حج مہنگا ہونے سے پورے ملک کے عازمین حج پریشانی میں مبتلا

نئی دہلی ،  معروف سینئر رضاکار حاجی ریاض الدین نے حج 2023 سے جانے والے عازمین کا حج مہنگا ہونے پر افسوس اور تشویش کا اظہار کرتے ہوئے مرکزی حکومت سے مطالبہ کیا ہے کہ خصوصی طور پر دہلی سمیت تقریباً ملک کے زیادہ تر امبارکیشن پوائنٹ کے کرایہ میں اضافہ ہوا ہے اس کو فوری کم کرنے کا اعلان کیا جائے۔حاجی ریاض الدین نے اپنے پریس بیان میں کہا کہ کتنا افسوس ناک ہے کہ ممبئی کے عازمین کا کرایہ جو سعودی ائیرلائنس سے جا رھے ہیں اسکے مقابلے دہلی سے جانے والوں کا کرایہ تقریباً چالیس ہزار روپیہ زائد ھے انہوں نے مثال دی کہ یہی نہیں لکھنؤ سے جانے والے عازمین بھی سعودی ائیرلائنس سے ہی سفر کریں گے اس میں ممبئی کے مقابلے 55 ہزار روپیہ زائد رکھے گئے ہیں کس پیمانہ سے ایئر لائنس کا کرایہ طے ہوا ھے یہ منطق سے باہر ہے۔انہوں نے مزید کہا کہ وزیر اسمرتی ایرانی دہلی میں صحافیوں کے ساتھ دو بار روبرو ہوئیں اور موصوفہ نےزور دے کر کہا تھا اس سال حج تقریباً پچاس ہزارروپیہ سستا ہوگا مگر اس کے برعکس دہلی سے ہی نہیں پورے ملک سے عازمین حج سخت پریشانی میں مبتلا ہیں کہ حج کافی مہنگا ہو گیا۔وزیر موصوفہ کو اس طرف خصوصی دھیان دینا چاہئے ۔حاجی ریاض الدین نے کہا کہ ریال دینے کا بھی فیصلہ قدیمی روایت کے خلاف ہے وزارت کا یہ فیصلہ عازمین کے لئے پریشانی کا باعث ہے حج کے سلسلے میں عازمین کے لگاتار فون آرہے ہیں کہ حج تقریباً ایک لاکھ مہنگا ہو گیا ہے اس کو فوری طور پر کم کرنے کا اعلان کیا جائے۔