نئی دہل، ایجنسیاں: دہلی ہائی کورٹ نے جمعہ کو فروری 2020 کے شمال مشرقی دہلی فسادات سے متعلق ایک معاملے میں کانگریس کونسلر عشرت جہاں کو ضمانت دینے کے ٹرائل کورٹ کے فیصلے کے خلاف دہلی پولیس کی اپیل کو مسترد کردیا۔جسٹس نوین چاولہ اور رویندر دودیجا کی بنچ نے دہلی پولیس کی اپیل کو مسترد کر دیا، یہ نوٹ کرتے ہوئے کہ ٹرائل کورٹ نے اسے ضمانت دیے ہوئے چار سال سے زیادہ کا عرصہ گزر چکا ہے۔تفتیشی ایجنسی یہ ثابت کرنے کے لیے عدالت میں کچھ بھی پیش کرنے میں ناکام رہی کہ اس نے ضمانت کی کسی بھی شرط کی خلاف ورزی کی ہے۔ عشرت جہاں کو انڈین پینل کوڈ اور غیر قانونی سرگرمیاں (روک تھام) ایکٹ (یو اے پی اے) کی مختلف دفعات کے تحت دہلی فسادات سے متعلق ایک کیس میں گرفتار کیا گیا تھا۔ٹرائل کورٹ نے عشرت جہاں کی ضمانت منظور کرتے ہوئے کہا کہ چکہ جام عشرت کا خیال نہیں تھا اور نہ ہی وہ کسی تنظیم یا واٹس ایپ گروپ کی رکن تھی جس نے اس سازش میں کردار ادا کیا تھا۔ جنوری 2024 میں، ٹرائل کورٹ نے عشرت جہاں کے خلاف قتل کی کوشش اور فساد بھڑکانے کے الزامات عائد کیے تھے۔ اس کیس کی سماعت ابھی جاری ہے۔
