بیدر، سماج نیوز سروس: اسٹوڈنٹس فیڈریشن آف انڈیا (SFI) کی ضلع کمیٹی نے بیدر ضلع میں غیر قانونی کوچنگ سینٹرز چلنے کے باوجود محکمہ تعلیم کے افسران کی خاموشی کی مذمت کرتے ہوئے ڈپٹی کمشنر اور محکمہ اسکول ایجوکیشن کے ڈپٹی ڈائریکٹر سے غیر قانونی کوچنگ سنٹرز کو بند کرنے کی اپیل اسٹوڈنٹس فیڈریشن آف انڈیا (SFI)کے ضلع صدر ارون کوڈگے، ضلع نائب صدر امرگادگی،اور ضلع سکریٹری روشن ملکا پورے نے کی ہے۔ کہاہے کہ 1983 کے ایجوکیشن ایکٹ کے قوانین کی مکمل خلاف ورزی کی جارہی ہے اور ضلع کے تمام اضلاع میں ٹیوشن اور ٹیوٹورل کے نام پر غیر قانونی طور پر کوچنگ سنٹر شروع کر دیے گئے ہیں۔ یہ محکمہ تعلیم میں مزدوری کے عروج کے مترادف ہے۔ بہت سے والدین نے ہم سے شکایت کی ہے کہ وہ پرائیویٹ اسکولوں کی فیسوں سے زیادہ رقم وصول کر رہے ہیں، ضلع میںکھلے عام والدین کی جیبیں کاٹی جا رہی ہیں۔ طلباء کے والدین سے معیاری تعلیم کے نام پر اندھا دھند پیسے وصول کر رہے ہیںجس کی تنظیم شدید مذمت کرتی ہے۔ لہٰذا ضلع میں جو غیر قانونی کوچنگ سینٹرز چل رہے ہیں انہیں فوری طور پر بندکیا جائے اور محکمہ تعلیم کے کچھ سرکاری اساتذہ اپنے سرکاری اسکولوں میں بچوں کو پڑھانے کا کام چھوڑ کر غیر قانونی کوچنگ سینٹرز میں پڑھانے جارہے ہیں اور کچھ اساتذہ ایسے ہیں ایک ساتھ مل کر غیر قانونی کوچنگ سنٹر چلا رہے ہیں، ایسے اساتذہ کو ڈھونڈا جائے اور انہیں فوری طور پر معطل کیا جائے۔ اگر کارروائی نہیں کی گئی تو ڈپٹی کمشنر کے دفتر کے سامنے احتجاجی دھرنادیں گے۔ اس بات کی اطلاع ایک پریس نوٹ جاری کرکے دی گئی ہے۔
