ایس اے ساگر
نئی دہلی، سماج نیوز سروس: سپریم کورٹ نے آوارہ کتوں کی بحالی، نس بندی اور انہیں دوسری جگہ منتقل کرنے سے متعلق اپنے سابقہ احکامات واپس لینے کی تمام درخواستیں اور عرضیاں مسترد کر دی ہیں۔ جسٹس وکرم ناتھ، جسٹس سندیپ مہتا اور جسٹس این وی انجاریا پر مشتمل بینچ نے واضح کیا کہ باعزت زندگی کے حق میں یہ بھی شامل ہے کہ شہریوں کو کتوں کے حملوں سے محفوظ ماحول میسر ہو۔عدالت نے ریمارکس دیتے ہوئے کہا کہ وہ اس حقیقت سے آنکھیں نہیں بند کر سکتی کہ بچے، بزرگ اور غیر ملکی سیاح کتوں کے کاٹنے کے واقعات کا شکار ہو رہے ہیں۔ اس لیے انسانی تحفظ کو نظر انداز نہیں کیا جا سکتا۔ سپریم کورٹ نے ریاستی حکومتوں، مرکز کے زیر انتظام علاقوں اور متعلقہ اداروں کو ہدایت دی کہ آوارہ کتوں کے مسئلے سے نمٹنے کیلئے بنیادی ڈھانچے کو مضبوط بنایا جائے اور مؤثر اقدامات کئے جائیں۔عدالت نے یاد دلایا کہ گزشتہ سال 7 نومبر کو دیے گئے احکامات میں کہا گیا تھا کہ آوارہ کتوں کو پکڑ کر ان کی نس بندی اور ویکسی نیشن کے بعد مخصوص شیلٹرز میں رکھا جائے اور انہیں دوبارہ اسی جگہ نہ چھوڑا جائے۔ عدالت نے یہ بھی کہا کہ جانوروں کی دیکھ بھال سے متعلق ادارے’اینمل بورڈ آف انڈیا‘ کی SOP کو چیلنج کرنے والی درخواستیں بھی مسترد کی جاتی ہیں۔عدالت کے مطابق ملک میں آوارہ کتوں کی بڑھتی ہوئی تعداد سے نمٹنے کیلئے ریاستوں اور مقامی اداروں کی کارکردگی ناکافی رہی ہے، اور مختلف علاقوں میں’’اینی مل برتھ کنٹرول پروگرام‘‘ غیر مؤثر اور غیر منظم انداز میں چلایا جا رہا ہے۔سپریم کورٹ نے کہا کہ اگرچہ جانوروں کے حقوق اہم ہیں، لیکن آئین کے آرٹیکل 21 کے تحت شہریوں کو محفوظ اور باعزت زندگی گزارنے کا حق بھی حاصل ہے، جس میں یہ شامل ہے کہ وہ خوف کے بغیر سڑکوں اور عوامی مقامات پر نقل و حرکت کر سکیں۔ عدالت نے مزید کہا کہ ریاست کی ذمہ داری ہے کہ وہ عوامی تحفظ اور صحت کیلئے مؤثر اقدامات کرے، اور صرف واقعات ہونے کے بعد ردعمل دینا کافی نہیں بلکہ مستقل اور منظم نظام قائم کرنا ضروری ہے۔بینچ نے یہ بھی نوٹ کیا کہ کتوں کے حملوں اور کاٹنے کے واقعات میں مسلسل اضافہ ہو رہا ہے، جن میں کئی افسوسناک معاملات شامل ہیں، خاص طور پر بچوں کے ساتھ پیش آنے والے واقعات۔ عدالت نے کہا کہ ایسے واقعات نہ صرف شہریوں کی حفاظت بلکہ نظامِ حکومت پر اعتماد کو بھی متاثر کرتے ہیں، اور اس مسئلے کو فوری اور سنجیدہ توجہ کی ضرورت ہے۔ سپریم کورٹ نے واضح کیا کہ پہلے جاری کئے گئے عدالتی احکامات پر عمل درآمد نہ ہونا ایک سنگین معاملہ ہے، اور اس پر سختی سے نگرانی کی جائے گی۔
