اتر پردیش

فارم-6 میں گڑبڑی کرنے والے افسران کو جیل بھجوائیں گے اکھلیش یادو

لکھنؤ،  (یو این آئی) سماج وادی پارٹی (ایس پی) کے صدر اکھلیش یادو نے ووٹر لسٹ میں نئے نام شامل کرنے کے معاملے میں بھارتیہ جنتا پارٹی (بی جے پی) پر سازش کرنے کا الزام لگاتے ہوئے کہا کہ فارم-6 کے ذریعے کسی بھی طرح کی گڑبڑی برداشت نہیں کی جائے گی۔ انہوں نے خبردار کیا کہ ایس پی کی حکومت آنے پر اس میں شامل بدعنوان افسران کو جیل بھجوایا جائے گا۔
مسٹر یادو نے منگل کے روز سوشل میڈیا پلیٹ فارم ‘ایکس’ پر جاری بیان میں الزام لگایا کہ بی جے پی اتر پردیش میں اپنی ممکنہ شکست کو دیکھتے ہوئے خصوصی مہم چلا کر اے ایس ایس ڈی (ابسینٹ، شفٹڈ، ڈیٹ اور ڈپلیکیٹ) یعنی غیر حاضر، دوسری جگہ منتقل، فوت شدہ یا دوہرے ناموں کی بنیاد پر فرضی ووٹروں کو شامل کرنے کی سازش کر رہی ہے۔
انہوں نے کہا کہ ایس پی کے بوتھ انچارج، پی ڈی اے پہریدار، اعلان کردہ اور ممکنہ امیدواروں کے ساتھ ریاستی، ضلعی اور اسمبلی سطح کے عہدیدار، پارٹی کارکنان اور حامی ووٹر لسٹ میں شامل ہونے والے ہر نئے نام پر نظر رکھیں گے۔ پارٹی نے ایسا انتظام کیا ہے کہ عام شہری بھی اپنے پڑوس میں نئے شامل ہونے والے ووٹروں کے ناموں پر نظر رکھ سکیں۔
ایس پی صدر نے کہا کہ پارٹی ایک ایک نئے ووٹ کا حساب مانگے گی اور کسی بھی طرح کی بے ضابطگی سامنے آنے پر متعلقہ افسر کے خلاف ثبوتوں کے ساتھ ایف آئی آر درج کرائی جائے گی۔ انہوں نے افسران پر بی جے پی کے دباؤ میں غیر قانونی طریقے سے ووٹر لسٹ میں نام شامل کرانے کا الزام لگاتے ہوئے کہا کہ ایسے معاملات میں قصورواروں کے خلاف محکمانہ کارروائی، برطرفی اور قانونی کارروائی کا مطالبہ کیا جائے گا۔
اکھلیش یادو نے خبردار کیا کہ جمہوری عمل میں گڑبڑی کرنے والوں کو بخشا نہیں جائے گا۔ انہوں نے کہا کہ تحقیقات میں غیر قانونی جائیداد کا پتہ چلنے پر اسے بھی قانون کے تحت ضبط کرایا جانا چاہیے۔
انہوں نے کہا کہ فارم-6 کے ذریعے ووٹر لسٹ میں نام شامل کرنے کے عمل پر عوام اور پارٹی کارکنوں کی گہری نظر رہے گی۔ کسی بھی سطح پر بدعنوانی کے ثبوت ملنے پر فوری کارروائی کا مطالبہ کیا جائے گا۔
‘جے آئین، جے ہندوستان’ کے نعرے کے ساتھ انہوں نے عوام سے ووٹر لسٹ کی شفافیت برقرار رکھنے کے لیے چوکس رہنے کی اپیل کی۔