جامعہ ملیہ اسلامیہ میں طلبہ یونین کے انتخابات کے لیے 15 مئی 2027 تک آئین منظور کرنے کا حکم

حکم نامے میں کہا گیا ہے کہ طلبہ یونین کے آئین کو منظوری ملنے کے بعد جامعہ انتظامیہ انتخابات کے لیے نوٹیفکیشن جاری کرے گی۔ انتخابی عمل لنگدوہ کمیٹی کی سفارشات اور رہنما اصولوں کے مطابق مکمل کیا جائے گا۔ حکم نامے کے مطابق انتخابات تعلیمی سیشن شروع ہونے کے چھ ہفتوں کے اندر کرائے جائیں گے۔ اس میں تعلیمی سیشن کے آغاز کے لیے 16 جولائی 2027 کا حوالہ دیا گیا ہے، جس کے تقریباً چھ ہفتوں کے اندر انتخابات کرانے کی بات کہی گئی ہے۔رجسٹرار دفتر کی جانب سے جاری حکم نامے میں احتجاج میں شرکت کے سلسلے میں طلبہ کو بھیجے گئے تمام شوکاز نوٹس واپس لینے کی ہدایت دی گئی ہے۔ اس کے علاوہ ان کے خلاف کی گئی تادیبی کارروائیوں، جامعہ سے اخراج، معطلی اور کیمپس میں داخلے پر پابندی سے متعلق احکامات بھی منسوخ کیے جائیں گے۔

حکم نامے میں کہا گیا ہے کہ ان فیصلوں کے پیش نظر احتجاج کرنے والے طلبہ فوری طور پر اپنا احتجاج اور بھوک ہڑتال ختم کر دیں۔ جامعہ انتظامیہ کے اس حکم سے طلبہ یونین کے آئین اور انتخابات کے معاملے پر جاری تعطل دور ہونے کی امید پیدا ہوئی ہے۔ تاہم انتخابات کا انعقاد آئین کی منظوری، نوٹیفکیشن کے اجرا اور مقررہ انتخابی ضابطوں کے مطابق کارروائی مکمل ہونے سے مشروط ہوگا۔