پٹنہ ، 8 مئی ،سماج نیوز سروس : محکمہ اقلیتی فلاح کے سکریٹری نےآج ایک میٹنگ کا انعقاد کیا ،جس میں محکمہ کے تمام سینئر افسران موجود تھے۔ میٹنگ کا بنیادی مقصد مختلف اسکیموں کے تحت مختص اور خرچ کی جانے والی رقم کا جامع جائزہ لینا تھا۔میٹنگ کے دوران سیکرٹری نےا سکیموں کی پیش رفت پر تفصیلی تبادلہ خیال کیا اور وہاں موجود افسران کو ہدایت کی کہ وہ تمام اسکیموں پر عمل آوری میں جلد بازی کا مظاہرہ کریں اور مقررہ مدت کے اندر مالیاتی تقسیم کو یقینی بنائیں۔ سکریٹری نے یہ بھی واضح کیا کہ اسکیموں کے موثر نفاذ کے لیے مالیاتی نظم و ضبط کو برقرار رکھنا انتہائی ضروری ہے۔سیکرٹری نے محکمانہ افسران کو ہدایت کی کہ وہ وقتاً فوقتاً پیش رفت رپورٹ پیش کریں اور شفافیت کو یقینی بنائیں۔ انہوں نے کہا کہ ریاستی حکومت اقلیتی برادریوں کو سماجی اور معاشی طور پر بااختیار بنانے کے لیے پابند عہد ہے اور اسکیموں کا موثر نفاذ اس سمت میں ایک اہم قدم ہے۔اجلاس کے اختتام پر سیکرٹری نے تمام افسران پر زور دیا کہ وہ سکیموں کی کامیابی کو یقینی بنانے کے لیے باہمی تال میل سے کام کریں۔
