نیوزی لینڈ کے خلاف ممبئی میں کھیلے گئے پہلے سیمی فائنل میں محمد سمیع نے شاندار بالنگ کا مظاہرہ کرتے ہوئے ہندوستان کو فائنل میں داخل کرانے میں ایک اہم کردار ادا کیا۔ انہوں نے9.5 اوور میں57 رن دیکر سات کھلاڑیوں کو آوٹ کیا جو عالمی کپ میں ہی نہیں ایک روزہ بین الاقوامی کرکٹ میں بھی ہندوستان کی جانب سے سب سے اچھی بالنگ کارکردگی ہے۔ محمد سیمع کی اس شاندار بالنگ کی بدولت ہندوستان نے پہلے سیمی فائنل میں نیوزی لینڈ کو70 رن سے شکست دی۔
اس سے پہلے ہندوستان کی جانب سے ایک روزہ بین الاقوامی کرکٹ میں سب سے اچھی بالنگ کا ریکارڈ اسٹورٹ بنی کے پاس تھا جنہوں نے بنگلہ دیش کے خلاف میر پور،ڈھاکہ میں17 جون2014 کو ہوئے میچ میں4.4 اوور میں چار رن دیکر چھ کھلاڑیوں کو آوٹ کیا تھا۔ اس میچ میں ہندوستان نے47 رن سے کامیابی حاصل کی تھی وہ بھی پہلی اننگ میں25.3 اوور میں105 رن پر آوٹ ہونے کے بعد۔
ہندوستان کی جانب سے عالمی کپ میں اس سے پہلے سب سے اچھی بالنگ کا ریکارڈ اشش نہرا کے پاس تھا جنہوں نے انگلینڈ کے خلاف ڈربن میں26 فروری2003 کو ہوئے میچ میں دس اوور میں 23 رن دیکر چھ وکٹ حاصل کئے تھے۔
محمد سمیع کی بالنگ کارکردگی عالمی کپ میں پانچویں سب سے اچھی بالنگ کارکردگی ہے۔ عالمی کپ میں سب سے اچھی بالنگ کا ریکارڈ آسڑیلیا کے گلین میک گرا پاس ہے جنہوں نے نامیبیا کے خلاف پوچیفسٹرم میں27 فروری2003 کو ہوئے میچ میں سات اوور میں 15 رن دیکر سات کھلاڑیوں کو آوٹ کیا تھا۔ اس میچ میں آسڑیلیا نے 256 رن سے کامیابی حاصل کی تھی۔
آسڑیلیا کے تیز بالر انڈریو بیخل نے پورٹ الزبتھ میں2 مارچ2003 کو انگلینڈ کے خلاف ہوئے میچ میں دس اوور میں 20رن دیکر سات کھلاڑیوں کو آوٹ کیا تھا۔اس میچ میں آسڑیلیا نے دو بالیں قبل دو وکٹ سے جیت اپنے نام کی تھی۔
نیوزی لینڈ کے ٹم ساوتھی کو جنہوں نے ہندوستان کے خلاف پہلے سیمی فائنل میں دس اوور میں سو رن دیئے تھے، عالمی کپ میں تیسری سب سے اچھی بالنگ کرانے کا ریکارڈ حاصل ہے۔ انہوں نے انگلینڈ کے خلاف ویلنگٹن میں20 فروری2015کو ہوئے میچ میں نو اوور میں 33 رن دیکر سات وکٹ حاصل کئے تھے اور اپنی ٹیم کو آٹھ وکٹ سے کامیابی حاصل کی تھی۔
عالمی کپ میں سات وکٹ حاصل کرنے والے پہلے بالر ویسٹ انڈیز کے ونسٹن ڈیوس تھے جنہوں نے آسڑیلیا کے خلاف لیڈس میں11 جون1983 کو ہوئے میچ میں10.3 اوور میں51 رن دیکر سات کھلاڑیوں کو آوٹ کیا تھا۔ اس میچ میں ویسٹ انڈیز نے 101 رن سے جیت اپنے نام کی تھی۔
محمد سیمع نے اپنی اس کارکرگی کے دوران عالمی کپ میں اپنے وکٹوں کی نصف سنچری بھی مکمل کرلی ۔وہ ایسا کرنے والے ہندوستان کے پہلے اور کل ملاکر ساتویں بالر ہیں۔ ان سے پہلے ایسا آسڑیلیا کے گلین میک گرا ( 39میچوں میں71 وکٹ)، سری لنکا کے متھیہ مرلی دھرن ( 40میچوں میں68 وکٹ)، مشیل اسٹراک (26 میچوں میں59 وکٹ)، سری لنکا کے لاستھ ملنگا (29 میچوں میں56 وکٹ)، پاکستان کے وسیم اکرم (38 میچوں میں55 وکٹ) اور ٹرینٹ بولٹ (29 میچوں میں53 وکٹ) عالمی کپ میں پچاس سے زیادہ کھلاڑیوں کو آوٹ کرنے میں کامیاب رہے ہیں۔
