پونچھ حملہ کے بعد لیفٹیننٹ گورنر منوج سنہا کی صدارت میں سیکورٹی سے متعلق اعلیٰ سطحی میٹنگ منعقد

سرینگر،  پونچھ کے مینڈھر علاقے میں فوجی ٹرک پر حملے میں پانچ فوجی اہلکاروں کی ہلاکت کے بعد لیفٹیننٹ گورنر منوج سنہا کی صدارت میں اعلیٰ سطحی میٹنگ منعقد ہوئی جس دوران سیکورٹی صورتحال کا جائزہ لیا گیا ۔ اسی دوران لیفٹیننٹ گورنر نے G20اجلاس کیلئے تیاریوں کا بھی جائزہ لیا اور سیکورٹی فورسز کو الرٹ رہنے کی ہدایت دی ۔ میٹنگ کے دوران اعلیٰ پولس حکام نے انہیں تمام معاملات کے بارے میں تفصیلی جانکاری دی ۔ تفصیلات کے مطابق پونچھ ضلع کی مینڈھر تحصیل میں بھٹہ دوریاں علاقے میں فوجی ٹرک پر حملے میںپانچ فوجی اہلکاروں کی ہلاکت کے بعد لیفٹیننٹ گورنر منوج سنہا نے اعلیٰ سول اور پولس حکام کے ساتھ جموں خطے میں سیکورٹی صورتحال کا اعلیٰ سطحی جائزہ لیا۔ جس دوران انہوں نے عسکریت پسندوں کا سراغ لگانے اور اگلے ماہ جموں و کشمیر میں ہونے والے بڑے بین الاقوامی پروگرام سے پہلے امن کو یقینی بنانے پر زور دیا۔میٹنگ میں چیف سیکرٹری ڈاکٹر ارون کمار مہتا، داخلہ سیکرٹری آر کے گوئل،لیفٹیننٹ گورنر کے پرنسپل سکریٹری ڈاکٹر مندیپ کے بھنڈاری، پولس کے ڈائریکٹر جنرل دلباغ سنگھ، ایڈیشنل ڈی جی پی جموں مکیش سنگھ، صوبائی کمشنر رمیش کمار اور صوبے کے چاروں ڈی آئی جیز سمیت شکتی پاٹھک، سلیمان چودھری، سنیل گپتا اور ڈاکٹر حسیب مغل نے شرکت کی ۔ معلوم ہوا ہے کہ میٹنگ سول سیکرٹریٹ میں منعقد ہوئی اور ساڑھے تین گھنٹے تک جاری رہی۔ذرائع نے بتایا کہ میٹنگ میں جموں خطے میں سیکورٹی کے منظر نامے کا گہرائی سے جائزہ لیا گیا لیکن سب سے زیادہ توجہ راجوری اور پونچھ کے جڑواں سرحدی اضلاع پر مرکوز رہی جہاں گزشتہ تقریباً چار مہینوں میں ملی ٹنسی کے تین بڑے واقعات رونما ہوئے ہیں جن میں نو شہری اور پانچ فوجی ہلاک ہوئے ہیں۔ اہلکار اپنی جانوں سے ہاتھ دھو بیٹھے ہیں۔ انہوں نے کہا کہ میٹنگ میں اس بات پر سخت تشویش کا اظہار کیا گیا کہ تینوں حملوں میں ملوث عسکریت پسند، چاہے وہ ایک ہی ہوں یا الگ، اب تک ان کا پتہ نہیں چل سکا ہے۔تمام پولس افسران نے میٹنگ میں لیفٹیننٹ گورنر کو اپنے زونز کے بارے میں تفصیلی پریزنٹیشن دی جس میں عسکریت پسند اور اوور گراؤنڈ ورکرز ان کے علاقوں میں سرگرم ہیں، اگر کوئی ہیں، اور انہیں پکڑنے کے لیے کارروائی کا منصوبہ بنایا۔جب کہ جموں و کشمیر حکومت نے میٹنگ کے بارے میں کوئی سرکاری بیان جاری نہیں کیا تاہم ذرائع نے بتایا کہ لیفٹیننٹ گورنر نے بھٹہ دوریاں میں ملی ٹنسی کی تازہ کارروائی پر گہری تشویش کا اظہار کیا اور پولس سے مطالبہ کیا کہ وہ دیگر سیکورٹی ایجنسیوں کے ساتھ مل کر تلاشی کی مربوط کارروائیاں کرے تاکہ اس کے پیچھے ملوث افراد کو بے اثر کیا جا سکے۔سنہا نے 22 سے 24 مئی تک سرینگر میں ہونے والے جی 20 ٹورازم ورکنگ گروپ (ٹی ڈبلیو جی) کے اجلاس سے قبل چوکسی بڑھانے پر زور دیا ہے تاکہ یہ یقینی بنایا جا سکے کہ عسکریت پسند جموں میں ہونے والے پہلے بڑے بین الاقوامی ایونٹ سے پہلے اپنے مذموم عزائم میں کامیاب نہ ہوں۔ لیفٹیننٹ گورنر نے بھی پورے جموں صوبے میں پولس کی جانب سے مناسب تعیناتی اور تیاریوں پر زور دیا اور اس بات کو یقینی بنایا کہ عسکریت پسند دوبارہ حملہ کرنے میں کامیاب نہ ہوں۔پولس افسران نے اپنی پریزنٹیشن کے دوران بتایا کہ گزشتہ جمعرات کو پونچھ ضلع کے مینڈھر علاقے میں بھٹہ دوریاں میں فوجی گاڑی پر دہشت گردانہ حملے کے ذمہ دار عسکریت پسند مبینہ طور پر کچھ عرصے سے اس علاقے میں چھپے ہوئے تھے اور یہ کوئی نیا گروپ نہیں تھا۔ اس بات کا بھی جائزہ لیا جا رہا ہے کہ آیا وہ ڈھنگری اور الفا گیٹ حملوں میں ملوث تھے۔ ذرائع نے بتایا کہ جموں خطہ میں سیکورٹی کے منظر نامے کے مختلف پہلوؤں پر بھی میٹنگ میں غور کیا گیا۔