بلاس پور میں سڑک کے چار حادثات میں پانچ افراد ہلاک

بلاس پور (یو این آئی) چھتیس گڑھ کے ضلع بلاس پور میں دیوالی کے دوران مختلف مقامات پر پیش آنے والے سڑک کے چار حادثات میں پانچ افراد کی موت ہوگئی، جبکہ ایک شخص زخمی ہو گیا۔ مرنے والوں میں دو سگے بھائی، ایک نوجوان تاجر، کار میں سوار ایک نوجوان اور 75 سالہ بزرگ شامل ہیں۔یہ حادثات کونی، سرکنڈا، سکری اور سول لائن تھانہ علاقوں میں پیش آئے۔ پولیس نے مقدمات درج کرکے واقعات کی تحقیقات شروع کر دی ہیں۔
پولیس نے بدھ کے روز اس کی اطلاع دی۔ پولیس کے مطابق، کونی تھانہ علاقے کے گاؤں گتوری کے رہنے والے رتیش بگھیل اور اس کا چھوٹا بھائی ساحل بگھیل رائے پور میں کام کرتے تھے۔ دونوں دیوالی منانے کے لیے اتوار کی رات موٹر سائیکل سے اپنے آبائی گاؤں واپس آ رہے تھے۔ رائے پور سے بلاس پور پہنچنے کے بعد دونوں سکری کے راستے گتوری جا رہے تھے۔ اسی دوران ترکادیہ کے قریب قومی شاہراہ پر سامنے سے آنے والے تیز رفتار ٹریلر نے ان کی موٹر سائیکل کو ٹکر مار دی۔
ٹکر اتنی شدید تھی کہ دونوں بھائی سڑک پر گر کر بری طرح زخمی ہو گئے۔ ساحل بگھیل کے سر میں شدید چوٹ لگنے سے موقع پر ہی اس کی موت ہو گئی، جبکہ رتیش بگھیل کے سر اور پیر میں گہری چوٹیں آئیں۔ اسے علاج کے لیے چھتیس گڑھ انسٹی ٹیوٹ آف میڈیکل سائنسز (سِمس) لے جایا گیا، جہاں ڈاکٹروں کی کوششوں کے باوجود اسے بچایا نہیں جا سکا۔ پوسٹ مارٹم کے بعد دونوں کی لاشیں اہل خانہ کے حوالے کر دی گئیں۔ ایک ہی خاندان کے دو بیٹوں کی موت سے دیوالی کی خوشیاں ماتم میں بدل گئیں۔ کونی پولیس حادثے کی تحقیقات کر رہی ہے۔
ایک اور حادثہ سرکنڈا تھانہ علاقے کی لویولا اسکول روڈ پر اتوار کی دیر رات تقریباً دو بجے پیش آیا۔ یہاں بلیٹ موٹر سائیکل اور تھار گاڑی کے درمیان ٹکر میں نوجوان تاجر آیوش گپتا کی موت ہو گئی۔ آیوش اپنے دوستوں سے ملاقات کے بعد موٹر سائیکل سے گھر واپس آ رہا تھا۔ اسی دوران آگے چل رہی تھار گاڑی کے ڈرائیور نے مبینہ طور پر انڈیکیٹر دیے بغیر اچانک گاڑی موڑ دی۔ پیچھے سے آنے والا آیوش موٹر سائیکل پر قابو نہیں رکھ سکا اور اس کی بلیٹ تھار سے ٹکرا گئی۔
حادثے میں شدید چوٹیں آنے کے باعث آیوش کی موت ہو گئی۔ بتایا گیا ہے کہ فروری میں اس کی شادی ہونے والی تھی اور خاندان میں شادی کی تیاریاں جاری تھیں۔ اس واقعے سے اہل خانہ میں غم و اندوہ کی لہر دوڑ گئی ہے۔حادثے کی سی سی ٹی وی فوٹیج بھی سامنے آئی ہے، جو سوشل میڈیا پر گردش کر رہی ہے۔ فوٹیج میں تھار گاڑی اچانک مڑتی ہوئی اور پیچھے سے آنے والی بلیٹ کو اس سے ٹکراتے ہوئے دیکھا جا سکتا ہے۔ سرکنڈا پولیس نے مرگ قائم کرکے تحقیقات شروع کر دی ہیں۔ پولیس حادثے کے حالات کے ساتھ تھار ڈرائیور کے کردار کی بھی جانچ کر رہی ہےتیسرے واقعے میں تیز رفتار کار بے قابو ہو کر الٹ گئی، جس کے نتیجے میں ایک نوجوان کی موت ہو گئی، جبکہ ڈرائیور زخمی ہو گیا۔ سول لائن تھانہ علاقے کے کستورا نگر کے رہنے والے پریم سنگھ ٹھاکر (32)، ولد دلیپ سنگھ ٹھاکر، پیر کے روز کار سے تخت پور جا رہے تھے۔ گاڑی راجیش سونوانی چلا رہا تھا۔ پینداری گاؤں کے قریب پہنچنے پر کار اچانک بے قابو ہو کر سڑک کنارے پلٹ گئی۔
حادثے کے بعد آس پاس موجود لوگوں نے کار میں پھنسے دونوں زخمیوں کو باہر نکالا اور علاج کے لیے سِمس اسپتال پہنچایا۔ ڈاکٹروں نے معائنے کے بعد پریم سنگھ ٹھاکر کو مردہ قرار دے دیا، جبکہ زخمی راجیش سونوانی کو اسپتال میں داخل کر لیا گیا ہے۔ پولیس حادثے کی وجوہات کی تحقیقات کر رہی ہے۔
چوتھا حادثہ سکری تھانہ علاقے میں لکھاسار موڑ کے قریب پیر کے روز پیش آیا، جہاں موٹر سائیکل کی ٹکر سے زخمی ہونے والے 75 سالہ جیٹھورام دنکر کی بعد میں موت ہو گئی۔
موصولہ اطلاع کے مطابق، گاؤں بیلگہنا کے رہنے والے دلیپ دنکر اپنے ساتھی سنتوش دنکر اور وی پی سنگھ دنکر کے ساتھ موٹر سائیکل سے لکھاسار جا رہے تھے۔ اسی دوران گاؤں کے جیٹھورام دنکر اپنی ٹی وی ایس ایکسل گاڑی سے نکلے تھے۔ لکھاسار موڑ کے قریب پلیٹینا موٹر سائیکل کے ڈرائیور نے ان کی موپیڈ کو ٹکر مار دی۔ٹکر کے باعث جیٹھورام دنکر سڑک پر گر گئے اور ان کے چہرے، ماتھے اور پیر میں چوٹیں آئیں۔ حادثے میں ان کی موپیڈ بھی تباہ ہو گئی۔ مقامی لوگوں کی اطلاع پر ڈائل 112 کی مدد سے انہیں سِمس اسپتال پہنچایا گیا۔
اسپتال میں علاج کے بعد طبیعت میں بہتری آنے پر ڈاکٹروں نے انہیں چھٹی دے دی۔ اس کے بعد اہل خانہ انہیں گھر لے آئے، لیکن شام تقریباً چار بجے اچانک ان کی موت ہو گئی۔ اہل خانہ نے سڑک حادثے میں لگی چوٹوں کو موت کی وجہ قرار دیا ہے۔
اس سلسلے میں دلیپ دنکر کی شکایت پر سکری پولیس نے پلیٹینا موٹر سائیکل کے ڈرائیور کے خلاف بھارتیہ نیائے سنہتا (بی این ایس) کی دفعہ 106(1) کے تحت مقدمہ درج کیا ہے۔ضلع میں مختلف مقامات پر پیش آنے والے ان چار حادثات میں پانچ افراد کی موت سے متاثرہ خاندانوں میں سوگ کا ماحول ہے۔ پولیس تمام معاملات میں حادثات کی وجوہات اور متعلقہ گاڑیوں کے ڈرائیوروں کے کردار کی تحقیقات کر رہی ہے۔