ناظم بیگ
بلند شہر،سماج نیوز سروس: ریاستی سطح پر ایک بڑی تقریب کے دوران وزیراعلیٰ اتر پردیش نے لکھنؤ میں منعقدہ پروگرام میں آنگن واڑی کارکنوں اور مکھیہ سیویکائوںکو اسمارٹ فون، گروتھ مانیٹرنگ ڈیوائس اور تقرری نامے تقسیم کیے۔ اس کے ساتھ ہی ریاست بھر میں 3,170 آنگن واڑی مراکز اور 140 بال وکاس پروجیکٹ دفاتر کی عمارتوں کا افتتاح بھی عمل میں آیا۔ ضلعی سطح پر اس تقریب کی براہِ راست نشریات وکاس بھون کے آڈیٹوریم میں دیکھی گئی۔ اس تقر یب میں ضلع مجسٹریٹ مسز شرتی،رکن اسمبلی (سکندر آباد) لکشمی راج سنگھ، رکن اسمبلی (سیانہ) دیویندر سنگھ لودھی، سی ڈی اومسز نشا گریوال، چیئرپرسن میونسپل کونسل صدرمسز دیپتی متل خاص طور سے شر یک تھیں ۔پروگرام کے دوران ضلع کی مجموعی طور پر 47 نو منتخب آنگن واڑی کارکنوں اور 427 مددگاروں کو ان کے تقرری نامے سونپے گئے۔ ڈیجیٹل گورننس کو فروغ دینے کے لیے 285 آنگن واڑی کارکنوں اور مکھیہ سیویکاؤں کو اسمارٹ فون تقسیم کیے گئے، تاکہ سرکاری کام کاج میں شفافیت اور تیزی لائی جا سکے۔ اس کے علاوہ بچوں کی نشوونما اور غذائیت کی درست نگرانی کے لیے گروتھ مانیٹرنگ ڈیوائسز بھی فراہم کی گئیں۔ تقریب کے دوران وزیراعلیٰ نے آنگن واڑی مراکز کی عمارتوں کے نئے ڈیزائن کا بھی اجرا ء کیا۔ عوامی نمائندوں نے اپنے خطاب میں نئے ملازمین کو مبارکباد دی اور انہیں حکومت کی فلاحی اسکیموں، بالخصوص ’مشن شکتی‘ اور ’پوشن ابھیان‘ کو زمینی سطح پر کامیاب بنانے کی ترغیب دی۔ اس موقع پر ڈسٹرکٹ پروگرام آفیسر (ڈی پی او)مسز پونم تیواری اور محکمہ کے دیگر افسران و ملازمین بھی موجود تھے۔
