اتر پردیش

اساتذہ کی بھرتی میں ریزرویشن کی بے ضابطگیوں کے خلاف کابینی وزیر آشیش پٹیل کی رہائش گاہ پر مظاہرہ

لکھنؤ، (یو این آئی) 68500 اسسٹنٹ ٹیچر بھرتی 2018 میں ریزرویشن کی بے ضابطگیوں کے معاملے میں انصاف کا مطالبہ کرتے ہوئے دھرنا اور احتجاج کررہے امیدواروں نے منگل کے روز کابینی وزیر اور اپنا دل (ایس) کے قومی نائب صدر آشیش پٹیل کی رہائش گاہ پر مظاہرہ کیا۔ صبح تقریباً 11 بجے ریاست کے مختلف اضلاع سے پہنچے سیکڑوں امیدواروں نے رہائش گاہ کے باہر جمع ہوکر نعرے بازی کی اور اپنے مطالبات پورے کرنے کی اپیل کی۔
مظاہرے کے دوران امیدواروں نے ‘آشیش بھیا باہر آؤ، پسماندہ طبقے کے لوگوں کی حالت دیکھ کر جاؤ، آشیش بھیا اپنا وعدہ نبھاؤ’، ‘ہمارا حق، ہمارا ریزرویشن’ اور ‘ریزرویشن لے کر رہیں گے’ جیسے نعرے لگائے۔ امیدواروں کا کہنا تھا کہ 68500 اساتذہ کی بھرتی میں دیگر پسماندہ طبقے (او بی سی) کے ساتھ ریزرویشن کے معاملے میں بے ضابطگی ہوئی ہے۔ اس سلسلے میں ریاستی پسماندہ طبقہ کمیشن، قومی پسماندہ طبقہ کمیشن اور قانون ساز کونسل کی پارلیمانی و سماجی ہم آہنگی کمیٹی نے حکم دیا ہے کہ اس بھرتی میں دیگر پسماندہ طبقے کے امیدواروں کو ریزرو زمرے میں شامل کیا جائے اور نتائج میں ترمیم کرکے اہل امیدواروں کو تقرری دی جائے۔
تحریک کی قیادت کر رہے طوفان سنگھ نے بتایا کہ تقریباً 10 دن پہلے بھی امیدواروں نے وزیر سے ملاقات کی تھی۔ اس وقت انہوں نے دیوالی تک مثبت نتیجہ آنے کی یقین دہانی کرائی تھی۔ اس کے باوجود بنیادی تعلیم کے محکمے کی جانب سے اب تک کوئی حکومتی حکم نامہ جاری نہیں کیا گیا ہے۔ انہوں نے کہا کہ امیدواروں نے اسی امید میں دیوالی، بھائی دوج اور چھٹھ جیسے تہوار بھی دھرنا کے مقام پر ہی منائے۔
تحریک کے شریک لیڈر آشوتوش ورما نے کہا کہ 10 ستمبر کو بنیادی تعلیم کے وزیر سندیپ سنگھ کی صدارت میں ہوئی میٹنگ میں بھرتی میں ریزرویشن کی بے ضابطگیوں کا معاملہ سامنے آیا تھا۔ اس کے حل کے لیے وزیر اعلیٰ یا کابینی سطح پر فیصلہ ہونا ہے، لیکن ابھی تک کوئی ٹھوس کارروائی نہیں ہوئی ہے۔
دھرنے کے انچارج نوین چودھری نے کہا کہ امیدوار 78 دنوں سے مسلسل احتجاج کر رہے ہیں اور انہیں تمام تہوار دھرنا گاہ پر ہی منانے کے لیے مجبور ہونا پڑا ہے۔
مظاہرے کے دوران پولیس کی بھاری نفری تعینات رہی۔ وزیر کی رہائش گاہ پر موجود دفتر کے انچارج نے امیدواروں کو بتایا کہ وزیر فی الحال لکھنؤ سے باہر ہیں۔ ان کی واپسی پر 68500 اساتذہ کی بھرتی کے نمائندہ وفد سے بات چیت کرکے معاملے کے حل کی کوشش کی جائے گی۔ اس کے بعد پولیس انتظامیہ نے امیدواروں کو بسوں میں بٹھا کر دھرنے کے مقام ایکو گارڈن بھیج دیا۔