دیوبند، پولیس کے ذریعہ جرائم پیشہ افراد کے خلاف لگاتار ہورہے انکائونٹر کا اثر اب دیگر جرائم پیشہ افراد پر بھی ہونے لگا ہے۔ سہارنپور میں گزشتہ کل انکائونٹر کے ڈر سے پولیس تھانہ پہنچ کر جرائم پیشہ افرا د نے خودسپردگی کی ۔ اترپردیش کے سہارنپور میں انکائونٹرکے خوف سے سہارنپور کے تھانہ بہاری گڑھ پہنچ کر گینگ گیسٹر کے چار ملزمان نے پولیس افسران کے سامنے خودسپردگی کی ۔ چاروں گینگ گیسٹر جرائم میں ملوث افراد ہاتھوں میں بورڈ لے کر تھانہ بہاری گڑھ پہنچے اور خود سپردگی کرتے ہوئے آئندہ جرائم نہ کرنے کی قسم کھائی۔ اتراکھنڈ کے تھانہ بھگوان پور کے گائوں لال والا کے رہنے والے توقیر ، شوقین ولد زلفان اور صابر ولد عالیہ ، فوزان ولد سالم تھانہ بہاری گڑھ کے گائوں چنڈی ڈھیر کا رہنے والا ہے ۔ انہوں نے تھانہ پہنچ کر تھانہ انچارج بینو سنگھ کے سامنے جرائم سے توبہ کی اور آئندہ جرائم نہ کرنے کی قسم بھی کھائی ہے۔ چاروں ملزمان ہاتھوں میں تختیاں لئے ہوئے تھے جن پر لکھا تھا ’’میںگینگ گیسٹر کا ملزم ہوں‘‘ میں توبہ کرتا ہوں آج کے بعد کوئی جرم نہیں کروںگا۔ تھانہ انچارج بینوسنگھ نے بتایا کہ گینگ گیسٹر کے چاروں ملزمان پر ریاست اتراکھنڈ کے تھانہ بھگوان پور میں اور اترپردیش کے تھانہ بہاری گڑھ میں چوری ، لوٹ، پولیس تصادم سمیت آدھا درجن سے زائد مقدمات قائم ہیں انہوں نے آج تھانہ پہنچ کر جرائم سے توبہ کی ہے جنہیں عدالت میں پیش کیا گیا ہے۔
