سیول (ہ س)۔ جنوبی کوریا کی سیول سنٹرل ڈسٹرکٹ کورٹ نے جمعرات کو ملک کے سابق صدر یون سک یول کی دوبارہ گرفتاری کی منظوری دے دی۔ یہ گرفتاری دسمبر میں ان کی طرف سے تھوڑے عرصے کے لیے لگائے گئے مارشل لا سے متعلق سنگین الزامات کے تحت کی گئی ہے۔ عدالت نے اسپیشل پراسیکیوٹر کی یہ دلیل مان لی کہ یون شواہد سے چھیڑ چھاڑ کر سکتے ہیں۔یون سک یول کو دارالحکومت سیول کے قریب ایک حراستی مرکز میں واپس بھیج دیا گیا ہے۔ انہیں مارچ میں پہلے ہی رہا کر دیا گیا تھا جب ایک عدالت نے جنوری میں ان کی گرفتاری کو کالعدم قرار دیا تھا اور مقدمے کی سماعت کے دوران ان کی حراست کو غیر ضروری سمجھا تھا۔سابق صدر یون کے خلاف تحقیقات اسپیشل پراسیکیوٹر چو یون سک کی ٹیم کر رہی ہے، جو ان کے خلاف سنگین الزامات کے تحت نئے الزامات عائد کرنے کی تیاری کر رہی ہے جن میں غداری، اختیارات کا ناجائز استعمال، سرکاری کام میں رکاوٹیں ڈالنا اور سرکاری دستاویزات میں جعلسازی شامل ہے۔ٹیم نے یون سے دو بار پوچھ گچھ کے بعد اتوار کو گرفتاری وارنٹ کے لیے درخواست دائر کی۔ یون کے وکلاء نے اسے ’’ضرورت سے زیادہ اور بے بنیاد‘‘ قرار دیا لیکن عدالت نے گرفتاری کو جائز ٹھہرایا۔یون کو ابتدائی طور پر 20 دن تک حراست میں رکھا جا سکتا ہے۔ نئے الزامات پر مجرم ثابت ہونے پر انہیں 6 ماہ تک حراست میں رکھا جا سکتا ہے۔ اس دوران عدالت ابتدائی سماعت کرے گی۔ جرم ثابت ہونے پر انہیں جیل کی سزا ہو سکتی ہے جس کے بعد کیس اعلیٰ عدالتوں میں جا سکتا ہے۔قابل ذکر ہے کہ یون نے گزشتہ سال 3 دسمبر کو مارشل لاء کا اعلان کرتے ہوئے کہا تھا کہ ان کے ’’ملک دشمن‘‘ لبرل مخالفین ان کی پالیسیوں میں رکاوٹیں ڈال رہے ہیں۔ لیکن یہ اقدام صرف چند گھنٹوں میں ہی الٹا ہو گیا جب ارکان پارلیمنٹ فوجیوں کی ناکہ بندی توڑ کر پارلیمنٹ میں داخل ہوئے اور مارشل لاء کو منسوخ کرنے کے حق میں ووٹ دیا۔اس کے بعد 14 دسمبر کو یون کو مواخذے کے ذریعے اقتدار سے ہٹا دیا گیا اور 26 جنوری کو ان پر غداری کا الزام عائد کرتے ہوئے فرد جرم عائد کی گئی۔ استغاثہ نے الزام لگایا کہ انہوں نے پارلیمنٹ اور انتخابی دفاتر پر زبردستی قبضہ کرنے اور سیاسی مخالفین کو قید کرنے کا منصوبہ بنایا تھا۔ان الزامات پر جرم ثابت ہونے پر سزائے موت یا عمر قید ہو سکتی ہے۔
