دیوبند، مشہور ومعروف تعلیمی ادارہ تسمیہ جونیئر ہائی اسکول میں ناظرہ تکمیل قرآن کے موقع پر سیر ت النبی صلی اللہ علیہ وسلم کے عنوان سے ایک پروگرام منعقد کیا گیا، جس کی صدارت تسمیہ آل انڈیا ایجوکیشنل اینڈ سوشل ویلفیئر سوسائٹی نئی دہلی کے چیئرمین ڈاکٹر سید فاروق نے کی۔ جب کہ مہمان خصوصی کے طور پر سید محمد سعد نے شرکت کی ۔ پروگرام کا آغاز ادارہ کے طالب علم عمار علی کی تلاوت کلام پاک سے ہوا۔ بعد ازاں ادارہ کی ہی طالبہ سارہ نے اپنی خوبصورت آواز میں نعت پیش کی ۔ اس موقع پر صدر پروگرام اور مہمان خصوصی کا گل پوشی اور تحائف پیش کرکے استقبال کیا گیا۔ ڈاکٹر سید فاروق نے ناظرہ تکمیل قرآن کرنے والے بچوں اور ان کے والدین کو مبارک باد دیتے ہوئے کہا کہ دین سے واقفیت اور قرآن کریم ناظرہ یا حفظ ہم سب کا پہلا مقصد ہونا چاہئے ۔ انہوں نے کہا کہ قرآن کریم اللہ تعالیٰ کا وہ پاکیزہ کلام ہے جو ہمیں دنیا اور اخروی زندگی اور اس کے طور طریقوں سے واقفیت کراتا ہے ، اس کے ساتھ ہی انہو ںنے سیرت النبی صلی اللہ علیہ وسلم کے گوشوں پر بھی روشنی ڈالی ۔ ڈاکٹر سید فاروق نے ناظرہ تکمیل قرآن کرنے والے طلبہ وطالبات علیشا خان، نبیہ ، ذاکر، عافیہ، منتشا، اقرا، عالیہ، ذکیہ علینہ، عرشی، علی، عبدالاحد، محمد اقدس، شادما، محمد جنید، حیدر، سعد، محمد فریدی، ارمان علی زیدی، شعیب اویس، انس، زین العابدین اور دیگر طلبہ وطالبات کے درمیان کلام پاک کے نسخے تقسیم کئے، کلام پاک کا ہدیہ پاکر بچے بے حد خوش ہوئے۔ پروگرام کے مہمان خصوصی سید محمد سعد نے بچوں سے خطاب کرتے ہوئے کہا کہ قرآن کریم آخری آسمانی کتاب ہے جو ہمارے پیارے پیغمبر حضرت محمد صلی اللہ علیہ وسلم پر نازل فرمائی گئی۔ اللہ تعالیٰ نے قرآن کریم کی حفاظت کی ذمہ داری بھی لی ۔ انہوں نے کہا کہ قرآن کریم واحد ایسی کتاب ہے جو انسانوں کے سینوں میں محفوظ ہے۔ اس دنیا میں سب سے زیادہ پڑھی جانے والی کتاب ہے ، انہوں نے بچوں کو ناصحانہ کلمات سے نوازتے ہوئے کہا کہ بچے قرآن حکیم کے احکام کے مطابق اپنی زندگی گزارنا سیکھیں اور اپنی عادت و اخلاق کو سنواریں، نرم لہجہ میں گفتگو کریں۔ انہوں نے والدین سے اپیل کی کہ اپنے بچوں کو اللہ کے احکام ، نبی کی سنت اور قرآنی ہدایات کی روشنی میں پرورش کریں ، کردار وعمل سے ان کی سچا مومن اور صالح معاشرہ کا فرد بننے میں مدد کریں ۔ پروگرام کے اختتام پر تسمیہ اسکول کے پرنسپل جاوید مظہر نے خراب موسم کے باوجود تمام مہمانوں کا شکریہ ادا کیا اور کہا کہ انہیں امید ہے کہ والدین اپنے بچوں کی اچھی تربیت اور پرورش کریں گے اور انہیں کلام پاک کا عادی بنائیں گے۔ کیوں کہ قرآن کریم بھی ایسی کتاب ہے جو ہمیں جینے کا سلیقہ سکھانے کے ساتھ آخرت میں ہماری نجات کا ذریعہ بنے گی۔ انہوں نے بتایا کہ ناظرہ قرآن کریم مکمل کرنے والے بچوں کی حوصلہ افزائی کرنے کے لئے یہ پروگرام خصوصی طو رپر منعقد کیا گیا ۔ اس موقع پر والدین ، سرپرستوں کے علاوہ اسکول اسٹاف اور بڑی تعداد میں طلبہ وطالبات موجود رہے۔
