برسا منڈا کے یوم پیدائش کے موقع پرلکھنؤ میں 23 سے 26 نومبر تک قومی قبائلی شرکت میلے کے انعقاد کا فیصلہ

لکھنؤ (یو این آئی) وزیر اعلیٰ یوگی آدتیہ ناتھ کی قیادت میں راجدھانی لکھنؤ میں 23 سے 26 نومبر تک قومی قبائلی شرکت میلے کا انعقاد کیا جائے گا۔ لوک نائک بھگوان برسا منڈا کے یوم پیدائش کے موقع پر ہونے والے اس 4 روزہ میلے میں ملک کی 16 ریاستوں کے 500 سے زیادہ فنکار قبائلی ورثے، روایات اور طرز زندگی کی جھلک پیش کریں گے۔
گومتی نگر کے یو پی درشن پارک میں منعقد ہونے والے اس میلے میں 150 سے زیادہ ہنرمند بھی اپنے فن اور روایتی مصنوعات کی نمائش کریں گے۔ اس کا اہتمام اتر پردیش لوک اور قبائلی ثقافت کے ادارے کی جانب سے کیا جا رہا ہے، جس میں سماجی بہبود، قبائلی ترقی اور سیاحت کے محکمے بھی تعاون کریں گے۔وزیر ثقافت و سیاحت جے ویر سنگھ نے بتایا کہ اتر پردیش سمیت 16 ریاستوں کے فنکار لوک رقص، موسیقی اور روایتی فنون پیش کریں گے۔ قبائلی فنکاروں کے ساتھ خانہ بدوش برادریوں کے فن کو بھی خصوصی جگہ دی جائے گی۔ بین بجانے، جادو، کٹھ پتلی، بہروپیا اور نٹ نٹی کے مظاہرے بھی ہوں گے۔ برسا منڈا کی زندگی پر رنگولی اور ڈرامے پیش کیے جائیں گے۔
میلے میں دستکاری، قبائلی کھانوں، زیورات اور روایتی سازوں کے اسٹال لگیں گے۔ تصویری فن اور دستکاری کی نمائش کے ساتھ تربیتی نشستیں بھی ہوں گی۔ اس بار مدھیہ پردیش کو میلے کی مرکزی ریاست بنایا گیا ہے۔ غیر ملکی فنکار بھی شرکت کریں گے۔جے ویر سنگھ نے کہا کہ طلبہ اور نوجوانوں کو قبائلی ثقافت سے روشناس کرانے کے لیے تعلیمی اداروں کو بھی شامل کیا جائے گا۔ اس میلے کے ذریعے قبائلی تاریخ، فن، روایات اور علم کو نئی نسل تک پہنچایا جائے گا۔