کراچی :سہ ملکی سیریز کے تیسرے میچ میں پاکستان نے جنوبی افریقہ کو چھ وکٹوں سے شکست دے کر فائنل میں رسائی حاصل کر لی ہے۔ پاکستان اور نیوزی لینڈ کے درمیان فائنل 14 فروری کو کراچی میں کھیلا جائے گا۔
بدھ کو نیشنل سٹیڈیم کراچی میں پاکستان نے اپنی تاریخ کا سب سے بڑا 353 رنز کا ہدف 49 اوورز میں چار وکٹوں کے نقصان پر حاصل کیا۔سلمان علی آغا اور محمد رضوان نے عمدہ کارکردگی کا مظاہرہ کرتے ہوئے سینچریاں سکور کیں اور پاکستان کو فتح دلائی۔سلمان علی آغا نے پلیئر آف دی میچ کا اعزاز بھی اپنے نام کیا۔اس میچ میں پاکستان نے اپنی ون ڈے تاریخ کی سب سے بڑی پارٹنرشپ بھی قائم کی، محمد رضوان اور سلمان علی آغا نے چوتھی وکٹ کے لیے 260 رنز کی شراکت داری قائم کی۔اس سے پہلے یہ ریکارڈ شعیب ملک اور محمد یوسف کے پاس تھا، انہوں 206 رنز کی شراکت داری قائم کی تھی۔اس سے قبل جنوبی افریقہ نے پہلے بیٹنگ کرتے ہوئے مقررہ 50 اوورز میں پانچ وکٹوں کے نقصان پر 352 رنز بنائے تھے۔
پاکستان نے 353 رنز کے تعاقب کا آغاز کیا تو فخر زمان اور بابر اعظم کریز پر اترے۔پاکستان نے پہلے سات اوورز میں بغیر کسی نقصان کے 57 رنز بنائے۔ پاکستان کو پہلا نقصان اس وقت ہوا جب بابر اعظم چار چوکوں کی مدد سے صرف 23 رنز بنا کر آؤٹ ہو گئے۔اس کے بعد ون ڈاؤن کریز پر اترنے والے سعود شکیل 15 رنز بنا کر آؤٹ ہو گئے۔اوپنر بیٹر فخر زمان نے بھی جلد ہی پویلین کی راہ لی، وہ چھ چوکوں کی مدد سے 41 رنز بنا کر آؤٹ ہو گئے۔
یوں 353 رنز کے تعاقب میں پہلے 10 اوورز میں پاکستان کے ٹاپ آرڈر کے تین کھلاڑی 91 رنز کے مجموعی سکور پر پویلین لوٹ چکے تھے۔اس کے بعد محمد رضوان اور سلمان علی آغا کی 260 رنز کی تاریخ ساز پارٹنرشپ نے میچ کا پلڑا پاکستان کے حق میں پلٹ دیا۔سلمان علی آغا اور محمد رضوان نے پر اعتماد بیٹنگ کا مظاہرہ کرتے ہوئے پاکستان کا سکور آگے بڑھایا۔سلمان علی آغا دو چھکوں اور 16 چوکوں کی مدد سے 134 رنز بنا کر آؤٹ ہوئے جبکہ محمد رضوان تین چھکوں اور نو چوکوں کی مدد سے 122 رنز ساتھ ناقابل شکست رہے۔
وننگ شاٹ کھیلنے والے طیب طاہر نے چار رنز بنائے۔جنوبی افریقہ کی جانب سے ویان مولڈر نے دو جبکہ لنگی نگیڈی اور تبریز شمسی نے ایک، ایک وکٹ حاصل کی۔
جنوبی افریقہ نے ٹاس جیت کر بیٹنگ کا فیصلہ کیا تو کپتان ٹیمبا بووما اور ٹونی ڈی زورزی کریز پر اترے۔جنوبی افریقہ نے پہلے آٹھ اوورز تک بغیر کسی نقصان کے 51 رنز بنائے۔جنوبی افریقہ کو پہلا نقصان اس وقت ہوا جب ٹونی ڈی زورزی 22 رنز بنا کر شاہین شاہ آفریدی کی گیند پر سلمان علی آغا کو کیچ تھما دی۔کپتان ٹیمبا بووما نے عمدہ بیٹنگ کا مظاہرہ کرتے ہوئے 13 چوکوں کی مدد سے 82 رنز کی اننگز کھیلی، وہ سعود شکیل کے ہاتھوں اس وقت رن آؤٹ ہوئے جب ٹیم کا مجموعی سکور 170 تھا۔اس کے بعد میتھیو بریٹزکی اور ہینرک کلاسن نے پاکستانی بولرز کی خوب کلاس لی۔جنوبی افریقی بلے بازوں کی وکٹ پاکستانی بولرز کا خواب بنا رہا، اس دوران کچھ ایسے مناظر بھی دیکھنے کو ملے جن سے لگا کہ پاکستانی کھلاڑی انڈر پریشر ہیں۔میتھیو بریٹزکی ایک چھکے اور 10 چوکوں کی مدد سے 83 بنا کر آؤٹ ہوئے جبکہ تین چھکوں اور 11 چوکوں کی مدد سے ہینرک کلاسن 87 رنز بنا کر آؤٹ ہوئے۔ان کے علاوہ ویان مولڈر دو رنز بنا کر آؤٹ ہوئے جبکہ کائل ویریئن 44 اور کاربن بوش 15 رنز کے ساتھ ناٹ آؤٹ رہے۔
پاکستان کی جانب سے نسیم شاہ اور خوشدل شاہ نے ایک، ایک جبکہ شاہین شاہ آفریدی نے دو وکٹیں حاصل کیں۔
