سر ینگر، جموں وکشمیر کے آئینی اور جمہوری حقوق کی بحالی کیلئے وسیع تر اتحاد کی بات دہراتے ہوئے صدرِ نیشنل کانفرنس ڈاکٹر فاروق عبداللہ نے کہا کہ اگر ہمیں اپنے تشخص اور پہچان کو واپس لانا ہے تو ہمارا ہر حال میں آپسی اختلافات اور ذاتی مفادات کو بالائے طاق رکھ کر متحد ہونا ضروری ہے اور اگر ہم ٹولیوں میں بٹے رہے ہیں تو ہم کبھی بھی کامیاب نہیں ہوسکتے ہیں۔تفصیلات کے مطابق کچھڈورو شوپیان میں پارٹی کے سرکردہ لیڈر مجاہد آزادی شہید شیخ محمد منصور کی 33ویں برسی پر کے موقعے پر منعقدہ ایک تقریب سے خطاب کرتے ہوئے ڈاکٹر فاروق نے کہا کہ آج نہ صرف جموں و کشمیر کی صورتحال دگرگوں ہے بلکہ ملک کا ماحول بھی غیر ہے۔ آج ایک منظم سازش کے تحت لوگوںکو ہندو، مسلم ،سکھ اور دیگر طریقوں سے تقسیم کیا جارہاہے اور یہ سلسلہ جموں وکشمیر بھی برابر چل رہاہے۔ انہوں نے کہا کہ جموںوکشمیر میں غربت ،افلا س اور غلامی سے نجات دلانے کیلئے عظیم قربانیاں پیش کی گئیں ہیں اور اسی کی بدولت یہاں کے عوام کو عزتِ نفس، وقار، خود اعتمادی اور خدا اعتمادی کی زندگی نصیب ہوئی۔ یہاں بادشاہ ہی مالک ہوتا تھا اور باقی سب لوگ غلام ہوتے تھے، کسی کو بات کرنے کی اجازت نہیں تھی، مٹھی بھر افراد ساری زمینوں کے مالک تھے، غریب عوام سال بھر محنت اور مشقت کرتے تھے اور آخر میں جاگیردار گھوڑے پر آکر سب کچھ اپنے ساتھ لیکر جاتا تھا۔ غربت اور افلاس اس قدر تھی کہ جس کا اندازہ بھی آج کا نوجوان نہیں لگا سکتا ہے۔ لیکن اللہ تعالیٰ کے رحم و کرم سے نیشنل کانفرنس کے عظیم بانیوں نے جموں وکشمیر کے عوام کو اُس سنگین دور اور سخت ترین غلامی سے نکالا کر ہی دم لیا۔ لیکن یہ اُسی صورت میں ممکن ہوسکا جب یہ جماعت مضبوط تھی ۔ شیر کشمیر شیخ محمد عبداللہ اور اُن کے ساتھیوں کے پاس بندوق، بم، ٹینک یا کوئی بڑی طاقت نہیں تھی لیکن اُنہیں عوام کا تعاون اور اشتراک حاصل تھا۔
جن حکمرانوں نے شیر کشمیر کو جیل میں بند رکھا تھا، وہ شیر کشمیر کی اسیری کے دوران بھی اُن سے ڈرتے تھے کیونکہ اُن کو عوام کا ساتھ تھا۔ ڈاکٹر فاروق عبداللہ نے کہا کہ اللہ کے فضل و کرم سے ہماری جماعت کو آج بھی عوام کا بے پناہ تعاون اور اشتراک حاصل ہے لیکن ہمیں موجودہ دور حد سے زیادہ ہوشیار کی ضرورت ہے کیونکہ عوام کو گمراہ کرنے کیلئے نت نئے حربے اپنائے جارہے ہیں اور ہماری صفوں کو کمزور کرنے کیلئے مختلف نوعیت کی سازشیں رچائیں جارہی ہیں۔ لوگوںکو علاقائی ، لسانی اور مذہبی بنیادوں پر تقسیم کیا جارہاہے۔ زرکثیر خرچ کرکے لوگوں کا ایمان خریدنے کی کوششیں کی جارہی ہیں یہاں تک کہ ہمارے بچوں کو لالچ دیکر گمراہ کیا جارہاہے۔ والدین پر یہ ذمہ داری عائد ہوتی ہے کہ وہ اپنے بچوں اور ان کی سرگرمیوں پر ہر وقت نظر رکھیں ۔
