سچن تندولکر اپنے تاریخی بلے اور یادگار اشیا ممبئی کرکٹ میوزیم کو عطیہ کریں گے

ممبئی (یو این آئی) ہندوستانی کرکٹ کی تاریخ میں اہم مقام رکھنے والے عظیم بلے باز سچن تندولکر اپنی قیمتی کرکٹ یادگاریں ممبئی کرکٹ ایسوسی ایشن (ایم سی اے) کے شرد پوار کرکٹ میوزیم کو عطیہ کریں گے۔ ان میں وہ بلے بھی شامل ہیں جن کی مدد سے انہوں نے بین الاقوامی کرکٹ میں 100 سنچریاں بنائی تھیں۔ اس خصوصی مجموعے کی رونمائی 16 نومبر 2026 کو ایک تقریب میں کی جائے گی۔ یہ تاریخ اس لیے بھی اہم ہے کہ 13 سال قبل اسی دن سچن نے بین الاقوامی کرکٹ سے ریٹائرمنٹ کا اعلان کیا تھا۔ انہوں نے اپنا 200واں ٹیسٹ میچ اپنے ہوم گراؤنڈ وانکھیڑے اسٹیڈیم میں ویسٹ انڈیز کے خلاف کھیلا تھا۔

اس منفرد پہل کے تحت ایم سی اے میوزیم میں ‘بیٹوگرافی’ کے نام سے ایک خصوصی نمائش منعقد کی جائے گی۔ اس میں تندولکر کے 26 بلے اور ان کے شاندار کرکٹ کیریئر سے وابستہ دیگر اہم یادگاریں نمائش کے لیے رکھی جائیں گی۔ ‘سوانح عمری’ کی طرز پر تیار کی گئی یہ نمائش ان بلوں کے ذریعے ماسٹر بلاسٹر کے کرکٹ سفر کی داستان بیان کرے گی، جو ان کے کیریئر کے اہم ترین لمحات میں ان کے ساتھ رہے۔ ہر بلا ان کے کیریئر کے ایک اہم باب کی عکاسی کرے گا، جس نے کئی نسلوں کے کرکٹرز اور شائقین کو متاثر کیا ہے۔ اس نمائش کے ذریعے شائقین کو ان تاریخی کامیابیوں کے پس منظر کو قریب سے جاننے کا نادر موقع ملے گا۔

اس پہل کے بارے میں ممبئی کرکٹ ایسوسی ایشن کے صدر اجنکیا نائک نے کہا کہ ہندوستانی اور عالمی کرکٹ میں سچن تندولکر کا تعاون ان کے بنائے ہوئے ریکارڈز سے کہیں بڑھ کر ہے۔ ان کا سفر لاکھوں کرکٹ شائقین کی یادوں میں محفوظ ہے اور یہ بلے اس سفر کی انتہائی ذاتی یادگاروں میں شامل ہیں۔

انہوں نے کہا کہ ‘بیٹوگرافی’ کے ذریعے ایم سی اے میوزیم میں ایک نیا اور منفرد پہلو شامل کیا جا رہا ہے، جس سے آنے والے لوگ ان غیر معمولی کامیابیوں کے پیچھے کی کہانی کو انہی سازوسامان کے ذریعے محسوس کر سکیں گے جن کی مدد سے یہ کارنامے انجام دیے گئے۔ ایم سی اے کے لیے یہ اعزاز کی بات ہے کہ سچن نے اپنی ان قیمتی یادگاروں کو ایسوسی ایشن کے ساتھ شیئر کرنے کا فیصلہ کیا ہے۔ اس سے ان کی غیر معمولی میراث آنے والی نسلوں کے کرکٹ شائقین کے لیے بھی محفوظ رہے گی۔

بلوں کے علاوہ ان کے کیریئر کے اہم مواقع اور کامیابیوں سے وابستہ کئی دیگر اشیا بھی نمائش میں رکھی جائیں گی، جن میں ہیلمٹ، جرسی اور نوٹس شامل ہیں۔ یہ خصوصی جگہ سچن تندولکر کے شاندار کرکٹ سفر کو مستقل طور پر عزت افزائی کرے گی، جہاں شائقین اور دیگر مداح ان لمحات، کامیابیوں اور یادوں کو پھر سے تازہ کر سکیں گے جنہوں نے ان کی عظیم میراث کو تشکیل دیا۔