علی گڑھ،سماج نیوز سروس: جواہر لعل نہرو میڈیکل کالج (جے این ایم سی)، علی گڑھ مسلم یونیورسٹی کے شعبہ اینستھیسیالوجی و کریٹیکل کیئر نے ’بیسک کارڈیو پلمونری لائف سپورٹ (بی سی ایل ایس) کورس‘ کا اہتمام کیا،جس میں 42 ریزیڈنٹ ڈاکٹروں نے شرکت کی۔ پروفیسر ایس معید احمد، کورس کوآرڈینیٹرکے طور پر اور پروفیسر راکیش گرگ، ایمس، نئی دہلی، کورس کے نیشنل کوآرڈینیٹر اور آبزرور کے طور پر موجود رہے۔ ڈاکٹر عبید اے صدیقی، ڈاکٹر شہنا علی، ڈاکٹر نازیہ توحید، ڈاکٹر ندیم رضا اور ڈاکٹر مناظر اطہر کورس کے ریسورس پرسن تھے۔ اپنے خطبہ استقبالیہ میں پروفیسر وینا مہیشوری، ڈین، فیکلٹی آف میڈیسن نے کہا کہ ریزیڈنٹ ڈاکٹروں کے لیے ان کورسز کی سرٹیفیکیشن کو لازمی قرار دیا گیا ہے اور یہ ایک باقاعدہ پروگرام ہو گا ، لہٰذا ریزیڈنٹ ڈاکٹروں کو اس کورس کے لیے دوسرے شہروں میں جانے کی ضرورت نہیں پڑے گی۔ اپنے لیکچر میں پروفیسر معید احمد نے اس کورس کی اہمیت پر روشنی ڈالی جو کارڈیو پلمونری ریسیسیٹیشن (سی پی آر) پر ہندوستانی رہنما خطوط پر مبنی ہے، اور جسے ہندوستانی آبادی، صحت کی دیکھ بھال کے نظام اور مخصوص ماحولیاتی و جغرافیائی حالات کے مطابق تیار کیا گیا ہے۔انہوں نے کہا کہ نیشنل میڈیکل کمیشن (این ایم سی) نے ریزیڈنٹ ڈاکٹروں کے لیے یہ لازمی قرار دیا ہے کہ وہ اپنی ریزیڈنسی کے پہلے سال میں بی سی ایل ایس اور کمپریہینسو کارڈیو پلمونری لائف سپورٹ (سی سی ایل ایس) کورس مکمل کریں۔
