سری کانت نے ناراؤکا کو ہراکر کوارٹر فائنل میں جگہ بنائی، ترشا-گایتری باہر

ٹوکیو(یو این آئی) سابق عالمی نمبر ایک کدامبی سری کانت نے جمعرات کے روز جاپان کے پانچویں سیڈ کوڈائی ناراؤکا کو شکست دے کر کماموٹو ماسٹرز جاپان 2026 بیڈمنٹن ٹورنامنٹ کے مردوں کے سنگلز کوارٹر فائنل میں جگہ بنا لی۔ دوسری جانب ترشا جولی اور گایتری گوپی چند کی جوڑی خواتین کے ڈبلز مقابلے سے باہر ہوگئی۔

کماموٹو پریفیکچرل جمنازیم میں کھیلے گئے بی ڈبلیو ایف سپر 500 ٹورنامنٹ کے پری کوارٹر فائنل میں سری کانت نے ایک گھنٹے تک جاری رہنے والے مقابلے میں ناراؤکا کو 21-15، 11-21، 21-18 سے شکست دی۔ ناراؤکا کے خلاف پانچ مقابلوں میں یہ سری کانت کی پہلی کامیابی ہے۔

عالمی رینکنگ میں آٹھویں مقام پر موجود ناراؤکا دو مرتبہ بی ڈبلیو ایف عالمی چیمپئن شپ کے چاندی کے تمغے جیت چکے ہیں۔ وہ 2023 میں اور اس سال کے آغاز میں نئی دہلی میں بھی رنر اپ رہے تھے۔

ناراؤکا نے پہلے گیم میں 8-4 کی برتری حاصل کرکے بہتر آغاز کیا، لیکن سری کانت نے واپسی کرتے ہوئے اسکور 9-9 سے برابر کردیا۔ جاپانی کھلاڑی نے دوبارہ 14-12 کی سبقت حاصل کی، تاہم سری کانت نے مسلسل سات پوائنٹس جیت کر مقابلے کا رخ بدل دیا اور پہلا گیم 21-15 سے اپنے نام کرلیا۔ دوسرے گیم میں ناراؤکا نے مضبوط واپسی کی اور سری کانت کو ایک بار بھی برتری حاصل کرنے کا موقع نہیں دیا۔ اس طرح مقابلہ فیصلہ کن تیسرے گیم تک پہنچ گیا۔

تیسرے گیم میں دونوں کھلاڑیوں کے درمیان 7-7 سے برابری تھی، لیکن اس کے بعد سری کانت نے کھیل پر گرفت مضبوط کی اور وقفے تک 11-7 کی برتری حاصل کرلی۔ ناراؤکا نے آخری مرحلے میں فرق کم کرتے ہوئے اسکور 18-16 کردیا، لیکن 2021 عالمی چیمپئن شپ کے چاندی کا تمغہ جیتنے والے سری کانت نے حوصلہ برقرار رکھا اور گیم 21-18 سے جیت کر مقابلہ اپنے نام کرلیا۔

اس سیزن میں سری کانت کی یہ واحد بڑی کامیابی نہیں ہے۔ انہوں نے جون میں یو ایس اوپن کے فائنل تک کے سفر میں پیرس اولمپکس 2024 کے کانسے کا تمغہ جیتنے والے ملائیشیا کے لی زی جیا کو شکست دی تھی۔ اس کے علاوہ ستمبر میں چائنا ماسٹرز سپر 750 کے کوارٹر فائنل میں پہنچنے کے دوران اس وقت کے عالمی نمبر نو کینیڈا کے وکٹر لائی کو بھی ہرایا تھا۔
کوارٹر فائنل میں اب سری کانت کا مقابلہ جاپان کے کوکی واتانابے سے ہوگا۔
ادھر لکشیا سین نے چین کے ڈونگ تیان یاؤ کو محض 35 منٹ میں 21-8، 21-14 سے شکست دے کر کوارٹر فائنل میں جگہ بنائی۔ آٹھویں سیڈ ہندوستانی کھلاڑی نے یکطرفہ مقابلے میں پورے وقت اپنی گرفت برقرار رکھی۔ سیمی فائنل میں جگہ بنانے کے لیے ان کا سامنا جاپان کے یوشی تاناکا سے ہوگا۔
کماموٹو ماسٹرز جاپان کے آغاز سے قبل ریس ٹو فائنلز کی درجہ بندی میں دسویں مقام پر موجود لکشیا کی کوشش ٹاپ آٹھ میں جگہ بناکر سیزن کے اختتام پر ہونے والے بی ڈبلیو ایف ورلڈ ٹور فائنلز کے لیے کوالیفائی کرنے کی ہے۔ سری کانت اور لکشیا کو مردوں کے سنگلز ڈرا میں الگ الگ حصوں میں رکھا گیا ہے، اس لیے دونوں کا آمنا سامنا صرف فائنل میں ہوسکتا ہے۔
دوسری جانب ہندوستان کی ڈبلز میں چیلنج جمعرات کو ختم ہوگیا۔ عالمی چیمپئن شپ میں کانسے کا تمغہ جیتنے والی ترشا جولی اور گایتری گوپی چند کو خواتین کے ڈبلز پری کوارٹر فائنل میں جاپان کی تیسری سیڈ جوڑی رِن ایواناگا اور کی نکانیشی کے ہاتھوں 14-21، 14-21 سے شکست کا سامنا کرنا پڑا۔
ترشا اور گایتری نے اس سال کے آغاز میں نئی دہلی میں عالمی چیمپئن شپ کے پری کوارٹر فائنل میں ایواناگا اور نکانیشی کو 21-16، 21-12 سے شکست دے کر کانسے کا تمغہ حاصل کیا تھا۔ جمعرات کی کامیابی کے بعد جاپانی جوڑی کو باہمی مقابلوں میں 2-1 کی برتری حاصل ہوگئی ہے۔
مردوں کے ڈبلز میں ہری ہرن امساکرونن اور ایم آر ارجن بھی جاپان کے تاکورو ہوکی اور یوگو کوبایاشی کے خلاف 34 منٹ میں 14-21، 14-21 سے ہار کر ٹورنامنٹ سے باہر ہوگئے۔