ہندوستانی فٹبال ٹیم پہلی بار نیوزی لینڈ کے دورے پر جائے گی

نئی دہلی (یو این آئی) ہندوستانی فٹبال ٹیم نومبر 2026 کی فیفا انٹرنیشنل ونڈو کے دوران نیوزی لینڈ کے خلاف اس کی سرزمین پر دو بین الاقوامی دوستانہ میچ کھیلے گی۔ یہ ہندوستانی ٹیم کا نیوزی لینڈ کا پہلا دورہ ہوگا۔دونوں ٹیموں کے درمیان پہلا مقابلہ جمعرات کو آکلینڈ کے گو میڈیا اسٹیڈیم میں کھیلا جائے گا، جبکہ دوسرا میچ اتوار کو کرائسٹ چرچ کے ون نیوزی لینڈ اسٹیڈیم میں ہوگا۔ ہندوستان میں ان دونوں مقابلوں کی لائیو اسٹریمنگ دستیاب رہے گی۔دو میچوں کی یہ سیریز بلیو ٹائیگرز یعنی ہندوستانی ٹیم کا نیوزی لینڈ کا پہلا دورہ ہے۔ 2005 میں فجی کے خلاف دو دوستانہ میچ کھیلنے کے بعد یہ پہلا موقع ہے جب اوشیانا فٹبال کنفیڈریشن (او ایف سی) کے کسی رکن ملک کی سرزمین پر ہندوستانی ٹیم مقابلہ کرے گی۔
فیفا رینکنگ میں 138ویں مقام پر موجود ہندوستان کا سامنا 88ویں نمبر کی نیوزی لینڈ ٹیم سے ہوگا۔ نیوزی لینڈ کی ٹیم، جسے آل وائٹس کے نام سے بھی جانا جاتا ہے، نے رواں سال فیفا ورلڈ کپ 2026 میں حصہ لیا تھا۔ اس ٹورنامنٹ میں اس نے ایران کے خلاف میچ ڈرا کھیلا، جبکہ مصر اور بیلجیم کے ہاتھوں اسے شکست کا سامنا کرنا پڑا تھا۔اس دورے کے لیے کوچ خالد جمیل نے 23 رکنی ہندوستانی ٹیم کا انتخاب کیا ہے۔ اس میں ریان ولیمز، منویر سنگھ، لسٹن کولاسو، محمد سہیل اور ایڈمنڈ لالرنڈیکا جیسے کھلاڑی حملے کی ذمہ داری سنبھالیں گے۔بجوئے ورگیز، محمد سہیل اور لسٹن ہندوستان کی سیف چیمپئن شپ 2026 کی ٹیم کا بھی حصہ تھے۔ یہ کھلاڑی ڈھاکہ میں جاری ٹورنامنٹ چھوڑ کر نیوزی لینڈ دورے کے لیے سینئر ٹیم سے وابستہ ہوگئے ہیں۔
نیوزی لینڈ کی 22 رکنی ٹیم میں پریمیئر لیگ کے فارورڈ کرس ووڈ نمایاں نام ہیں۔ وہ نیوزی لینڈ کے لیے سب سے زیادہ گول کرنے اور سب سے زیادہ میچ کھیلنے والے کھلاڑی ہیں۔ انہوں نے 95 سینئر بین الاقوامی میچوں میں 45 گول کیے ہیں۔ نیوزی لینڈ نے ویلنگٹن فینکس کے تین کھلاڑیوں کوربن پائپر، میتھیو شیریڈن اور نیتھن واکر کو پہلی بار ٹیم میں شامل کیا ہے، جبکہ چوٹ کے باعث فیفا ورلڈ کپ سے باہر رہنے والے میٹ گاربیٹ کی بھی ٹیم میں واپسی ہوئی ہے۔تاہم ہندوستانی نژاد نیوزی لینڈ کے مڈفیلڈر سرپریت سنگھ اس سیریز کا حصہ نہیں ہوں گے۔ وہ پرتگالی کلب فارینسے کی ابتدائی الیون میں اپنی جگہ مستحکم کرنے کے بعد اب بھی اسی کلب کے ساتھ وابستہ ہیں۔ نیوزی لینڈ ٹیم کے کوچ ڈیرن بیزلی نے ان کے اس فیصلے کی حمایت کی ہے۔
ہندوستان اور نیوزی لینڈ کے درمیان اب تک صرف دو مقابلے ہوئے ہیں۔ دونوں ٹیموں کے درمیان پہلا میچ 1981 میں ملائیشیا میں منعقدہ مرڈیکا ٹورنامنٹ میں کھیلا گیا تھا، جو بغیر کسی گول کے برابر رہا تھا۔ اس کے بعد 2018 میں ممبئی میں انٹرکانٹی نینٹل کپ کے دوران نیوزی لینڈ نے ہندوستان کو 2-1 سے شکست دی تھی۔