یاماناشی (جاپان) / لکھنؤ:(یواین آئی) جاپان کے دورے پر گئے وزیراعلیٰ یوگی آدتیہ ناتھ نے ایک اور بڑی کامیابی حاصل کی ہے۔ اتر پردیش حکومت نے جاپان کے صوبہ یاماناشی کے ساتھ گرین ہائیڈروجن ٹیکنالوجی کے شعبے میں ایک تاریخی مفاہمت نامے پر دستخط کیے ہیں، جس کے تحت ہندوستانی طلبہ کو جاپان میں جدید ٹریننگ فراہم کی جائے گی۔ جمعرات کو یاماناشی میں منعقدہ یوپی انویسٹمنٹ روڈ شو کے دوران وزیر اعلیٰ نے ریاست کی نئی ترقیاتی پالیسیوں اور سرمایہ کاری کے امکانات کو عالمی صنعتی برادری کے سامنے نمایاں طور پر پیش کیا۔ اپنے خطاب میں انہوں نے واضح کیا کہ اتر پردیش نے اپنی طرزحکمرانی کو ری۔ایکٹیو سے پرو۔ایکٹیومیں تبدیل کر دیا ہے، اور یہی تبدیلی ریاست کی تیز رفتار معاشی ترقی کی بنیاد بنی ہے۔ انہوں نے پروگرام کے دوران بتایا کہ گرین ہائیڈروجن ٹیکنالوجی کے حوالے سے اتر پردیش اور یاماناشی کے درمیان ایک تاریخی مفاہمت مامہ طے پایا ہے۔ اس معاہدے کے تحت اتر پردیش کے اعلیٰ تکنیکی اداروں کے طلبہ جاپان میں تربیت حاصل کریں گے اور حاصل شدہ ٹیکنالوجی کو ریاست کی صنعت، عوامی نقل و حمل اور توانائی کے شعبوں میں نافذ کیا جائے گا۔ یہ اقدام وزیر اعظم نریندر مودی کے نیٹ زیرو ہدف کے حصول کی جانب ایک اہم قدم ثابت ہوگا۔ وزیر اعلیٰ نے بتایا کہ ریاستی وفد نے ٹوکیو میں حکومت سے حکومت اور حکومت سے کاروبار کی سطح پر کئی اہم ملاقاتوں میں شرکت کی، جہاں ہندوستانی سفارت خانے کے تعاون سے جاپانی صنعتی گروپوں کے ساتھ تفصیلی بات چیت کی گئی۔ انہوں نے سرمایہ کاری کے فروغ کے لیے یاماناشی انتظامیہ کے فعال اقدامات پر خصوصی شکریہ ادا کیا۔ روبوٹکس کو مستقبل کی ایک اہم ٹیکنالوجی قرار دیتے ہوئے وزیر اعلیٰ نے کہا کہ اتر پردیش حکومت نے بجٹ میں روبوٹکس کے لیے ایک سنٹر آف ایکسیلنس قائم کرنے کی تجویزرکھی ہے۔ انہوں نے اعتماد ظاہر کیا کہ اتر پردیش اور یاماناشی کے درمیان تعاون ہندوستان اور جاپان کے تعلقات کو نئی بلندیوں تک لے جائے گا اور توانائی میں خود انحصاری اور ٹیکنالوجی کو عام لوگوں تک پہنچانے میں اہم کردار ادا کرے گا۔ انہوں نے کہا کہ تقریباً 25 کروڑ آبادی کے ساتھ اتر پردیش ہندوستان کی سب سے بڑی ریاست ہے اور قدرتی وسائل سے مالا مال ہے۔ زرخیز زمین، وافر آبی وسائل، وسیع افرادی قوت اور روحانی و ثقافتی ورثہ ریاست کو منفرد شناخت عطا کرتے ہیں۔ وزیر اعظم نریندر مودی کی رہنمائی میں اتر پردیش نے ترقی کی نئی منازل طے کی ہیں اور گزشتہ 9 برسوں میں ریاست نے فی کس آمدنی اور معیشت کو تین گنا بڑھانے میں کامیابی حاصل کی ہے۔ آج اتر پردیش ہندوستان کی سب سے تیز رفتار ترقی کرنے والی معیشتوں میں شمار ہوتا ہے۔ وزیر اعلیٰ نے یاماناشی کے گورنر اور ان کی ٹیم کا شکریہ ادا کرتے ہوئے کہا کہ جاپانی حکومت اور یاماناشی انتظامیہ نے ہندوستانی وفد کو اپنے اہم شعبوں کو نزدیک سے سمجھنے اور صنعتی رہنماؤں سے براہِ راست رابطہ کرنے کا قیمتی موقع فراہم کیا۔ انہوں نے تقریب میں موجود صنعت کاروں اور ہندوستانی برادری کے اراکین کا بھی خیرمقدم کیا۔ انہوں نے بتایا کہ یاماناشی کے گورنر نے دسمبر 2024 میں اتر پردیش کا دورہ کیا تھا۔
