کرتے ہوئے محترم محمد الیاس خان فلاحی صاحب ( امیر حلقہ) ، ڈاکٹر کاظم ملک صاحب ( معروف کاؤنسلر) محترمہ ثناء صاحبہ ( سابقہ معلمہ دینیات) ، محترمہ شگفتہ فرحین صاحبہ ( معلمہ بورڈ) کا اعزاز کیا گیا۔آخر میں صدارتی خطاب مولانا محمد الیاس خان فلاحی صاحب (امیر حلقہ جماعت اسلامی ہند ، حلقۂ مھاراشٹر) نے پیش فرماتے ہوئے بچوں کی تعلیم و تربیت کو اسلامی تعلیمات کی روشنی میں تفصیل سے پیش فرمایا۔ نیز دینی تعلیم کی اہمیت و افادیت کو واضح فرمایا ۔پھر سالانہ امتحان میں فائز طلبہ و طالبات کو انعامات و اسناد مہمانان کرام کے بدست عنایت فرمائے گئے۔ محترم شارق قاضی صاحب (اسسٹنٹ ڈائریکٹر۔ بورڈ آف اسلامک ایجوکیشن ممبئی) کے اظھار تشکر و دعا پر اجلاس کا اختتام عمل میں آیا ۔ محترم انوار الاسلام صاحب (کمیٹی ممبر ،بورڈ آف اسلامک ایجوکیشن) نے نظامت کے فرائض بحسن و خوبی ادا فرمائے ۔ وابستگان جماعت ارکان و کارکنان ، ایس آئی او ، جی آئی او اور یوتھ ونگ کی خصوصی کاوشوں سے پروگرام کامیابی سے ہمکنار ہوا ۔
