یوتھ اولمپک: تیراکی اور جوڈو میں 8 چیمپئن بنے، ایلویرا نے پہلا طلائی تمغہ جیتا

ڈکار، (سینیگال)، (یو این آئی) ڈکار یوتھ اولمپک 2026 کے پہلے دن اتوار کو ایکواڈور کی ایک کھلاڑی نے خواتین کے 400 میٹر فری اسٹائل مقابلے میں کامیابی حاصل کرکے ان کھیلوں کا پہلا تمغہ جیتا۔ تیراکی میں 5 اور جوڈو میں 3 خطاب کے فاتحین کا فیصلہ ہوا، جبکہ میزبان ملک سینیگال کے ماتار ڈیوپ نے کانسے کا تمغہ جیتا۔ایلویرا ایسپینوسا نے تیراکی کے خواتین کے 400 میٹر فری اسٹائل مقابلے کو 4:22.87 کے وقت میں مکمل کیا۔ اپنی اب تک کی بہترین کارکردگی کا مظاہرہ کرتے ہوئے وہ جنوبی افریقہ کی لیاہ مارک گراف سے 3.26 سیکنڈ آگے رہیں، جبکہ بیلجیم کی سیلیا پاکویس تیسرے مقام پر رہیں۔ ایسپینوسا یوتھ اولمپک کے کسی بھی مقابلے میں طلائی تمغہ جیتنے والی ایکواڈور کی پہلی خاتون بن گئیں۔
مصر کے زین علی نے مردوں کے 100 میٹر بٹر فلائی مقابلے میں 52.16 کے وقت کے ساتھ کامیابی حاصل کی۔ وہ سربیا کے الیکسی کالنج اور سلوواکیہ کے ماتیاس کرسٹوف سے آگے رہے۔ نیوزی لینڈ کے ایریل موچیراؤنڈو نے مردوں کے 200 میٹر بیک اسٹروک مقابلے میں 1:59.15 کے وقت کے ساتھ کامیابی حاصل کی، جبکہ ارجنٹینا کی سیسیلیا ڈیئلیکے نے خواتین کے 200 میٹر بیک اسٹروک مقابلے میں 2:10.05 کے وقت کے ساتھ جیت حاصل کی۔ وہ یونان کی ایرینی زروو سے آگے رہیں۔
جوڈو میں یوکرین کے خزار ہیداروف نے مردوں کے 66 کلوگرام سے کم وزن کے فائنل میں کناڈا کے اینیس ماتی کو ‘گولڈن اسکور’ کے دوران ‘ہانسوکو ماکے’ (نااہل قرار دیے جانے) کے ذریعے شکست دی۔ وہیں سینیگال کے ماتار ڈیوپ نے ‘وازا آری’ کے ذریعے کانسے کا تمغہ جیتا، جو ان کھیلوں میں میزبان ملک کا پہلا تمغہ ہے۔ آذربائیجان کے ابراہیم طالبوف نے مردوں کے 55 کلوگرام سے کم وزن کے زمرے میں کروشیا کے جونا زوورک کو ‘وازا آری’ کے ذریعے شکست دے کر طلائی تمغہ جیتا، جبکہ ترکی کی سیما یوکسل نے خواتین کے 44 کلوگرام سے کم وزن کے فائنل میں اردن کی ہودا وشاہ کو ‘ایپون’ کے ذریعے شکست دی۔
مقابلے کے پہلے دن خواتین کے فٹسال گروپ اے میں سینیگال نے فجی کو 8-1 سے شکست دی۔ اس کے علاوہ روئنگ کوسٹل بیچ اسپرنٹس میں مکسڈ ڈبل اسکلز کے دوسرے ٹائم ٹرائل میں مصر کی ٹیم سب سے تیز رہی۔ خواتین کے بیچ والی بال مقابلے میں سینیگال کی امیناتا ٹائن اور نافی سیگنانے نے ڈومینیکن ریپبلک کو 2-0 سے شکست دی۔ بیس بال 5 میں ترکی نے سینیگال کو 2-0 سے ہرایا، جبکہ مردوں کے رگبی سیونز میں فرانس نے جاپان کو 48-0 سے مات دی۔